Read dyu Ezayi ka kitabu 10 Bible Online

Ezayi ka kitabu 10 - dyu bible

Ezayi ka kitabu 10

¹Mɔgɔ minw be sariyajuguw sigi, k'u sɛbɛn, bɔnɛ ye olu ta ye!

²U be fantanw niyɔrɔ bɔsi u la ten kititigɛyɔrɔ la. U ka kan ni min ye, u t'o kɛ u ye. Firiyamusow kɛra u ka dumuni ye, u be falatɔw bololafɛnw bɔsi.

³N'aw ka kojuguw saralon sera, ni bɔnɛ bɔra yɔrɔjan ka na, aw bena mun kɛ o loon na sa? Aw bena boli ka taga jɔn fɛ ka dɛmɛ ɲini sa? Aw bena aw ka nafolow bila min do?

⁴Kɛta tena sɔrɔ, fɔɔ ka biri kasodenw cɛma, walima ka to suuw cɛma. O n'a ta bɛɛ, Masaba ka dimi ma ban, halibi, a bolo wilinin be sanfɛ.

⁵ Bɔnɛ ye Asirikaw ta ye! N diminin be mɔgɔ minw kɔrɔ, ne be Asirikaw kɛ i ko bere k'o tigiw ɲaa gwan.

⁶Ne b'u bila ka taga siya dɔ kama, min te siran ne ɲa. Mɔgɔ minw be ne dimina, ne b'u cira olu kama, waasa k'u ka fɛɛnw bɔsi, ka ben u kan, k'u seenw dɔndɔn i ko mɔgɔ be bɔgɔ dɔn cogo min na bɔlɔn na.

⁷Nga olu m'a faamu ten dɛ, u ka miiriya ma se a ma ten. Bari, olu ka miiri ye ka halakili kɛ dɔrɔn, ka siya caaman sii tunu.

⁸U be to k'a fɔ ko: «An ka kɛlɛkuntigiw bɛɛ ye masaw le ye.

⁹An ye Kalino ni Karikɛmisi duguw minɛ, ka Amati ni Aripadi duguw minɛ, ka Samari ani Damasi fana minɛ.

¹⁰N'an sera ka josɔnjamanaw minɛ, minw ka joow ka ca ni Zeruzalɛmu ni Samari taw ye,

¹¹an ye fɛɛn min kɛ Samari dugu n'a ka joow la, i ko an tena o ɲɔgɔn kɛ Zeruzalɛmu n'a taw la fana wa?»

¹²Nga, ni Matigi tilar'a ka kokɛtaw bɛɛ la tuma min na *Siyɔn kulu kan ani Zeruzalɛmu kɔnɔ, a bena wili Asiri masacɛ kama, a ka yɛrɛboɲakojugu kosɔn.

¹³Bari, a y'a fɔ ko: «Ne ye koo nin kɛ n yɛrɛ barika la, ni n ka lɔnniya ye, bari hakili be n fɛ. Daan minw tun be siyaw ni ɲɔgɔn cɛ, n y'o bɔ yen. Ne benna u kan. Ne ye masaw jigi ka bɔ u ka masasigilanw kan i ko cɛfari.

¹⁴Mɔgɔ be kɔnɔfan bɔ cogo min na a ɲaga kɔnɔ, o cogo kelen na, ne ye siyaw ka nafolow minɛ. Mɔgɔ be faan cɛ cogo min na a tigi kɔ, o cogo kelen na, ne ye dugukolo kan fɛɛnw cɛ. Hali gaman si ma magamaga yɛrɛ, fɛɛn si ma se k'a daa yɛlɛ, walima ka kasi.»

¹⁵Jende be se k'a yɛrɛ wanso a minɛbaga ɲakɔrɔ wa? Kakanan be se k'a yɛrɛ boɲa a minɛbaga ɲakɔrɔ wa? A be i ko bere, walima dakun le b'a minɛbaga kɔrɔta.

¹⁶O kama, Matigi, Masaba, Setigi ben'a to o tigi ka mɔgɔ kolokunbaw be fasa. A bena tasuma don a kunkɔrɔtafɛnw la, u bena mana ka kɛ tasumaba ye.

¹⁷Isirayɛli ka yeelen bena kɛ i ko tasuma, Isirayɛli ka Ala bena kɛ tasuma ye, ka ŋɔniw jɛni loon kelen.

¹⁸U ka tuu ɲanamanw n'u ka yiriforow bena jɛni ka ban pewu. U bena kɛ i ko banabagatɔ minw be fasara.

¹⁹Tukɔnɔyiri tɔɔ minw bena to, o bena dɔgɔya fɔɔ denmisɛn yɛrɛ bena se k'u jati k'a daa lɔn.

²⁰Loon dɔ bena se, Isirayɛlidenw tɔɔ, minw sera ka kisi, olu tena u jigi la u bugɔbaga kan tugu. U bena u jigi la Masaba le kan sɔbɛ la, ale min ye Isirayɛli ka Ala ye.

²¹U tɔɔ bena kɔsegi, Isirayɛlidenw tɔɔ bena kɔsegi Ala Fangatigi ma.

²² Isirayɛli jama, hali n'aw ka ca i ko kɔgɔjida la cɛncɛn, aw tɔɔ dama le bena kɔsegi. Halakili latigɛra, o ben'a kɛ tilenninya be taga ɲa kosɔbɛ.

²³O halakili nin ŋaniyara cogo min na, Matigi, Masaba, Setigi ben'a kɛ o cogo la jamana kɔnɔ yɔrɔ bɛɛ la.

²⁴O kama, Matigi, Masaba, Setigi ko: «Ne ka jama min be *Siyɔn kɔnɔ, aw kana siran Asirikaw ɲa! Olu minw b'aw bugɔra ni berew ye, U b'aw gosira n'u ka dakun ye, i ko Ezipitikaw tun y'a kɛ cogo min na.

²⁵Yanni dɔɔni, dɔɔni dɔrɔn, ne dusu bena suma aw kɔrɔ. N bena yɛlɛma ka dimi u kɔrɔ k'u halaki.»

²⁶Masaba, Setigi bena busan ta u kama, i ko a y'a kɛ madiyanw na cogo min na Orɛbu kabakuru kɔrɔ. A ben'a ka bere kɔrɔta kɔgɔji sanfɛ i ko a y'a kɔrɔta Ezipiti kama cogo min na.

²⁷O loon na, u ka doni min b'i gaman kan, o bena bɔ yen. U ye sɛgɛn min la i kan, a ben'o ban ka bɔ yen.

²⁸Juguw sera Ayati, u be Migurɔn cɛɛ tigɛra, u bena u ka minan dɔw bila Mikimasi.

²⁹U be tɛmɛna kuluw furancɛ la. U ko u be si Gibeya. Aramakaw be yɛrɛyɛrɛla, Sayuli ka dugu Gibeyakaw be bolila.

³⁰Batigalimukaw ka kule! Layisakaw, a y'aw tulo malɔ!

³¹Anatɔtikaw bɔnɔna! Madimenakaw be boli k'u yɛrɛ ɲini! Gebimukaw be bolila!

³²Juguw sera Nɔbi o loon kelen bɛɛ la! U y'u bolo kɔrɔta ka *Siyɔnkaw bagabaga, Zeruzalɛmukaw.

³³Matigi, Masaba, Setigi be yiribolow caronna ni barika ye! Yirijanjanw be tigɛra. Yiri minw ka jan kosɔbɛ, olu be tigɛra ka ben!

³⁴A be tuu kɔnɔ yiriw jigira ni jende ye. Barikatigi be Liban sɛdiriyiriw fatara duguma!