Read dyu Ezayi ka kitabu 14 Bible Online

Ezayi ka kitabu 14 - dyu bible

Ezayi ka kitabu 14

¹Masaba bena makari Isirayɛlidenw la. A bena u ɲanatɔmɔ tugu k'u sigi u ka dugukolo kan. Lonanw bena fara u kan ka jɛn n'u ye.

²Siya dɔw bena u kunbɛn ka taga n'u ye u faso la. U bena kɛ u ka jɔɔnw ye, cɛɛ fara muso kan, Masaba ka dugukolo kan. Mɔgɔ minw tun y'u minɛ, u bena olu minɛ k'u bila u fɛ. Mɔgɔ minw tun y'u tɔɔrɔ, u bena tila ka kɛ olu kuntigiw ye.

³Isirayɛli jama, aw ka sɛgɛnw tɛmɛnin kɔ, aw ka tɔɔrɔw n'aw ka baaragwɛlɛnw tɛmɛnin kɔ, Masaba bena lafiɲɛ d'aw ma loon min na,

⁴aw bena Babilɔni masacɛ lɔgɔbɔ ni dɔnkili ye ko: Mɔgɔtɔɔrɔla nin ka koo labanna ten wa? A ka yɛrɛboɲa banna ten kɛ?

⁵Masaba ye mɔgɔjuguw ka fanga cɛn, a ye ɲamɔgɔw ka masabere kari.

⁶U dimininba tun be siyaw bugɔ, hali lafiɲɛ t'a la. U tun b'u mara ni fariya ye, u tun b'u tɔɔrɔ, daan te tɔɔrɔ min na.

⁷Dugukolo yɔrɔ bɛɛ be lafiya la bii, nisɔndiya mankan le be bɔra.

⁸Hali sipɛrɛyiriw be nisɔndiyara i kosɔn. Liban yiribabaw b'a fɔra ko: «Kabin'i benna, mɔgɔ si te nan'an tigɛ tugu.»

⁹Labɛnni be kɛra lahara kɔnɔ ka ele masacɛ kunbɛn. Mɔgɔba minw bɛɛ sara i ɲa, a b'olu kununna. Siyaw ka masa minw siginin be u ka masasigilanw kan, a b'a kɛ olu bɛɛ bɛ wili ka lɔ.

¹⁰U bɛɛ ben'a fɔ i ye ko: «A filɛ, e fana barika banna i ko anw. An kɛra kelen ye.»

¹¹I ka boɲa bɛɛ barila ka tunu lahara, n'i ka gɔniw kaan ye. I layɔrɔ ye fɛɛn tolinin ye, i ka birifani ye tumuw ye.

¹² Dugugwɛlolo, sɔgɔmada deen! A kɛra di e bɔra sankolo la ka ben? Ele min tun be siyaw nagasira! A kɛra di u y'i fili ka jigi duguma?

¹³ Ele min tun b'a fɔ ko: «Ne bena yɛlɛ ka taga sankolo la ka n ka masasigilan bila Ala ka lolow sanfɛ. Ne bena taga sigi kɔgɔdugu ɲafan kulu kan, sankololafɛnw b'u ka ɲɔgɔnye kɛ min kan.

¹⁴Ne bena yɛlɛ ka taga sankabaw sanfɛ, ne bena kɛ i ko Fɛɛn bɛɛ kuntigi Ala.»

¹⁵Nga i ɲotira ka jigi lahara, fɔɔ dingɛba jukɔrɔ!

¹⁶Mɔgɔ minw mana i ye, u bena i filɛ kosɔbɛ, k'i ka koo jati minɛ k'a fɔ ko: «Dugukolo tun be yɛrɛyɛrɛ cɛɛ min bolo, ale lo te nin ye wa? Min tun be jamanaw ɲagami, ale lo wa?

¹⁷Min tun be dugukolo kɛra lakolon ye, ka duguw ci, min tun t'a ka kasodenw labila fewu.»

¹⁸Siyaw ka masaw bɛɛ, u bɛɛ lara u ka kaburuw kɔnɔ ni boɲa ye.

¹⁹Nga ele kɔni filila kɛnɛma, i ma kaburu sɔrɔ, i ko deen min sanin wolola. I datugura ni suuw ye, murujan ye minw faga k'u fili kaburu farawo kan. I kɛra i ko suu, u ye min dɔn.

²⁰E ni olu tena fara ɲɔgɔn kan kaburu kɔnɔ. Bari e y'i ka jamana cɛn, e y'i ka mɔgɔw faga. Mɔgɔjuguw kɔni koo tena fɔ tugu fewu!

²¹Aw ka deenw fagako labɛn u faaw ka kojuguw kosɔn, waasa u kana wili ka dugukolo minɛ, u kana diɲɛ yɔrɔ bɛɛ kɛ duguw ye.

²²Masaba, Setigi ko: «Ne bena wili u kama. Ne bena Babilɔni tɔgɔ tunu ka bɔ yen! A ka mɔgɔ tɔɔ minw tora, ne bena olu tunu ka bɔ yen!

²³Ne ben'a kɛ juguninw ka yɔrɔ ye, ne ben'a kɛ jii lɔyɔrɔ ye. Ne bena Babilɔni fiyɛ ni fariya ye, a be tunu pewu!» Masaba, Setigi le ko ten!

²⁴ Masaba, Setigi ye nin kuma nin fɔ k'a gwɛlɛya ko: «Ne ye koo min latigɛ, o bena kɛ wajibi. Ne ye koo min ŋaniya ta, o bena kɛ le.

²⁵Ne bena Asirikaw halaki n ka jamana kɔnɔ, ne bena u dɔn n ka kuluw kan. U tun be ne ka jama min sigɛnna, ne bena olu ka sɛgɛn ban.»

²⁶O le kɛra ŋaniya tanin ye dugukolo yɔrɔ bɛɛ kama. A bolo wilinin lo siyaw bɛɛ kama.

²⁷Ni Masaba, Setigi y'a latigɛ ka koo min kɛ, jɔn be se k'o bali? A diminin lo, jɔn be se k'o bali?

²⁸ Masacɛ Akazi sara saan min na, kirayakuma nunu fɔra o waati la ko:

²⁹ Filisiw bɛɛ, aw kana nisɔndiya ko aw gosibere karila dɛ! Bari saatutu bena bɔ sasu kɔnɔ, sogojugu kabakoman fana bena bɔ saatutu nin kɔnɔ.

³⁰Fantanw bena dumuni sɔrɔ, dɛsɛbagatɔw bena sigi hɛrɛ la. Ne ben'a to aw ka mɔgɔw be sa kɔngɔ bolo, aw tɔɔ min bena to, o bena faga.

³¹Dugu donda koon ka ŋunan! Dugu ka kasi! Filisiw bɛɛ jaa tigɛra! Bari, sisi dɔ be bɔra kɔgɔdugu ɲafan fɛ ka na. Mɔgɔ si ma to kɔ u ka jɛnkulu nin na.

³²Ka jaabili jumɛn di o siya nin ka cidenw ma? Ko Masaba le ye *Siyɔn sigi. Ko a ka dɛsɛbagatɔw be hɛrɛ la.