Read dyu Ezayi ka kitabu 43 Bible Online

Ezayi ka kitabu 43 - dyu bible

Ezayi ka kitabu 43

¹Isirayɛlidenw, Masaba min ye aw dan, ale ye min fɔ sisan, o filɛ, ale min ye aw labɛn, ale lo ko: «Aw kana siran, bari ne y'aw kunmabɔ, ne le y'aw wele, aw kɛra n yɛrɛ ta ye.

²Hali n'aw be tɛmɛna jii kɔnɔ, ne bena kɛ n'aw ye. Hali n'aw be baji tigɛ, a tena aw kunu. Hali n'aw be tagamana tasuma cɛma, a tena aw jɛni. K'aw to tasuma cɛma, a tena foyi kɛ aw la.

³Bari, ne Masaba le ye aw ka Ala ye, ne ye Isirayɛli ka Ala ye, aw kisibaga. N ye Ezipiti jamana di aw kunmabɔsara ye, n ye Etiyopi, ni Seba mara falen aw la.

⁴Aw koo ka gwɛlɛ ne ma, aw ye fɛnba ye ne fɛ, aw koo ka di n ye fana. O la, ne be adamadenw di aw nɔɔ na, ne be mɔgɔw di, waasa k'aw kisi.

⁵Aw kana siran, bari, ne be ni aw ye. K'a ta kɔrɔn fɛ, ne bena kɔsegi n'aw deenw ye, ne bena aw lajɛn ka bɔ fɔɔ tileben fɛ.

⁶Ne ben'a fɔ kɔgɔdugu ɲafan fɛ ko: ‹U di.› K'a fɔ worodugu ɲafan fɛ ko: ‹Kana u mara!› Na ni ne dencɛw ye ka bɔ yɔrɔjan, na ni ne denmusow ye ka bɔ diɲɛ daan na,

⁷ne ye minw dan k'u labɛn k'u dilan n ka boɲa kama, ka n tɔgɔ la u kan.»

⁸Aw ka bɔ ni fiɲɛntɔ nunu ye, k'a sɔrɔ ɲaa b'u fɛ! Tulogwerenw nunu, k'a sɔrɔ tulo b'u fɛ!

⁹Siyaw bɛɛ ka ɲɔgɔn lajɛn, u ka ɲɔgɔn kafo. Koo minw be kɛra, jɔn tun y'o fɔ u cɛma? Koo minw be kɛra, an tulo y'o mɛn jɔn fɛ? U ka na n'u ka seerew ye k'a yira ko tiɲɛ lo. An k'o mɛn, k'a fɔ ko: «Tiɲɛ lo.»

¹⁰Masaba ko: «Ne seere ye aw le ye. Ne ka baarakɛlaw ye aw le ye, ne y'aw minw woloma, janko aw ka faamuli kɛ, ka la ne la, ani ne ye min ye, aw k'o lɔn. Batofɛn si tun te ne ɲa, foyi tena sɔrɔ ne kɔ fana.

¹¹Ne, ne le ye Masaba ye. Ka ne niin bɔ a la, kisibaga wɛrɛ te yen.

¹²Ne le ye kisili koo fɔ, ne le ye mɔgɔw kisi fana. Ne le y'a to o koo mɛnna. A ma kɛ siya wɛrɛ ka batofɛn ye aw cɛma. Aw ye ne seerew ye. Ne Masaba ko ten. Ne le ye Ala ye.

¹³Kabini fɔlɔfɔlɔ, ne le ye Ala ye. Mɔgɔ si te se ka bɔsi ka bɔ ne bolo. Ni ne ye min kɛ, jɔn be se k'o yɛlɛma?»

¹⁴Masaba, Isirayɛli ka Ala, aw kunmabɔbaga ko: «Aw kosɔn, ne bena mɔgɔw ci Babilɔni kama. Ne bena dugu dondaw sɔgɔlanw kari. Babilɔnikaw ka nisɔndiyakan bena yɛlɛma ka kɛ dusukasikan ye.

¹⁵Ne le ye Masaba ye, aw ka Ala, Isirayɛli danbaga ni aw ka Masa!»

¹⁶Masaba min ye sira bɔ kɔgɔji cɛma, ka tɛmɛyɔrɔ bɔ jiba woyotɔ cɛma,

¹⁷ale min n'a ka kɛlɛkɛwotorow ni soow ani kɛlɛdenŋanaw bɔra ɲɔgɔn fɛ, ka taga kɛlɛ la, u benna ka la duguma, u tena wili tugu. U fagara i ko fitinɛ. Ale lo ko:

¹⁸«Koo minw kɛra ka tɛmɛ fɔlɔ la, aw hakili kana to olu la tugu. Aw kana miiri kokɔrɔw la tugu.

¹⁹Ayiwa, ne bena kokura dɔ dabɔ! O koo be daminɛna ka kɛ. Aw bena o ɲaa lɔn. Tiɲɛ na, ne bena sira bɔ kongokolon cɛma, ne bena jii woyo yɔrɔ janin na.

²⁰Kongosogow bena boɲa la ne kan. Kongowuluw ni kɔnɔsogolonw bena ne boɲa. Bari, ne bena jii di kongokolon kɔnɔ, ne bena jii woyo kongojugu kɔnɔ. Ne ka jama, ne ye minw woloma, u ben'a min.

²¹Ne ye jama min labɛn n yɛrɛ ye, ale bena ne tanu.

²²«Isirayɛlidenw, aw ma ne wele do, aw m'aw yɛrɛ sigɛn ne kosɔn do.

²³Aw m'aw ka sagadenw bɔ ne ye saraka jɛnita ye dɛ. Aw m'aw ka sarakaw kɛ ka ne boɲa dɛ. Ne m'aw sigɛn ko aw ka boɲafɛn di ne ma, ne m'aw sigɛn ko aw ka wusulan di ne ma.

²⁴Aw ma wari don fɛɛn kasadiman na k'o di ne ma dɛ. Aw ka sarakafɛnw tulu ma ne fa. Nga aw ye ne sɛgɛn n'aw ka kojuguw ye, aw ka juguya ye n sɛgɛn.

²⁵O bɛɛ n'a ta, ne yɛrɛ le b'aw ka kojuguw yafa n yɛrɛ kosɔn, n be ɲinɛ n'aw ka kojuguw ye kɔ.

²⁶N hakili be jigi aw ka koow la, an k'o sɛgɛsɛgɛ ɲɔgɔn fɛ. Aw be se ka tiɲɛ sɔrɔ ni kuma minw ye, aw k'o fɔ.

²⁷Aw bɛma fɔlɔ ye kojugu kɛ, aw ɲamɔgɔw murutira ne ma.

²⁸O la, ne ye n batoso ɲamɔgɔw dɔgɔya. Ne ye aw Isirayɛlidenw halaki, Ne be aw don cɛnnikɛlaw bolo janko u ka yɛlɛ aw ma.»