Read dyu Ezayi ka kitabu 21 Bible Online

Ezayi ka kitabu 21 - dyu bible

Ezayi ka kitabu 21

¹Kirayakuma min sinna kɔgɔjida la kongokolon ma: O be i ko fununfunun min be tɛmɛ worodugu ɲafan mara la, jugu nacogo lo ka bɔ kongokolon kɔnɔ, a nacogo lo ka bɔ jamanajugu la.

²Kojugu dɔ taamasiɲɛ yirala ne la. Janfaci be janfa kɛ, cɛnnikɛla be cɛnni kɛ! Elamu jamana, wili! Mɛdiw, aw ye taga dugu datugu! U ye sɛgɛn minw bɛɛ dabɔ, ne bena u ban.

³O le y'a to, ne sɔrɔn be dimina haali, ne tɔɔrɔnin be i ko muso tintɔ! Ne ye min mɛn, o ye n hakili ɲagami. Ne ye min ye, o ye ne siran.

⁴Ne jigi tigɛra, siranya be ne yɛrɛyɛrɛla! Ne tun be wulada fɔɲɔ diman min kɔnɔna, o yɛlɛmana ka kɛ siranyafɛn ye ne fɛ!

⁵Dumunikɛyɔrɔ be labɛnna! Sigiyɔrɔw be bilara! Dumuni be kɛra, minni be kɛra! Kɛlɛkuntigiw, aw ye wili! Aw ye tulu mɔ aw ka nigɛkunbɛnnanw kan!

⁶Bari, Matigi y'a fɔ ne ye ko: «Taga kɔlɔsilikɛbaga sigi. N'a ye min ye, a k'o fɔ!

⁷N'a ye kɛlɛkɛwotorow ye ni soo fila fila b'u samana, n'a ye mɔgɔ ye fali kan, n'a ye mɔgɔ ye ɲɔgɔmɛ kan, a ka kɔlɔsili kɛ, a ka jatiminɛ kɛ kosɔbɛ!»

⁸Kɔlɔsilikɛbaga nin kulera ko: «Ne matigi, ne lɔnin tora n ka kɔlɔsilikɛyɔrɔ la tile kuturu bɛɛ la! Ne lɔnin tora n ka filɛlikɛyɔrɔ la suu bɛɛ la!»

⁹ Haya! Cɛɛ dɔ natɔ ye kɛlɛkɛwotoro kan, soo fila le b'a samana! A ko: «Babilɔni benna! Babilɔni benna! U ka joow bɛɛ mugumugura!»

¹⁰Ne ka mɔgɔw, Masaba ye aw minw bugɔ i ko suman, a ka gwenege la, ne ye koo min mɛn Masaba fɛ, Setigi, Isirayɛli ka Ala fɛ. Ne y'o fɔ aw ye.

¹¹Kirayakuma min sinna Duma ma. Dɔ kumana ne fɛ k'a to *Seyiri mara la ko: «Kɔlɔsilikɛbaga, suu janfara wa? Suu janfara wa?»

¹²Kɔlɔsilikɛbaga y'a jaabi ko: «Dugu be gwɛra, suu fana be kora tugu! N'aw b'a fɛ ka ɲiningali kɛ tugu, aw ka kɔsegi ka na.»

¹³Kirayakuma min sinna Arabu jamana ma. Dedan ɲɔgɔmɛtigi tɛmɛbagaw, aw bena si tuu kɔnɔ Arabu jamana la.

¹⁴Aw ye jii ta ka taga minnɔgɔtɔw kunbɛn. Temakaw, aw ye taga bolibagaw kunbɛn ni dumuni ye.

¹⁵Bari u be bolila murujan ɲa, murujan min bɔr'a foroko la. U be bolila kala labɛnnin ɲa, u be bolila kɛlɛ boɲa ɲa.

¹⁶Matigi ye min fɔ ne ye, o filɛ ko: «Yanni saan kelen, saan kelen dafanin, Kedari ka boɲa bɛɛ bena ban!

¹⁷Kedari kalabonlaŋanaw tɔɔ bɛrɛ te na to.» Masaba, Isirayɛli ka Ala le ko ten.