Read dyu Sira deen ka kitabu 6 Bible Online

Sira deen ka kitabu 6 - dyu bible

Sira deen ka kitabu 6

¹Kana kɛ i teri jugu ye dɛ, bari, tɔgɔjugu be na ni maloya ni mafiɲɛyali ye. O ɲɔgɔn le bena kojugukɛla filakanfɔla sɔrɔ.

²Kana e yɛrɛ cɛn nigɛlakow bolo, n'o tɛ, e fanga bena bari ka nagasi,

³ka kɛ i ko yiri janin min bɔnɔna a furaburu n'a deenw na.

⁴Ŋaniyajugu be mɔgɔ halaki, k'a kɛ a juguw be yɛlɛ a ma. Teriya

⁵Kuma diman be mɔgɔ teriw caya, kumaɲuman be na ni bɛɛn ye.

⁶I k'a to i fobagaw ka caya. E ladibagaw mana caya cogo o cogo, mɛnni kɛ kelen fɛ.

⁷N'i ye teri sɔrɔ, a sɛgɛsɛgɛ fɔlɔ, kana kɔrɔtɔ k'i jigi l'a kan.

⁸Bari, dɔw be teriya kɛ lonɲuman kama, ni gwɛlɛya ser'i ma, teriya banna.

⁹Teri dɔ be yɛlɛma ka kɛ e jugu ye. Bɛnbaliya min b'aw cɛ, a ben'o gundo walaka k'i maloya.

¹⁰Dɔ be teriya kɛ dumuni kama, gwɛlɛya mana se i ma, teriya banna.

¹¹I ka lɔnɲumanw na, a be kɛ i balima ye fɔɔ a be kuntigiya kɛ e ka baaradenw kan.

¹²Nga, e majigilon mana se, ale be yɛlɛma ka kɛ e jugu ye, a be dogo i la.

¹³I yɛrɛ mabɔ e juguw la. I yɛrɛ kɔlɔsi i teriw la.

¹⁴Terisɔbɛ be i ko tangayɔrɔɲuman. Ni mɔgɔ min y'o sɔrɔ, o tigi ye nafolo sɔrɔ.

¹⁵Terisɔbɛ te sanfɛn ye, a sɔngɔ te se ka fɔ.

¹⁶Terisɔbɛ be i ko furaɲuman. Minw be siran Matigi ɲa, olu le b'a sɔrɔ.

¹⁷Mɔgɔ min be siran Matigi ɲa, ale be teriyasɔbɛ kɛ. Bari, ale yɛrɛ be cogo min na, a teri fana bena kɛ ten. Lɔnniya degi

¹⁸N deen, kabini e kanbelentuma, sɔn kalan ma fɔɔ ka taga se i kunsigi gwɛwaati ma, i bena kɛ lɔnnikɛla ye.

¹⁹I ko sɛnɛkɛla ni dannikɛla, i sɔbɛ don a la k'a nafa makɔnɔ. Bari, ale sɛnɛko bena i sigɛn dɔɔni dɔrɔn, nga, dɔɔni i ben'a nafa dumu.

²⁰Lɔnniya sɔrɔ ka gwɛlɛ kolɔnbali fɛ. Mɔgɔ hakilitan te se ka muɲu a kɔ,

²¹lɔnniya be i ko kabakuru, fɛɛn gwiliman lo min b'a fanga suma. A tena mɛn k'a fili do.

²²Lɔnniya tɔgɔ ka kan n'a yɛrɛ tɔgɔ ye. Bari, mɔgɔ caaman t'a sɔrɔ.

²³N deen, mɛnni kɛ. Sɔn ne ka hakililata ma. Kana ban n ka ladili la.

²⁴I seen don a ka jɔrɔkɔ la, i kaan don a ka lɔgɔ kɔrɔ.

²⁵A ɲun i gaman kan, kana sigɛn a kɔrɔ.

²⁶Tag'a fɛ ni dusuɲuman ye. Fanga don i yɛrɛ la, a ka sira taama la.

²⁷Sira ta ka tugu a kɔ, k'a yɔrɔ ɲini, a ben'a yɛrɛ yira i la. N'i ya sɔrɔ, kan'a bila fewu.

²⁸Bari, a laban na, i bena lafiɲɛ sɔrɔ a fɛ. A bena yɛlɛma ka kɛ i ka nisɔndiya ye.

²⁹O tuma na, a ka jɔrɔkɔ bena kɛ e tangafɛn barikaman ye. A ka lɔgɔ bena kɛ kunkɔrɔtadeleke ye i fɛ.

³⁰A ka kanlalɔgɔ ye masirifɛn sanulaman le ye. A ka jɔrɔkɔw ye kunnasirifaniɲuman le ye.

³¹I ben'a don i ko kunkɔrɔtaduloki. I bena i yɛrɛ masiri n'a ye i ko nisɔndiyafugulan.

³²N'i sɔnna n deen, i bena lɔnni sɔrɔ. N'e y'i sɔbɛ don a la, i bena se.

³³N'i be to ka mɛnni kɛ kosɔbɛ, i bena lɔnni sɔrɔ. N'i ye mɛnni kɛ ka ɲa, i bena kɛ lɔnnikɛla ye.

³⁴To ka taga mɔgɔkɔrɔbaw cɛma. Nɔrɔ u ka lɔnniya la.

³⁵Kuma o kuma bɔra Ala fɛ, mɛnni kɛ o la ka ɲa. Kan'a to talenɲumanw be bɔsi i la.

³⁶N'i ye hakilitigi dɔ ye, teliya ka se a fɛ kabini sɔgɔma. Kɛ a ka soda la tuma bɛɛ.

³⁷Miiri Matigi ka fɔtaw la. I sɔbɛ don a ka ciiw batoko la. Ale yɛrɛ bena barika don i la I be lɔnniya min fɛ, i ben'o sɔrɔ.