Read dyu Ezayi ka kitabu 44 Bible Online

Ezayi ka kitabu 44 - dyu bible

Ezayi ka kitabu 44

¹Masaba ko: «Nga sisan, ne ka baarakɛlaw Isirayɛlidenw, aw k'aw tulo malɔ, ne ye aw minw ɲanatɔmɔ.

²Ne Masaba min ye aw dan, ne min ye aw labɛn aw baa kɔnɔ, ne min ye aw dɛmɛbaga ye, ne le ko: Ne ka baarakɛlaw Isirayɛlidenw, aw kana siran, ne ye aw minw ɲanatɔmɔ.

³Bari ne bena dugukolo janin sɔn jii la, ne bena jisiraw bɔ dugukolo yɔrɔ janinw na. Ne bena n Nii di aw deenw ma, ne bena hɛrɛ kɛ aw kɔmɔgɔw ye.

⁴U bena wili i ko biin, kɔda la. U bena wili i ko yiri, jida la.

⁵Dɔ ben'a fɔ ko: ‹Ne ye Masaba ta ye,› kelen wɛrɛ ben'a fɔ ko ale ye Yakuba kɔmɔgɔ dɔ ye, dɔ wɛrɛ ben'a sɛbɛn a bolo kan ko: ‹Masaba ta,› a ben'a yɛrɛ jati Isirayɛlidenw dɔ ye.»

⁶ Masaba, Isirayɛli ka Masa n'a kunmabɔbaga, Masaba, Setigi y'a fo ko: «Ne le ye fɔlɔ ye, ne le ye laban ye. Ka ne niin bɔ a la, Ala dɔ wɛrɛ te yen.

⁷Jɔn be i ko ne? A tigi ka kuma, k'a yira ka gwɛ ne ye. Koo minw ka kan ka kɛ, jɔn le kɔnna k'o fɔ kabini fɔlɔfɔlɔ? Koo minw bena kɛ, a tigi k'o fɔ an ye.

⁸Aw kana siran, aw jaa kana tigɛ. Aw m'a mɛn ne fɛ wa? Ne m'a fɔ aw ye kabini tumajan wa? Aw te ne seerew ye wa? Ala dɔ wɛrɛ be yen ne kɔ wa? Siga t'a la, tangabaga wɛrɛ te yen ne kɔ, ne be min lɔn.»

⁹Minw be joow dilan, olu bɛɛ ye fuu le ye. Fɛɛn minw koo ka gwɛlɛ u ma, olu te foyi ɲa. U sɔnbagaw ye fiɲɛntɔw le ye, u te foyi lɔn. Maloya bena k'u ta ye.

¹⁰Jɔn be batofɛn walima joo dilan min tena foyi ɲa?

¹¹O sɔnbagaw bɛɛ bena maloya, o lɛsɛbagaw ye adamadenw dama le ye. U bɛɛ ka lajɛn ka na. U bena siran, u bena maloya ɲɔgɔn fɛ.

¹²Numucɛ be nigɛ ta. A b'a don tasuma la k'a baara, a b'a bugɔ ni marito ye. A b'a ka fanga kɛ k'a dilan. O kɔ, kɔngɔ b'a minɛ, a barika be ban. N'a ma jii min, a be dɛsɛ.

¹³Yirilɛsɛla be juru la yiri kan, a be cii kɛ a kan ni finfin ye. A be lɛsɛnan kɛ k'a baara, a be sumanikɛnan ta k'a suma. A b'a dilan ka kɛ mɔgɔja ye k'a cɛɲa i ko adamaden, k'a bila boon dɔ kɔnɔ.

¹⁴A be taga sɛdiriyiriba tigɛ, a be joyiri, walima teribɛntiyiri woloma. A b'a to a be boɲa yiriw cɛma. A be pɛnyiri tutu, sanji le b'a boɲa.

