Read dyu Ezayi ka kitabu 1 Bible Online

Ezayi ka kitabu 1 - dyu bible

Ezayi ka kitabu 1

¹ Masaba ye yelifɛn minw yira Amɔsi dencɛ Ezayi la Zuda mara ni Zeruzalɛmu koo la, Oziyasi ka masaya tile la Zuda mara kunna, ni Yotamu, ani Akazi ni Ezekiyasi taw la.

²Sankolo, i ka mɛnni kɛ! Dugukolo, e k'i tulo malɔ! Bari, Masaba be kumana. A ko: «Ne ye deenw kolo. Ne y'u lamɔ. Nga u murutira ne ma.

³Misi b'a tigi lɔn, fali b'a ka kolokolo bilayɔrɔ lɔn. Nga Isirayɛlidenw te ne lɔn, ne ka jama te foyi faamu.»

⁴Bɔnɛ ye aw ta ye! Aw jamana mɔgɔw, kojugukɛlaw! Aw ka kojugu doni b'aw kunna! Siyajuguw! Denkolon nunu! Aw banna Masaba la! Aw ye Isirayɛli ka Ala dɔgɔya. Aw y'aw kɔɔ d'a ma.

⁵Aw minw be muruti tuma bɛɛ, aw ka kan ka bugɔ aw fari yɔrɔ jumɛn la tugu? Bari kungolo bɛɛ ye joli ye, dusukun bɛɛ nagasira!

⁶K'a ta sentigɛ la, ka ta'a bila kungolo la, yɔrɔ si te a cogo la. A bɛɛ mandiminin lo, a bɛɛ bugɔlinɔw, ni jolidakuraw. U ma ko, tulu ma mɔ u la, u ma siri.

⁷Aw ka jamana halakira, aw ka duguw jɛnina. Aw yɛrɛw ɲana, lonanw b'aw ka forow fonna. U cɛnnin lo, i ko siya wɛrɛw y'a ɲagami.

⁸*Siyɔn dugu tora. A tora yen i ko togonda, *ɛrɛzɛnforo kɔnɔ. A tora yen i ko bonkolon, jeforo kɔnɔ. A tora yen i ko kɛlɛdenw ye dugu min lamini.

⁹ Ni Masaba Setigi tun ma an tɔɔ to, an tun bena halaki i ko Sodɔmu, an tun bena halaki i ko Gɔmɔri.

¹⁰Aw, Sodɔmu dugu ɲamɔgɔw, aw ye mɛnni kɛ Masaba ka kuma la! Gɔmɔrikaw, aw k'aw tulo malɔ an ka Ala ka sariya la!

¹¹ Masaba ko: «Aw ka saraka caaman nunu be mun le ɲa ne ye? Aw be sagajigi minw bɔ saraka jɛnitaw ye, olu nigɛ bɔra n la, aw ka misituluw fana nigɛ bɔra n la. Tura joli, ni sagaden joli, ani bakɔrɔnin joli te n nisɔn diya tugu.

¹²Aw be to ka na lɔ ne ɲakɔrɔ. Jɔn y'a ɲini aw fɛ ko aw k'aw seen la ne ka luu kɔnɔ?

¹³Aw kana boɲafɛn fufafu di ne ma tugu. Aw ka wusulan sisi man di n ye. Aw be kojugu minw kɛ kalokura ɲanagwɛw, ni lafiɲɛlonw, ani aw ka lajɛnnilonw la, ne te se k'o muɲu.

¹⁴Aw ka kalokura ɲanagwɛw, n'aw ka ɲanagwɛ tɔw koo ka go ne ye. U be n tɔɔrɔ, u nigɛ bɔra.

¹⁵N'aw be daalili kɛra, ne bi n yɛrɛ dogo aw la. Hali n'aw y'aw ka daaliliw caya, ne tena mɛnni kɛ aw fɛ. Aw ye mɔgɔfagalaw ye!

¹⁶Aw ka jii ko, aw k'aw yɛrɛ saniya. Aw k'aw ka kɛwalijuguw tunu ka bɔ n ɲakɔrɔ! Aw ka kojugu dabila.

¹⁷Aw ka koɲumankɛ degi, aw ka tilenninya kɛ, aw ka mɔgɔ tɔɔrɔninw dɛmɛ. Aw ka falatɔw ka tiɲɛ d'u ma. Aw ka firiyamusow kunko ɲanabɔ.

¹⁸Ɔnhɔn! Aw ye na, an ka sigikafɔ kɛ.» Masaba ko ten! «Hali n'aw ka kojuguw wulenna i ko joli, u bena gwɛ i ko kɔɔri. Hali n'u wulenna fɔɔ ka fin, u bena gwɛ parapara.

¹⁹N'aw sɔnna ka mɛnni kɛ ne fɛ, aw bena jamana nin tɔnɔ dumu.

²⁰Nga n'aw banna, n'aw murutira, murujan le ben'aw ban.» Masaba le ko ten!

²¹Duguɲuman nin kɛra di ka kɛ tilenbaliyadugu ye ten? Hɔrɔnyadugu tun lo. Tilenninyadugu tun lo. Nga sisan, mɔgɔfagadugu lo.

²²Aw ka warigwɛ kɛra i ko nigɛbo. Aw ka duvɛn diman fanin be jii la.

²³Aw ka dugu ɲamɔgɔw kɛra mɔgɔmurutininw ye, benkannikɛlaw dɛmɛbagaw lo. Bonyafɛn le ka di u bɛɛ ye, u be boli daa sanfɛnw kɔ. U te falatɔ ka tiɲɛ d'a ma, firiyamuso ka koo te don u tulo la ka ye.

²⁴O le y'a to, Matigi, Masaba, Setigi ko, Isirayɛli ka Barikatigi ko: «Jaati! Ne bena see n kɛlɛɲɔgɔnw kɔrɔ, ne bena n mɔnɛ bɔ n juguw la.

²⁵Ne bena n bolo kɔrɔta aw kama. Nɔgɔ min b'aw kan i ko nigɛbo, ne ben'o bɛɛ bɔ nigɛbo bɔcogo la ni tasuma ye.

²⁶Ne bena aw ka kititigɛlaw yɛlɛma k'u kɛ i ko fɔlɔfɔlɔ kititigɛlaw, k'aw ka ladilikɛbagaw kɛ i ko fɔlɔfɔlɔtaw. O kɔ, aw ka dugu bena sɔrɔ ka wele ko Duguɲuman, tilenninyadugu.»

²⁷*Siyɔn bena kisi tilenninyako sababu la. A kɔnɔmɔgɔ minw bena nimisa ka fara u ka kojuguw la, ka tiɲɛko kɛ, olu bena kisi.

²⁸Mɔgɔmurutininw ni kojugukɛlaw bena halaki ɲɔgɔn fɛ. Minw be ban Masaba la, olu bena tunu.

²⁹Aw ka joyiri minw koo ka d'aw ye haali, aw bena maloya olu koo la. Aw ye yiritu minw woloma, aw kuun bena surun u koo la.

³⁰Bari, aw bena kɛ i ko yiribaba, a furaburuw wulentuma na. Aw bena kɛ i ko yiritu, jii dɛsɛra min na.

³¹Mɔgɔ barikaman be kɛ i ko lɔgɔ murumuru, a ka baara be kɛ takami ye, u fila bena jɛni ɲɔgɔn fɛ. Mɔgɔ si tena sɔrɔ min b'a faga.