Read dyu Sira deen ka kitabu 50 Bible Online

Sira deen ka kitabu 50 - dyu bible

Sira deen ka kitabu 50

¹Oniyasi dencɛ sarakalasebagaw kuntigi Simɔn le ye Alabatosoba lalaga. U ye barika don Ala sigiyɔrɔ la, ale lo ka tile la.

²Ale lo ye kogo jamanjan nin juu sigi. Ale lo ye Alabatosoba yɔrɔ kɔrɔtanin nin juu sigi.

³Ale ka tile la, jii lɔyɔrɔ nin sogira. Jii lɔyɔrɔ min tun ka bon i ko Alabatosoba dala tasaba.

⁴Ka jama tanga halakili ma, o tun y'a ka haminako ye. O la, a ye dugu lamini ni kogo ye k'a kisi jugu ma.

⁵A ka nɔɔrɔ tun be manamana haali a bɔtɔ Ala sigiyɔrɔ cɛtigɛfani kɔfɛ! A tora ka manamana kosɔbɛ Alabatosoba sigiyɔrɔ laminiwaati la.

⁶A tun be manamana i ko dugugwɛda lolo, sankaba cɛma. I ko kalo, a gwɛwaatiw la parapara.

⁷I ko tile be manamana Fɛɛn bɛɛ kuntigi sigiyɔrɔ sanfɛ cogo min na. I ko sanmuru be manamana sankaba nɔɔrɔmanw cɛma cogo min na.

⁸I ko yirifeeren, tilemana na. I ko binfeeren, jidaw la. I ko yiri nɛrɛnin, funtenituma Liban kulu kan.

⁹I ko wusulan min be jɛnina wusulandaga kɔnɔ. I ko sanudaga belebeleba min masirinin be ni kabakuru sɔngɔgwɛlɛ sifa bɛɛ ye.

¹⁰I ko olivuyiri min be deen. I ko sipɛrɛyiri min be wili sanfɛ legelege.

¹¹A ye dulokiba nɔɔrɔman don tuma min na, a y'a ka masirifɛn ɲanamanw don waati min na, a yɛlɛtuma na Ala ka sarakabɔyɔrɔ la, a ka nɔɔrɔ ye Ala ka sigiyɔrɔ kɛ yeelen ye.

¹²A ye niyɔrɔw minɛ tuma min na sarakalasebagaw bolo, a lɔnin tun be sarakabɔyɔrɔ tasuma manayɔrɔ gɛrɛfɛ. A balimaw tun lɔra k'a lamini i ko masafugulan a kunna. I ko yiribabaw, Liban kulu kan, i ko tamarosun koorininw.

¹³Arɔn deenw bɛɛ tun be ni u ka nɔɔrɔ ye. Matigi boɲafɛnw tun be u bolo. U tun be jama bɛɛ lajɛnnin ɲafɛ.

¹⁴Simɔn tun be baara kɛra sarakabɔyɔrɔ la. A tun be sarakafɛnw bilara Setigi, Fɛɛn bɛɛ kuntigi ɲakɔrɔ.

¹⁵A tun ye minnifilen ta, ka duvɛn, *ɛrɛzɛnji bɔn sarakabɔyɔrɔ jukɔrɔ. O ye kasa diman ye Fɛɛn bɛɛ kuntigi, diɲɛ masa fɛ.

¹⁶O tuma na, Arɔn deenw tun be pɛrɛn, ka to k'u ka buru nigɛlamanw fiyɛ. U tun be mankanba cira, k'o kɛ hakilijigifɛn ye jama fɛ Fɛɛn bɛɛ kuntigi kosɔn.

¹⁷O tuma na, o yɔrɔnin kelen, jama bɛɛ jɛnna ɲɔgɔn fɛ k'u kunbiri gwan k'u ɲaa biri, ka Setigi, Fɛɛn bɛɛ kuntigi Ala bato.

¹⁸Dɔnkililabagaw tun b'a tanura kosɔbɛ. Mankan nin boɲana ka kɛ dɔnkili diman ye.

¹⁹Jama tun be Matigi, Fɛɛn bɛɛ kuntigi dalila. U tora dalili la Makaritigi ɲakɔrɔ fɔɔ u tilara Matigi bato la ka tila a ka baara la.

²⁰O tuma na, Simɔn jigitɔ y'a bolow kɔrɔta, k'u sin jama bɛɛ lajɛnnin ma, Isirayɛlidenw ma. A ye duba kɛ u ye, n'a yɛrɛ daa ye Matigi tɔgɔ la. A ye kunkɔrɔta sɔrɔ ten, bari a ye Matigi tɔgɔ wele.

²¹Jama bɛɛ lajɛnnin y'u kunbiri gwan tugu janko ka dɛmɛ sɔrɔ Matigi fɛ. Jama ka hɛrɛ dali

²²Ayiwa, sisan, aw ka barika la diɲɛ tigi Ala ye, ale min be kobabaw kɛ faan bɛɛ, ale min ye boɲa la an ka tile kan k'an to an baa kɔnɔ. A y'an minɛ ka ɲa a ka ɲumanya kosɔn.

²³A ka nisɔndiya don an dusu la. A ka hɛrɛ kɛ Isirayɛlidenw ye an ka tile la ani saan o saan.

²⁴A ka makari an na ni kantigiya ye k'an bɔ bolo la an sii bɛɛ la. Siya mangow

²⁵Siya fila be yen minw koo ka go ne ye. A sabanan te siya yɛrɛ ye.

²⁶A fɔlɔ ye *Seyiri kuluyɔrɔ sigibagaw ye, ni filisiw, ani naloman minw siginin be Sisɛmu dugu kɔnɔ. Kuma kuncɛyɔrɔ

²⁷Zeruzalɛmuka Eleyazari dencɛ Siraki deen Yezu le ye hakilitigiya ni lɔnniya sɛbɛn kitabu nin kɔnɔ. Lɔnniya min fanin b'a kɔnɔ, a y'o le funfun kitabu nin kɔnɔ i ko sanji.

²⁸Mɔgɔ min man'a sɔbɛ don kuma nunu na, o dagamunin lo. Mɔgɔ min man'a mara a dusu la, o tigi be kɛ kolɔnbaga ye.

²⁹Bari, n'a y'u bato, a bena kɛ fangatigi ye koo bɛɛ la. Sabu, a bena to ka siran Matigi ɲa a taayɔrɔw bɛɛ la. A be [1] lɔnniya di mɔgɔɲumanw ma. Barika ka la Matigi ye tuma bɛɛ. Amiina, amiina!