Read dyu Ezayi ka kitabu 13 Bible Online

Ezayi ka kitabu 13 - dyu bible

Ezayi ka kitabu 13

¹ Kirayakuma min yirala Amɔsi dencɛ Ezayi la ka sin Babilɔni ma, o filɛ.

²Aw ka taamasiɲɛ dɔ tutu kululakolon sanfɛ. Aw ka pɛrɛn k'aw bolo kɛ ka kɛlɛdenw wele, janko u ka don mɔgɔbabaw ka dondaw fɛ.

³Ne ye sira di n ka mɔgɔw ma, ne ye n ka cɛfariw wele, ne dimi bɔbagaw, ne ka kunkɔrɔta be minw nisɔndiya.

⁴Aw k'aw tulo malɔ mankan na kuluw kan, a bɔnin be jamaba mankan fɛ dɛ! A y'aw tulo malɔ masaw ka mɔgɔw mankan na, siyaw be ɲɔgɔn lajɛnna. Masaba, Setigi b'a ka kɛlɛdenw lajɛn na k'u filɛ, minw bena taga kɛlɛ la.

⁵U be nana ka bɔ jamanajan na fɔɔ diɲɛ daan na. Masaba n'a ka dimi bɔbagaw be na jamana nin bɛɛ halaki.

⁶ Aw ka sangakasi kɛ! Masaba ka loon surunyana, halakili be nana ka bɔ Setigi fɛ.

⁷O kama, bɛɛ fari fagara, mɔgɔ bɛɛ jaa tigɛra.

⁸Siranya y'u minɛ, sɛgɛn ni tɔɔrɔ b'u kan. U b'u yɛrɛ tɔrɔmina i ko muso tintɔ. U kabakoyanin be ɲɔgɔn filɛra, u ɲaa wulenna i ko tasuma.

⁹Masaba ka loon setɔ filɛ nin ye, lonjugu, a ka fariya loon, a ka dimi b'a daan na loon min. A bena jamana kɛ yɔrɔlakolon ye k'a kɔnɔ kojugukɛlaw halaki.

¹⁰ Lolow tena manamana, tile ɲaa bena fin a bɔtɔ yɛrɛ, Kalo yeelen tena bɔ.

¹¹Masaba ko: «Ne bena diɲɛ mɔgɔw ɲaa gwan u ka juguya kosɔn, ka mɔgɔjuguw ɲaa gwan u ka kojuguw kosɔn. Ne bena yɛrɛboɲalaw ni cɛfariw ka yɛrɛboɲa daa faga.

¹²Adamadenw yeko bena gwɛlɛya. Ka tɛmɛ sanu yɛrɛ yɛrɛ yeko kan.

¹³Tiɲɛ na, ne bena sankolo wurubata, dugukolo bena yɛrɛyɛrɛ a sigiyɔrɔ la, ne Masaba, Setigi dimikojugu kosɔn, ne ka loon na.

¹⁴U be minan min gwɛnna, ale be boli cogo min na, dɛndɛbaga te saga minw na, olu be cogo min na, bɛɛ bena boli k'u ka siya yɔrɔ ɲini ten. Bɛɛ bena girin k'a faso sɛgɛrɛ.

¹⁵U mana mɔgɔ o mɔgɔ sɔrɔ, o tigi be sɔgɔ ni biɲɛ ye. U mana min minɛ, o tigi be faga ni murujan ye.

¹⁶U bena u ka denɲɛninw ɲɔɲɔ k'u faga u ɲana. U bena u ka soow fon, ka fanga la u musow kan.

¹⁷Ne bena mɛdiw kɔnɔnasu k'u bila u la. Olu mako te warigwɛ la, sanu fana te foyi y'u fɛ.

¹⁸U ka kala bena kanbelenw halaki. U tena hinɛ denɲɛninw la, u tena makari denmisɛnw la.

¹⁹ Babilɔni min kɛra jamanaw bɛɛ la ɲanaman ye, Babilɔnikaw ka kunkɔrɔtafɛn, Ala bin'o halaki i ko Sodɔmu ni Gɔmɔri.

²⁰Mɔgɔw tena sigi yen tugu fewu, a lakolon bena to kudayi. Hali arabuw yɛrɛ tena u ka buguw lɔ yen, begɛndɛndɛbagaw tena lafiɲɛ yen n'u ka begɛnw ye.

²¹ Kongofɛnw bena kɛ yen, ginginw bena soow fa. A bena kɛ kɔnɔsogolonw ka yɔrɔ ye, bakɔrɔninw bena panpan yen.

²²Surukuw bena to ka kasi u ka soɲumanw kɔnɔ, kongowuluw bena to ka kasi u ka masasoɲumanw kɔnɔ. A ka loon surunyana. Dɔ tena faria a ka loon jaɲa kan.»