Read dyu Sira deen ka kitabu 8 Bible Online

Sira deen ka kitabu 8 - dyu bible

Sira deen ka kitabu 8

¹Yɛrɛminɛ ni tɔw ye Kana kɛlɛ kɛ ni fangatigi ye dɛ! N'o tɛ, a bena se i kɔrɔ.

²Kana kɛlɛ ni nafolotigi ye dɛ! N'o tɛ, u ben'a jati ka tɛmɛ i kan. Bari, sanu ye mɔgɔ caaman kuun cɛn. A ye masa dɔw yɛrɛ kɔnɔnako yɛlɛma.

³Kana sɔsɔli kɛ ni kuma caaman tigi ye. Kana lɔgɔ don a ka tasuma na.

⁴Kana tolon kɛ ni kolobali ye. N'o tɛ, a bena i bɛmaw nɛni.

⁵Kojugukɛla min be nimisara, kan'o jalaki. I hakili to a la ko bɛɛ ye filibaga ye.

⁶Kana cɛkɔrɔba dɔgɔya. Bari, an dɔw b'a la ka kɔrɔya.

⁷Kana nisɔndiya mɔgɔ dɔ ka saya la. Bari, an kelen kelen bɛɛ bena sa.

⁸Kana lɔnnikɛlaw ka kalan lɔgɔbɔ, nga to k'u ka talenw sɛgɛsɛgɛ. I bena lɔnniya sɔrɔ olu le sababu la. O la, i bena se ka baara kɛ mɔgɔbabaw ye.

⁹Kana ban cɛkɔrɔbaw ka koɲafɔta la. Bari, olu fana y'a mɛn u faaw fɛ. I bena faamuyali sɔrɔ olu le fɛ. O la, jaabili bena sɔrɔ i fɛ tuma bɛɛ.

¹⁰Kana don kojugukɛla ka koo la, n'o tɛ, a ka tasuma bena i jɛni.

¹¹Kan'i yɛrɛ kɛɲɛ ni malobali ye, n'o tɛ, a bena i bila nalomankuma la.

¹²Kana fɛɛn juru don fangatigi la, n'i y'o kɛ, i k'o jati fɛɛn tununin ye.

¹³Koo min see t'i ye, kan'i daa di o la, n'i y'o kɛ, a lɔn ko i ben'a sara.

¹⁴Kiti kana don e ni kititigɛla cɛ, n'o tɛ, kiti bena diy'a la a ka lɔyɔrɔ kama.

¹⁵Kana sira ta ni faratimɔgɔ ye, n'o tɛ, a bena dɔ fara i ka gwɛlɛya kan. Bari, a ben'a sagolako kɛ, o bena kɛ ele nagasiko ye.

¹⁶Kɛlɛ kana don e ni mɔgɔ fariman cɛ, kana kongokolon cɛtigɛ n'a ye, bari foyi ten'a bali ka mɔgɔ faga, a bena ben i kan o yɔrɔ la k'i faga. Dɛmɛbaga tena sɔrɔ i fɛ.

¹⁷Kana naloman kɛ i gundoɲɔgɔn ye n'o tɛ, a tena se k'i ka gundo mara.

¹⁸Kana kodogonin kɛ lonan ɲana. Bari, a bena o koo minɛ cogo min, e t'o lɔn.

¹⁹Kan'i kɔnɔ yɛlɛ bɛɛ ye dɛ, n'o tɛ, u ten'a lɔn i ye.