Read dyu Sira deen ka kitabu 5 Bible Online

Sira deen ka kitabu 5 - dyu bible

Sira deen ka kitabu 5

¹Nafolo minɛcogojugu Kan'i bolo la e ka nafolo kan. Kan'a fɔ k'i be se i yɛrɛ kɔrɔ.

²Kan'a to e ka nigɛla farimanw k'i bila ŋaniyajugu la.

³Kan'a fɔ ko: «Jɔn be se ne kɔrɔ?» Matigi tena i ɲagwanbali to.

⁴Kan'a fo ko: «Ne ye hakɛ kɛ, foyi ma n sɔrɔ.» Bari, Matigi be muɲu ka mɛn.

⁵Kan'i jigi la yafa kan, ka to ka kojugu fara kojugu kan.

⁶Kan'a fɔ ko: «A ka makari ka bon, o la, a bena n ka hakɛ caaman nunu yafa.» Bari, a be makari ani a be dimi fana, a ka dimi kɔni bena se kojugukɛlaw ma.

⁷Kana mɛn k'i sɔɔn yɛlɛma ka sin Matigi ma. Kana to k'o koo bila loon wɛrɛ kan. Bari, Matigi ka dimi bena bari ka se, ɲagwanlon na kɔni, i bena halaki.

⁸Kan'i bolo la nafolo kan, min sɔrɔla tilenbaliya la, a tena foyi ɲa i ye lonjugu la. Mɔgɔ daa be se k'a don koo la

⁹Kan'i ka suman fiyɛ fɔɲɔ bɛɛ la. Kana i seen don sira bɛɛ la i ko kojugukɛla filakanfɔla b'a kɛ cogo min na.

¹⁰E lanin be koo min na, kana bɔ o kan. Kɛ kuma kelen tigi ye.

¹¹E ka to ka mɛnni kɛ kosɔbɛ. Nga kana kɔrɔtɔ ka jaabili di.

¹²Ni fɔta b'i fɛ, e mɔgɔɲɔgɔn jaabi. N'o tɛ, i k'i daje.

¹³Kunkɔrɔta ni dɔgɔya be sɔrɔ baro kɔnɔ. Adamaden nɛɛn be se ka kɛ a yɛrɛ halaki sababu ye.

¹⁴Kan'a to i tɔgɔ be bɔ mɔgɔ tɔgɔjugu fɔ la. I daa kana mɔgɔ bila koo la. Maloya ye soon ta ye, nga jalakiba be ben filakanfɔla kan.

¹⁵I yɛrɛ kɔlɔsi kofitini, walima koba la.