Read dyu Ezayi ka kitabu 23 Bible Online

Ezayi ka kitabu 23 - dyu bible

Ezayi ka kitabu 23

¹ Kirayakuma min sinna Tiri ma. Kurunbabaw kɔnɔ mɔgɔw, aw ye kasi kosɔbɛ dɛ! Bari, Tiri dugu cira! A boonw n'a ka kurun lɔyɔrɔ kɛra tomo ye. Aw bɔtɔ Sipɔrɔ, aw y'o kibaruya mɛn.

²Kɔgɔjida la mara mɔgɔw, aw Sidɔn jagokɛlaw, aw minw ka cidenw be yaalayaala kɔgɔji kan, aw ka je, fɔta kana sɔrɔ aw fɛ.

³Suman min sɔrɔla bajida la, suman min be sɔrɔ Nili bada la, u tun be tɛmɛ ni min ye jiba kan, o tun ye Sidɔnkaw ta ye. Sidɔn kɛra siyaw ka lɔgɔdugu ye.

⁴Maloya ye aw Sidɔnkaw ta ye! Dugu min ye dugu barikaman ye kɔgɔjida la. Bari kɔgɔji ko: «Ne ma deen wolo ka ye, ne m'a sɛgɛn lɔn. Ne ma dencɛw lamɔ ka ye, ne ma denmusow kolo ka ye.»

⁵N'o kibaruya sera Ezipiti jamana la, n'u ye Tiri kibaruya mɛn, u bena yɛrɛyɛrɛ.

⁶Kɔgɔjida la dugu mɔgɔw, aw ka kɔgɔji tigɛ ka se Tarisisi, aw ka kasi kosɔbɛ.

⁷Ebe! Aw ka dugu diman nin le kɛra ten wa? Ale min tun be yen kabini fɔlɔfɔlɔ, n'a mɔgɔw tagara duguw sigi fɔɔ ka se yɔrɔjan, ale lo wa?

⁸Tiri tun ye dugu ye min be masafugulanw di, min kɔnɔ feerekɛlaw tun be jati faamaw ye. A kɔnɔ jagokɛlaw tun be jati dugukolo kan mɔgɔbabaw ye. Jɔn le ye koo nin latigɛ Tiri kama ten?

⁹Masaba, Setigi le y'a latigɛ ten, waasa u be mɔgɔ minw bɛɛ boɲa, olu ka kunkɔrɔta ka cɛn, ka dɔgɔya se dugukolo kan mɔgɔbabaw bɛɛ ma.

¹⁰Tarasikaw, aw k'aw ka forow sɛnɛ i ko aw tun b'a kɛ cogo min na Nili bada la. Bari, kurun lɔyɔrɔ te yen tugu.

¹¹Masaba y'a bolo kɔrɔta kɔgɔji sanfɛ, a ye siranyaba bila jamanaw la. A ko Kanaankaw [1] k'u ka dugu barikamanw ci.

¹²A y'a fɔ ko: «Sidɔnkaw, aw ka nisɔndiya banna! Aw kɛra i ko u ye fanga la sunguru min kan ka la n'a ye. Hali n'aw wilila ka kɔgɔji tigɛ ka taga Sipɔrɔ jamana la, aw tena lafiɲɛ yen.»

¹³Sipɔrɔ jamana filɛ kɛ, mɔgɔw t'a kɔnɔ tugu. Asirikaw tun y'a kɛ kurun lɔyɔrɔ ye, nga u ye sangasow lɔ a kɛlɛ kama, k'a ka masasow ci k'a kɛ tomo ye.

¹⁴Kurunbabaw kɔnɔ mɔgɔw, aw ye kasi kosɔbɛ dɛ! Bari aw ka dugu barikaman cira.

¹⁵O loon na, u bena ɲinɛ Tiri kɔ fɔɔ saan bi wolonwula. O ye masacɛ sii ye. Saan bi wolonwula tɛmɛnin kɔ, kakalamuso ka koo ɲɔgɔn bena kɛ Tiri la, i ko a be fɔ kakalamuso lɔgɔbɔdɔnkili la cogo min na ko:

¹⁶«Kakalamuso, mɔgɔw ɲinɛna e min kɔ, wili ka gɔni ta ka dugu yaala. K'a fɔ ka ɲa, ka dɔnkili caaman la janko u hakili ka jigi e kɔ.»

¹⁷Saan bi wolonwula mana tɛmɛ, Masaba ben'a to Tiri be kɔsegi a cogokɔrɔ la. Jamana minw bɛɛ be dugukolo kan, a bena kakalaya kɛ n'olu ye wari kosɔn.

¹⁸Nga, a bena fɛɛn minw sɔrɔ o kakalaya la, o bena kɛ Masaba ta ye. O tena cɛ k'a ton ɲɔgɔn kan, a tena mara. Mɔgɔ minw be baara kɛ Masaba ɲakɔrɔ, a bena kɛ olu ka balo ye, k'u wasa, ani ka faniɲumanw sɔrɔ u ye.