Read dyu Ezayi ka kitabu 3 Bible Online

Ezayi ka kitabu 3 - dyu bible

Ezayi ka kitabu 3

¹Tiɲɛ na, Matigi, Masaba, Setigi bena Zeruzalɛmu ani Zuda mara ka dɛmɛsiraw bɛɛ datugu, ka dumuni ni jiminta ban.

²A bena cɛfariw ni kɛlɛdenw, kititigɛlaw ni kiraw, lagwɛlikɛlaw ani mɔgɔkɔrɔbaw tunu,

³ka kɛlɛkuntigiw ni mɔgɔbabaw, ladilikɛbagaw ni kirisifɔbagaw, ani subagaw fana tunu.

⁴Ne bena kanbelenninw kɛ u ɲamɔgɔw ye, denmisɛnw bena kuntigiya ta.

⁵Mɔgɔw bena ɲɔgɔn tɔɔrɔ, sigiɲɔgɔnw bena ɲɔgɔn tɔɔrɔ. Kanbelenw bena muruti mɔgɔkɔrɔbaw kunna, mɔgɔkolonw bena wili mɔgɔsɔbɛw kama.

⁶Dɔ ben'a balima minɛ u ka fadenyabolo la k'a fɔ ko: «Foroca b'i fɛ, kɛ an ɲamɔgɔ ye. Sigi tomo nunu kunna!»

⁷O tuma na, dɔ nin bena kule ko: «Ne te se ka foyi kɛ aw ye! Dumuni te n fɛ, fani te n fɛ, aw kana ne kɛ jama ɲamɔgɔ ye!»

⁸Zeruzalɛmu talonna, Zuda mara benna! U ka kuma n'u ka kɛwaliw te bɛɛn Masaba ma. U murutir'a ma.

⁹U ɲaa cogo yɛrɛ b'a yira. U ka kɛwalijuguw be kɛ kɛnɛ kan i ko Sodɔmukaw ta. U yɛrɛ t'a dogo. Bɔnɛ y'u ta ye! U be kojugu lasera u yɛrɛw le ma.

¹⁰Aw k'a fɔ ko mɔgɔtilennin dagamunin lo, bari a bena nisɔndiya a ka kɛwaliw tɔnɔ kɔnɔ.

¹¹Bɔnɛ ye mɔgɔjugu ta ye! Bɔnɛ y'a ta ye! Bari, a ka sara bena kɛɲɛ n'a ka kɛwaliw le ye.

¹²Ne ka jama ɲamɔgɔw ye denmisɛn farimanw ye. Musow le be jamanadenw mara. Ne ka jama! Aw ɲamɔgɔw b'aw la filila dɛ! U b'aw bilara sirajugu kan!

¹³Masaba wilila kiti kama. A lɔnin be ka jama kiti.

¹⁴Masaba b'a ka jama cɛkɔrɔbaw ni ɲamɔgɔw kitira ko: «Aw le ye *ɛrɛzɛnforo nin halaki. Dɛsɛbagatɔw bololafɛnw b'aw ka soo.

¹⁵Aw b'a la ka n ka jama halaki k'a la mun kan? Mun na aw be dɛsɛbagatɔw sigɛnna ten? Matigi, Masaba, Setigi le ko ten!»

¹⁶Masaba ko: «*Siyɔn musow b'u yɛrɛ boɲa, u taamatɔ b'u kaan samasama. U filɛlikɛcogo ye cɛɲinita ye, u b'u seenw la kelen kelen, u be to k'u sennanigɛw yuguyugu.

¹⁷Ne Masaba bena kaba bila Siyɔn musow kuun na. N bena u kuun gwana!»

¹⁸O loon na, Masaba bena u ka masirifɛnw bɔ u la: u sennanigɛw, n'u kunnajɔw, ni kɔnɔkisɛ minw be i n'a fɔ kalokura.

¹⁹Tulolanigɛw ni bololanigɛw, ani u be fani min biri u ɲada kan.

²⁰Musɔrɔw ni senna kɔnɔkisɛw ani cɛsirilanw, ni joow, ni sɛbɛndenw,

²¹ani bolokunnadennanigɛw, nunnataw,

²²ni ɲanagwɛfaniw, ani deleke gwansanw, lankannaw, ni waridonnanw,

²³ani dubalenw. Fani fiɲɛmanw, ni kunmelekefaniw, ani birifaniw.

²⁴Kasa goman bena kɛ kasa diman nɔɔ na. Jurukisɛ le bena bila cɛsirilan nɔɔ na. Kuun tena dan, a bena li le. Dusukasifani le bena kɛ aw ka dakamana fani nɔɔ na. Aw bena jɔnya ŋɔnɲɛ sɔrɔ aw ka cɛɲumanya nɔɔ na.

²⁵Zeruzalɛmu cɛɛw bena faga ni murujan ye, a ka cɛfariw bena to kɛlɛ la.

²⁶Kule ni kasimisɛnw le bena kɛ *Siyɔn dugu la. Dugu bena kɛ i ko muso min bɔnɔna fɛɛn bɛɛ la n'a siginin tora duguma!