Read dyu Ezayi ka kitabu 16 Bible Online

Ezayi ka kitabu 16 - dyu bible

Ezayi ka kitabu 16

¹Aw ka masacɛ boɲa ni sagadenw ye ka bɔ Sɛla, ka tɛmɛ kongokolon kɔnɔ, ka taga u di *Siyɔn kulu kan.

²Mowabumusow be Arinɔn kɔda la i ko kɔnɔnin min gwɛnna ka bɔ a ɲaga kɔnɔ.

³Mowabuw ko: «Zeruzalɛmukaw, aw k'an ladi, aw ka bɛn koo kelen na. Tilegwangwanfɛ, aw ka kɛ suma ye k'an ka bolibagaw sutara. Aw ka kɛ sufɛla ye u fɛ. Aw kan'a to an ka bolibagaw be ye.

⁴Aw k'a to an mowabuw ka bolibagatɔw ka sigi aw fɛ, aw k'u tanga cɛnnikɛla nin ma. Ni tɔɔrɔ tɛmɛna, ni cɛnni banna, jamana halakibaga ka bɔ jamana na,

⁵i ka ɲumanya barika la, Dawuda kɔmɔgɔ bena masasigilan sɔrɔ, sigilan nin be barika sɔrɔ ka mɛn fana. A bena kiti tigɛ ni tilenninya ye, tilenninya bena kɛ a ka jɔɔrɔnako ye.»

⁶Yɛrɛboɲa min be mowabuw la, an y'o mɛn. An y'u jamako mɛn, n'u ka yɛrɛboɲakojugu, n'u ka dabayako.

⁷Sisan mowabuw be kasira u ka jamana yɛrɛ koo la, u bɛɛ le be kasira. U dusu kasininba be ŋunuŋununa Kiriyarɛsɛti tomo koo la.

⁸Bari, Ɛsibɔn forow be jara, Sibima *ɛrɛzɛnsunw fana be jara. Ale min jii tun be siyaw ka ɲamɔgɔw ɲanamini. Ɛrɛzɛnsunw tun be yen fɔɔ ka se Yazɛri, fɔɔ kongokolon kɔnɔ. U bolow tun be taga fɔɔ kɔgɔji kɔfɛ.

⁹Sisan, ne bena kasi ni Yazɛrikaw ye Sibima ɛrɛzɛnsunw koo la. Ne bena n ɲaji kɛ k'aw Ɛsibɔn ni Eleyale duguw ɲigi! Bari, kɛlɛdenw kulekan be bɔra aw ka ɛrɛzɛnforow, n'aw ka sumanw kama.

¹⁰Nisɔndiya ni ɲanagwɛ dabilara yiriforow kɔnɔ. Ɛrɛzɛnforow kɔnɔ, dɔnkili te mɛnna tugu, ɲanagwɛ te yen. Duvɛn te dagaw kɔnɔ tugu, baarakɛlaw te ɛrɛzɛnji bɔyɔrɔ la tugu, nisɔndiyakan dabilara.

¹¹Ne dusu bɛɛ cɛnnin lo mowabuw koo la, ne dusu kasinin lo Kiriyarɛsɛtikaw koo la.

¹²Mowabuw b'u yɛrɛ sɛgɛn ka yɛlɛ u ka sɔnnikɛyɔrɔ la. U be taga u ka jobon la k'u ka joo daali, nga o tena foyi ɲa u ye.

¹³Masaba tun y'a fɔ ten kabini waatijan!

¹⁴Sisan, Masaba ko: «Yanni saan saba, saan saba dafanin, mowabuw ka mɔgɔŋanaw n'u ka jamaba tena kɛ bɛrɛ ye. U tɔɔ jatinin tena kɛ foyi ye. U tena barika sɔrɔ.»