Read dyu Ezayi ka kitabu 27 Bible Online

Ezayi ka kitabu 27 - dyu bible

Ezayi ka kitabu 27

¹ O loon na, Masaba ben'a ka murujan belebeleba dadiman ta Leviyatan kama, sajugu min be tɔrɔmitɔrɔmi, mɔgɔ te se ka min minɛ. A bena o sogojugu nin faga, min be kɔgɔji la.

²O loon na, aw ka dɔnkili la ka *ɛrɛzɛnforo tanu, duvɛn diman be bɔ min la.

³«Ne Masaba yɛrɛ le ye a kɔlɔsibaga ye, n be to k'a sɔn jii la. Ne b'a kɔlɔsi suu ni tile janko mɔgɔ si kan'a cɛn.

⁴Ne diminin te tugu. Nga ni ne ye ŋɔniw ye, n be wili olu kama, k'u bɛɛ jɛni ɲɔgɔn fɛ.

⁵Fɔɔ ni u y'u yɛrɛ kalifa ne ma, fɔɔ u ka bɛn ni ne ye. An ka bɛn.»

⁶Waati dɔ bena se, Isirayɛlidenw bena lili sɔrɔ, u bena nugu ka feeren kɛ. U deenw bena diɲɛ bɛɛ fa.

⁷Masaba y'a ka jama ɲaa gwan i ko a y'u juguw ɲaa gwan cogo min na wa? A y'olu halaki u halakicogo la wa?

⁸A y'u kiti, k'u gwɛn. A dalafɔɲɔ barikaman y'u ta i ko fɔɲɔ, ka bɔ kɔrɔn fɛ.

⁹A kɛra ten, Isirayɛlidenw ka kojugu bɛɛ bena yafa u ma. U ka hakɛw yafako bena na ni fɛɛn min ye, o filɛ: U bena sɔnnikɛyɔrɔw kabakuruw bɛɛ mugumugu i ko u be bɔgɔgwɛ kɛ cogo min na. *Asera jaa si tutunin tena ye tugu, wusulan jɛniyɔrɔ si tena to yen.

¹⁰Dugu barikaman lakolon bena to, a labilanin bena to. A bena kɛ yɔrɔlakolon ye i ko kongokolon. Misidenw bena to ka na dumuni kɛ yen, u bena la yen, ka wili ka yirifuraburuw ɲimi.

¹¹Ni yiribolo jara, u b'o kari, musow be na tasuma don u la. Tiɲɛ na, siya nin te foyi lɔn. O kama, u Danbaga te makarila u la, u Danbaga t'u dɛmɛna tugu.

¹²O loon na, Masaba bena dugukolo yuguyugu k'a ta Efarati bada la ka n'a bila Ezipiti kɔda la. A bena aw Isirayɛlidenw tɔmɔ yen kelen kelen.

¹³O loon na, buruba bena fiyɛ. Minw tununin tun be Asiri jamana la, olu bena na, ani minw tun gwɛnna ka taga Ezipiti jamana la, u bena na u kunbiri gwan Masaba ɲakɔrɔ kulu senuman kan, Zeruzalɛmu kɔnɔ.