Read dyu Ezayi ka kitabu 42 Bible Online

Ezayi ka kitabu 42 - dyu bible

Ezayi ka kitabu 42

¹ Masaba ko: «Ne ka baarakɛla filɛ nin ye, ne be min dɛmɛ, ne ye min woloma, ne be nisɔndiya min koo la. Ne ye n Nii don a la, a bena tilenninya sigi siyaw ye.

²A tena pɛrɛn, a ten'a kaan kɔrɔta, a kaan tena mɛn siraw kan.

³A tena buruku fɔnsɔnnin tigɛ, fitinɛ min be sisi bɔra, a tena o tɔɔ faga. A ben'a to tilenninya be bɔ kɛnɛ kan.

⁴A barika tena ban, a fari tena faga fɔɔ a ka tilenninya sigi dugukolo kan. Jii cɛma dugukolo kan mɔgɔw b'a ka sariya makɔnɔna.»

⁵Masa Ala min ye sankolo dan, k'a fɛnsɛn, ka dugukolo fɛnsɛn, ni fɛɛn bɛɛ be sɔrɔ a kan, ka ninakili di o fɛɛnw ma, ka nii don a yaalabagaw la, a ko:

⁶ «Ne Masaba le y'i wele tilenninya kama. Ne b'i bolo minɛ, ka janto i la waasa ka bɛɛn ni siyaw bɛɛ ye e barika la, k'i kɛ siyaw ka yeelen ye,

⁷ka fiɲɛntɔw ɲaa yɛlɛ, ka kasodenw bɔ kaso la, ka mɔgɔ datuguninw bɔ dibi la.

⁸Ne le ye Masaba ye, n tɔgɔ be ten le! Boɲa min ka kan ni ne ye, n ten'a to o be la mɔgɔ wɛrɛ kan. Tanuli min ka kan ni ne ye, n ten'a to o ka se joow ma.

⁹Koo minw ka kan ka kɛ fɔlɔ, olu kɛra ka ban. N bena dɔ wɛrɛw koo fɔ, aw k'u mɛn, sanni u ka kɛ.»

¹⁰Aw ka dɔnkilikura la Masaba ye, aw k'a tanu kabini diɲɛ daan na, aw minw be yaala jii kan, ni fɛɛn o fɛɛn b'a kɔnɔ, ani jii cɛma dugukolo kan mɔgɔw bɛɛ.

¹¹Aw ka dɔnkili la kongokolon kɔnɔ duguw la, kedariw siginin be yɔrɔ minw na. Farayɔrɔ mɔgɔw ka tandolikan bɔ, u ka nisɔndiyapɛrɛnkan bɔ kulu kan.

¹²Boɲa ka la Masaba kan, a ka tanu jii cɛma dugukolow kan.

¹³Masaba bena bɔ i ko cɛfari, a b'a yɛrɛ labɛnna kɛlɛ kama i ko kɛlɛden. A be pɛrɛn kɛlɛ daminɛ la, pɛrɛnkan fariman. A b'a ka cɛfariya yira a juguw la.

¹⁴Masaba ko: «Ne mɛnna ka koo kɛ, ne ma foyi fɔ, ne jenin tun lo. Nga sisan ne be ŋunanna i ko tintɔ, ne ninakili degunna.

¹⁵Ne bena kuluw ni tintinw halaki. Ne bena u kan biinw ni yiriw bɛɛ ja. Ne bena kɔbabaw kɛ dugukolo jalan ye. Ne bena lɛɛw ja!

¹⁶Ne bena fiɲɛntɔw bila sira kan, u te min lɔn. Ne bena sira don u seen kɔrɔ, u ma min ta ka ye. Ne bena dibi yɛlɛma u ɲafɛ k'a kɛ yeelen ye ka sira yɔrɔjuguw dakɛɲɛ u ɲafɛ. O le ye n ka laɲini ye, n ben'a kɛ fana. N ten'a dabila.

¹⁷Mɔgɔ minw b'u jigi la joow kan, olu bena to kɔ fɛ, u ta ye maloya ye, olu minw b'a fɔ jaa nigɛlamanw ma ko: ‹Aw le ye an ka batofɛnw ye!›

¹⁸«Aw tulogwerenw, aw ka mɛnni kɛ! Aw fiɲɛntɔw, aw ka yeli kɛ!

¹⁹Jɔn le ɲaa fiɲɛnnin lo ni ne ka baarakɛla tɛ? Jɔn tulo gwerennin lo i ko ne ka ciden ta? Jɔn le ɲaa fiɲɛnnin lo i ko ne ka ciden? Jɔn le ye tulogweren ye i ko ne Masaba ka baarakɛla?»

²⁰I ye koo caaman ye, nga e m'i janto u la. I tulo be mɛnni kɛ ɲanaman, nga foyi te don.

²¹Masaba ka tilenninya kosɔn, a diyar'a ye k'a yira ko barika b'ale ka sariya la, ko a ka ɲi kosɔbɛ.

²²Nga u benna siya nin kan, k'u bololafɛnw bɔsi. U bɛɛ minɛnin lo ka don kaso la, u minɛna ka datugu kasobonw kɔnɔ. U be ben u kan, bɔsibaga t'u la. U labilara benkannikɛlaw ye, hali mɔgɔ te yen min b'a fɔ ko: «Aw ye u segi ka di ne ma.»

²³Jɔn b'aw cɛma min ben'a janto nin kuma nin na? Jɔn bena mɛnni kɛ ka ɲa loon nataw la?

²⁴Jɔn le ye Isirayɛlidenw don benkannikɛlaw bolo? Jɔn y'u di cɛnnikɛlaw ma? Yala Masaba tɛ wa? An filila ale min ma. An tun ma sɔn ka tugu a kɔ, an ma sɔn k'an tulo malɔ a ka sariyaw la.

²⁵O la, a y'a ka dimi sin Isirayɛli jama ma kosɔbɛ ka kɛlɛ juguya. A ka dimi kɛra i ko tasuma, k'u lamini, nga u m'a faamu. A ka dimi y'u jɛni, u ma hakili sɔrɔ a la.