Read dyu Sira deen ka kitabu 7 Bible Online

Sira deen ka kitabu 7 - dyu bible

Sira deen ka kitabu 7

¹Ladili dɔw Kana kojugu kɛ, kojugu fana tena se i ma.

²I mabɔ tilenbaliya la, tilenbaliya fana bena bɔ i kɔrɔ.

³Kana koo kɛ tilenbaliya la, n'o tɛ, a ɲɔgɔn wolonwula be se k'i sɔrɔ.

⁴Kana faamaya dali Matigi fɛ, kana lɔyɔrɔba fana dali masacɛ fɛ.

⁵Kan'i yɛrɛ jati mɔgɔtilennin ye Matigi ɲakɔrɔ. Kan'i yɛrɛ kɛ lɔnnikɛla ye fana masacɛ ɲakɔrɔ.

⁶N'i tena se ka tilenbaliya bɔ i ka koo la, kana kititigɛbaara ɲini. Bari, mɔgɔbaba dɔ be se k'i ɲagami, ka siga don i ka mɔgɔsɔbɛya la.

⁷Kana dugumɔgɔw hakɛ ta. Kan'i yɛrɛ dɔgɔya jama ɲana.

⁸Kana hakɛ kelen kɛ siɲɛ fila, bari, kelen dama b'i jalakikun bɔ.

⁹Kan'a fɔ ko: «Ni n ye n ka sarakaw bɔ Fɛɛn bɛɛ kuntigi ye tuma min na, a bena sɔn u la, bari, a bena u caya filɛ.»

¹⁰Kana sigasiga e ka Aladali la. Kana ban ka ɲuman kɛ mɔgɔ ye.

¹¹Kana yɛlɛko sigɛnbagatɔ la abada! Bari a majigibaga n'a kɔrɔtɔbaga be yen.

¹²Kana galon la i balima kan. Kana o ɲɔgɔn kɛ i teri la.

¹³Kana galon tigɛ cogo si la. Ka ta ɲa galontigɛ la, o te foyi ɲa.

¹⁴Kana to ka kuma i kunfɛ mɔgɔkɔrɔbaw ka ɲɔgɔnye yɔrɔ la. Kana segi e ka kumaw kan e ka dalituma na.

¹⁵Kana baaragwɛlɛn koo goya i yɛrɛ ye, hali forobaara Fɛɛn bɛɛ kuntigi ye min dan.

¹⁶Kana fara kojugukɛlaw ka jɛnkulu kan. I hakili to a la ko Ala ka dimi tena mɛn ka wili a kama.

¹⁷I yɛrɛ majigi kosɔbɛ. Bari, Alaɲasiranbali ɲagwanfɛn bena kɛ tasuma ni tumu le ye. Teriw ni balimaw

¹⁸Kan'i teri falen warigwɛ la. Kan'i balima yɛrɛ yɛrɛ falen sanu yɛrɛyɛrɛ la fana.

¹⁹Kana i mabɔ musoɲuman hakilitigi la. Bari, a ka nɔɔrɔ ka fisa ni sanu ta ye.

²⁰E ka jɔɔn min be baara kɛ ni kɔnɔgwɛ ye, kan'o tɔɔrɔ. E ka baaraden min be baara kɛ n'a sɔbɛ ye, kan'a tɔɔrɔ.

²¹Jɔɔn hakilitigi koo diya i yɛrɛ ye kosɔbɛ, kana ban k'a hɔrɔnya.

²²Begɛnw b'i fɛ wa? U kɔlɔsi ka ɲa. I be nafa sɔrɔ u la wa? U mara kosɔbɛ.

²³Deenw b'i fɛ wa? U ladi dɛ! U kolo kabin'u denmisɛntuma.

²⁴Denmusow b'i fɛ wa? U kɔlɔsi kosɔbɛ. Kana yɛlɛko n'u ye dɛ!

²⁵I denmuso di furu la, koo be bɔ i kunna. Nga, a di cɛɛ hakilitigi ma dɛ!

²⁶E diyanamuso b'i fɛ wa? Kan'a bila dɛ! Nga, min koo man d'i ye, kan'i jigi la ale kan.

²⁷I faa boɲa n'i dusu bɛɛ ye. Kana ɲinɛ i bamuso ka sigɛn kɔ.

²⁸I hakili to a la ko i be nii na olu le sababu la. U ye min kɛ i ye, i bena se k'o sara cogo di? Sarakalasebagaw boɲa

²⁹E ka siran Matigi ɲa kosɔbɛ ka boɲa la a ka sarakalasebagaw kan.

³⁰I Danbaga kanu n'i barika bɛɛ ye. Kana cekun bɔ a ka baarakɛlaw la.

³¹Siran Matigi ɲa, boɲa la a ka sarakalasebaga kan. A niyɔrɔ d'a ma i ko Ala y'a fɔ cogo min na: sɛnɛfɛn deen fɔlɔw, fili yafa sarakaw, saraka sogo gamanw, suman saraka tɔw, ani fɛnɲuman minw dira Ala ma. Dɛsɛbagatow dɛmɛ

³²Fantan dɛmɛ, i ta bena ɲa kosɔbɛ.

³³E ka ɲuman ka se mɔgɔ bɛɛ ma. Kana ban ka ɲa suuw yɛrɛ ma.

³⁴Kana boli kasibagaw ɲa. Nimisa ni mɔgɔ dusukasininw ye.

³⁵Kana sigasiga ka taga banabagatɔw filɛ. I koo bena diya mɔgɔw ye o bɔɲɔgɔnkow le kama.

³⁶I man'a fɔ ko i be koo o koo kɛ, i hakili to i labanko la, o la, i tena hakɛ kɛ.