Read dyu Ezayi ka kitabu 38 Bible Online

Ezayi ka kitabu 38 - dyu bible

Ezayi ka kitabu 38

¹O waati la, Ezekiyasi banana fɔɔ a tun be ɲini ka sa. Amɔsi dencɛ Ezayi, min tun ye kira ye, ale tagar'a fɛ k'a fɔ a ye ko: «Masaba ko e k'i ka soo kɔnɔ koɲaw ɲanabɔ, bari i bena sa, i tena kɛnɛya.»

²Ezekiyasi y'a ɲaa yɛlɛma kogo faan fɛ ka Masaba daali ko:

³«Masaba, e k'i hakili to a la ko ne taamana i ɲakɔrɔ kantigiya la ni kɔnɔgwɛ ye, ka koɲuman kɛ i ɲakɔrɔ.» A kasira kosɔbɛ.

⁴Ezayi bɔra ko a be taga. Nga k'a to kɔnɔnalu kɔnɔ, Masaba y'a fɔ a ye ko:

⁵«Kɔsegi ka taga fɔ Ezekiyasi ye ko ne Masaba, a bɛma Dawuda ka Ala y'a ka daalili mɛn, k'a ɲaji ye fana. Ko ne bena saan tan ni duuru fara a sii kan.

⁶Ne bena ale ni dugu nin kisi Asiri masacɛ ma. Ne bena dugu nin tanga.»

⁷Ezayi y'a fɔ Ezekiyasi ye ko: «Masaba bena koo min kɛ k'a yira i la ko a ka fɔta bena kɛ, o filɛ.

⁸Suma min jigira Akazi ka yɛlɛyɛlɛnan kan, ne ben'a to o be segi kɔfɛ yɛlɛyɛlɛnan seen lako ɲaa tan.» Suma tun jigira yɛlɛyɛlɛnan kan ka se seen lako ɲaa tan minw ma, a segira kɔfɛ ka bɔ olu kan.

⁹Zuda mara masacɛ Ezekiyasi ka dɔnkili filɛ nin ye, a ye min sɛbɛ a kɛnɛyanin kɔ ka bɔ a ka bana la. A ko:

¹⁰«Ne tun ko, ka ne kɛnɛkɛnɛ to hɛrɛ la, ne tun ka kan ka bɔ diɲɛ na ka taga to lahara.

¹¹Ko ne tena Masaba ye diɲɛ kɔnɔ tugu. Ne tena adamaden si ye nin diɲɛ kɔnɔ tugu.

¹²Ne nii bɔra ka taga yɔrɔjan, i ko sagadɛndɛbaga ka bugu yɔrɔ ka jan a la cogo min na. Ne sii kɛra i ko fanidanbaga b'a ka fani kɛ cogo min na a bantuma kwɛrɛ kɔnɔ, a b'a kuru ka sɔrɔ k'a jese tigɛ. Masaba, e tun bena tila ne ka koo la ni tile ma ben.

¹³Saya tun bena ne bɔsi ni dugu ma gwɛ. Masaba ye n kolow bɛɛ kari i ko jara, i tun bena tila ne ka koo la ni tile ma ben.

¹⁴Ne tun be kasi i ko naganaganin, ka kasi i ko tuganin. Ne tora ka filɛli kɛ sanfɛ fɔɔ n ɲaa dibira. Matigi, ne dɛsɛnin lo kojugu, na ne dɛmɛ!

¹⁵Ne be se ka mun fɔ sa, janko Ala ka ne jaabi? Bari ale lo ye nin koo kɛ. Ne te se ka sinɔgɔ n ka dusukasi kosɔn.

¹⁶Matigi, i b'i ka mɔgɔw kɔrɔ, u bena to nii la. I nii be barika don u la cogo bɛɛ la. I bena ne kɛnɛya, ka n to sii la.

¹⁷Ne ka dusukasiko yɛlɛmana ka kɛ hɛrɛ ye. N koo diyara i ye fɔɔ i ye ne kisi saya ma. I ye ne ka kojuguw bɛɛ bɔ ne kan k'u fili i kɔfɛ.

¹⁸Lahara mɔgɔw te se k'i tanu, suuw te se k'i boɲa. U ye mɔgɔ min la kaburu kɔnɔ, o te se k'a jigi la i ka kantigiya kan tugu.

¹⁹Mɔgɔ ɲanaman dama le be se k'i tanu, i ko ne b'a kɛra cogo min na bii. Faaw bena i ka kantigiya koo fɔ u deenw ye.

²⁰Masaba, i ye ne kisi minkɛ, an bena fɔli kɛ ka dɔnkili la i ye an sii bɛɛ la, e Masaba ka soo kɔnɔ.»

²¹Ezayi tun y'a fɔ k'u ka toro ta k'a labɛn k'a mɔn sumunin na, k'o la, masacɛ be kɛnɛya.

²²Ezekiyasi tun y'a ɲininga ko: «Taamasiɲɛ jumɛn ben'a yira ko ne bena se ka taga Masaba ka soo kɔnɔ tugu?»