Read dyu Ezayi ka kitabu 29 Bible Online

Ezayi ka kitabu 29 - dyu bible

Ezayi ka kitabu 29

¹Bɔnɛ ye Ayirɛli ta ye, Dawuda tun tagara dugu min kama. Hali n'aw ye saan kɔnɔ ɲanagwɛw kɛ, saan o saan,

²ne Masaba bena wili Ariyɛli dugu kama. Kasikanw bena caya yen! Joli bena caya yen i ko sarakabɔyɔrɔ la.

³Ne bena na i kama, k'i koori: ne bena kɛlɛkɛyɔrɔw lɔ i kama, k'i lamini, k'i datugu.

⁴I benko bena juguya fɔɔ i kumakan tena mɛn ɲanaman tugu. A bena kɛ i ko a be bɔra fɔɔ dugukolo jukɔrɔ, i ko ŋunuŋunukan, buguri cɛma, i ko suja kumakan.

⁵I jugu caaman nunu bena kɛ i ko buguri. Mɔgɔ fariman nunu n'u caya bɛɛ, u bena kɛ i ko fɔɲɔ be sumanbugu ta cogo min na. Yɔrɔnin kelen, ɲatugu ni ɲayɛlɛ cɛ,

⁶Masaba, Setigi bena i dɛmɛ, a bena na ni sanpɛrɛn ye, ni dugukolo yɛrɛyɛrɛ ye, ni mankanba ye, ni fununfunun ni fɔɲɔba ye, ani tasumaba ye.

⁷Siya caaman minw tun be Ariyɛli kɛlɛla, mɔgɔ minw bɛɛ tun wilil'a kama, k'a kɛlɛ, k'a tɔɔrɔ, o bena kɛ i ko siko, o bena kɛ i ko sufɛ yelifɛn.

⁸O bena kɛ i ko kɔngɔtɔ min be sikora ko a be dumuni kɛra. Nga a mana kunun, a kɔnɔ lakolon lo. Walima minnɔgɔtɔ min be sikora ko a be jii minna. Nga a mana kunun, a kankɔrɔla janin lo, a fanga dɛsɛnin be. Siya caaman minw bɛɛ be *Siyɔn kulu kɛlɛla, olu bɛɛ ka koo bena kɛ ten.

⁹Aw ka kabakoya haali, fɔɔ aw dabari be ban. Aw ɲaa ka fiyɛn, aw kana yeli kɛ tugu. Aw ka dɔrɔtɔya kɛ, nga o kana kɛ duvɛn nɔɔ ye. Aw ka talontalon, nga o kana kɛ minnifɛn nɔɔ ye.

¹⁰ Bari, Masaba y'aw kɛ hakilitanw ye. A ye aw kiraw ɲaa tugu, ka yelikɛlaw ɲaa fin.

¹¹O koo nunu bɛɛ yirali kɛra aw fɛ i n'a fɔ sɛbɛ datugunin ka nɔrɔ, n'u y'a di sɛbɛlɔnbaga dɔ ma ko a k'a kalan. Ale b'u jaabi ko: «N te se k'a kalan! Bari, a datugunin lo ka nɔrɔ.»

¹²U b'a di sɛbɛlɔnbali dɔ ma k'a fɔ a ye ko: «Nin kalan.» Ale b'u jaabi ko: «N te se sɛbɛkalan na.»

¹³ Matigi ko: «Mɔgɔ nunu be ne boɲa u daa la dɔrɔn, nga u dusu yɔrɔ ka jan ne la. U be min kɛ k'u be siran ne ɲa, o ye adamadenw ka landa dama le ye. O ye kodegeta le ye.

¹⁴ O kama, ne bena taga ɲa ka kabakokow kɛ ka yira u la. Lɔnnikɛlaw ka lɔnni bena dɛsɛ, hakilitigiw ka hakilitigiya bena cɛn.»

¹⁵Mɔgɔ minw b'u ka koow kɛ dogo la, k'u ka kolatigɛninw dogo Masaba la, bɔnɛ ye u ta ye! O b'u ka dibidibikow kɛ k'a fɔ ko: «Jɔn ɲaa b'an na? Jɔn le b'an kɔlɔsira?»

¹⁶ Iye! Nin ye mun koɲagami ye? K'a fɔ ko dagadilanbaga ye bɔgɔmana ye! Fɛɛn dilannin be se k'a fɔ a dilanbaga ye ko: «E ma ne dilan» wa? Daga be se k'a fɔ dagadilanbaga ye ko: «I te foyi lɔn» wa?

¹⁷Yanni dɔɔni, dɔɔni dɔrɔn, Liban tuu bena yɛlɛma ka kɛ yiriforo ye, yiriforo be kɛ tuu ye.

¹⁸O loon na, tulogwerenw bena sɛbɛ nin kɔnɔnakuma mɛn, fiɲɛntɔw bena bɔ dibi la, u ɲaa bena yeli kɛ.

¹⁹Mɔgɔmajigininw bena nisɔndiya Masaba barika la. Dɛsɛbagatɔw bena nisɔndiya Isirayɛli ka Ala barika la.

²⁰Bari, mɔgɔfariman tena kɛ yen tugu. Minw mako te Ala la, olu bena tunu. Minw bɛɛ ka miiriya be kojugu kan, olu bena halaki ka bɔ yen:

²¹minw be tiɲɛtigi jalaki, minw be jaan la kuma ɲafɔtuma kititigɛyɔrɔ la, k'a kɛ u be mɔgɔ jalakibali jalaki.

²²O kama, Masaba, min ye Ibrayima kunmabɔ, ale b'a fɔ Isirayɛlidenw ye ko: «Aw tena dɔgɔya sɔrɔ tugu, maloya tena aw sɔrɔ tugu.

²³Bari, ne bena deen minw di aw ma, ni aw y'o ye tuma min na, aw bena ne ka senumanya boɲa, aw ben'a lɔn ko ne ye Yakuba ka Ala senuman ye, aw bena yɛrɛyɛrɛ ne, Isirayɛli ka Ala ɲakɔrɔ.

²⁴Hakili te minw fɛ, olu bena hakili sɔrɔ. Minw be dajukɔrɔkumaw fɔ, olu bena sɔn kalan ma.»