¹⁵Adamaden b'o lɔgɔ nunu le mana, a b'o le kɛ k'a yɛrɛ ja, a b'o le mana ka tobili kɛ. A b'o le fana dilan k'a kɛ batofɛn ye, ka to k'a bato. A b'o kɛ joo ye sa, ka to k'a teen biri o ɲafɛ.

¹⁶A b'o lɔgɔ nin tilan kelen mana, a be sogo la o kan k'o jɛni ka ɲimi ka fa. A b'a yɛrɛ fari ja fana ka sɔrɔ k'a fɔ ko: «Ɔnhɔn! Tasuma sɔrɔla, ne ye nɛnɛ bɔ n yɛrɛ la.»

¹⁷A b'o tɔɔ kɛ batofɛn ye, a ka joo ye, ka to ka biri a ɲafɛ k'a sɔn, ka to k'o daali ko: «Ne kisi, bari ele ye n tangabaga ye.»

¹⁸A te foyi lɔn, a te foyi faamu. A ɲaa te se ka yeli kɛ. A te miiri ka taga yɔrɔjan, o la, a te se ka foyi faamu.

¹⁹Mɔgɔ si te yen min be miiri, mɔgɔ si te yen min b'a lɔn, ani ka miiri k'a fɔ ko: «Ne ye lɔgɔ nin tilan kelen mana, ne ye tobili kɛ n'a ye, ne ye sogo jɛni k'a ɲimi. Ne be sɔrɔ k'a tɔɔ ta k'o kɛ joo ye, fɛnjugu, ka to ka lɔgɔkuru sɔn!»

²⁰Fɛɛn min ye buguri ye, a be nɔrɔ o le la, a ka miiriya y'a fili. Fɛɛn nin ten'a bɔsi, a do ten'a fɔ fana ko: «Fɛɛn min be ne bolo, o ye namarafɛn ye.»

²¹«Isirayɛlidenw, aw k'aw hakili to nin kelen na: aw ye ne ka baarakɛlaw ye. Ne y'aw labɛn waasa ka kɛ ne ka baarakɛlaw ye. Ne tena ɲinɛ aw kɔ.

²²Ne y'aw ka kojuguw tunu i ko sɔgɔma burun. Aw ka segi ne ma, bari, ne y'aw kunmabɔ.»

²³Sankolo ka nisɔndiyapɛrɛnkan bɔ! Bari, Masaba ye dɔ kɛ. Dugukolo kɔnɔna ka nisɔndiya! Kuluw, ni tuuw ani yiriw bɛɛ ka nisɔndiya mankan kɛ! Sabu, Masaba y'a ka jama hɔrɔnya, a y'a ka sebagaya yira Isirayɛlidenw la.

²⁴Masaba min y'i kunmabɔ, ale min y'i labɛn i baa kɔnɔ, ale ko: «Ne Masaba le ye koo bɛɛ dan. Ne kelen dɔrɔn le ye sankolo fɛnsɛn ten. Ne ye dugukolo la ne yɛrɛ ma.

²⁵ Ne be kira galontigɛlaw ka fɔtaw ɲagami ka lagwɛlikɛlaw kɛ nalomanw ye. Ne be lɔnnikɛlaw wajibiya ka segi kɔfɛ, k'a yira k'u ka lɔnniya ye nalomanya ye.

²⁶Ne ka baarakɛla be kuma min fɔ, ne ka cidenw be koo min fɔ, n ben'a to o be kɛ. Ne b'a fɔ ko mɔgɔw bena sigi Zeruzalɛmu tugu, ko Zuda mara duguw ka lɔ kura ye, ne bena tomow wili.

²⁷Ne b'a fɔ kɔgɔjiba ye ko a ka ja, a fana be ja.

²⁸ Ne b'a fɔ Sirusi koo la, ko: ‹N ka jama kɔlɔsibaga lo.› A bena ne diyanako bɛɛ kɛ. Ale ben'a fɔ ko Zeruzalɛmu ni ne batoso ka lɔ kura ye.»