Read dyu Ezayi ka kitabu 45 Bible Online

Ezayi ka kitabu 45 - dyu bible

Ezayi ka kitabu 45

¹Masaba be kuman'a ka mɔgɔ wolomanin Sirusi fɛ, a ye min minɛ a bolo ma. A y'a latigɛ ko a bena siyaw majigi, ka masaw ka fanga bɔsi u la. Masaba bena duguw dondaw yɛlɛ a ɲa, u si tugunin tena to. A ko Sirusi ma:

²«Ne yɛrɛ le bena taama i ɲa, ka tintinyɔrɔw ci ka jigi, ka koon ziralamanw kari, ka daa sɔgɔnan nigɛlamanw kari.

³Ne bena nafolo d'i ma, min tun dogonin lo. Fɛɛn minw tun maranin be gundoyɔrɔ la, n ben'o d'i ma. O la, i ben'a lɔn ko ne le ye Masaba ye, ko ne, Isirayɛli ka Ala lo y'i wele.

⁴Ne ka baarakɛlaw Isirayɛlidenw kama, ne ka jama wolomanin nin kama, ne y'i wele k'i kɛ mɔgɔbaba ye k'a sɔrɔ i te ne lɔn.

⁵Ne le ye Masaba ye, dɔ wɛrɛ te yen. Ka ne niin bɔ a la, Ala wɛrɛ te yen. Ne ye fanga d'i ma k'a sɔrɔ i te ne lɔn.

⁶Janko mɔgɔ bɛɛ k'a lɔn ko ka ne niin bɔ yen, foyi te yen tugu. Ne ye Masaba ye, dɔ wɛrɛ te yen.

⁷Ne le b'a kɛ kɛnɛ be bɔ, ne le b'a kɛ dibi be don. Ne le be hɛrɛ kɛ, ne le be bɔnɛ lase. Ne Masaba le b'o koo nunu bɛɛ kɛ.

⁸Ne bena see sɔrɔli jigi ka bɔ sanfɛ i ko sanji, dugukolo ben'a daa yɛlɛ k'o kisili sɔrɔ. Hɔrɔnya ni tilenninya bena sabati dugukolo kan i ko yiri nuguninw. Ne Masaba le ko ten.

⁹ «E min b'i Danbaga sɔsɔ, bɔnɛ y'i ta ye. E ye bɔgɔdaga ye, dagadilanbaga ye min dilan. Bɔgɔmana be se k'a fɔ a baarabaga ma cogo di ko: ‹I be mun le kɛra?› Daga be se k'a fɔ a dilanbaga ye wa, ko: ‹I ka baara ma dafa.›?

¹⁰Mɔgɔ min b'a fɔ denfa ye ko: ‹I ye deen jumɛn le wolo ten?› walima k'a fɔ baa ye ko: ‹I ye deen jumɛn le wolo ten?› bɔnɛ ye o tigi ta ye.»

¹¹Masaba, Isirayɛli ka Ala n'a Danbaga ko: «Aw b'a fɛ ka ne ɲininga ne deenw ka koo la, ka ne ka kɛtaw yira n na wa?

¹²Ne le ye dugukolo dan, mɔgɔ minw b'a kan, ne fana le y'olu dan. Ne yɛrɛ bolo le ye sankolo fɛnsɛn, ne le b'a kɔnɔnafɛnw bɛɛ mara.

¹³Ne le ye Sirusi woloma n ka tilenninya kosɔn, ne ben'a ka siraw bɛɛ dakɛɲɛ. Ale lo bena n ka dugu lɔ kura ye, U tun ye ne ka mɔgɔ minw minɛ ka taga n'u ye, ale bena olu bila ka taga, hali u tena foyi sara, u tena boɲafɛn di.» Masaba, Setigi le ko ten.

¹⁴Masaba y'a fɔ ko: «Ezipitikaw ka baara nafa ni Etiyopikaw ka sɔrɔ bena kɛ e ta ye. Sebakaw, o mɔgɔjanjan nunu, olu fana bena na, ka kɛ i ta ye. O mɔgɔ nunu bena tugu i kɔ ni jɔrɔkɔ b'u la. U bena biri e ɲafɛ k'i daali ko: ‹Ala be ele dɔrɔn le fɛ. K'ale niin bɔ a la, Ala wɛrɛ te yen.› »

¹⁵Siga t'a la, i ye Ala ye, i dogonin lo, Isirayɛli ka Ala, e lo ye kisibaga ye.

¹⁶Jodilanbagaw bɛɛ maloyara, u kuun surunnin be taamana.

¹⁷Masaba bena Isirayɛlidenw kisi, a bena u kisi pepewu bii ni sini. U tena maloya fewu, u kuun tena surun tugu abada.

¹⁸Masaba ye sankolo dan, ale Ala lo ye dugukolo ka barika don a la. A m'a dan k'a lakolon to, a y'a dan janko mɔgɔ ka to a kan. Ale lo ko: «Ne le ye Masaba ye, dɔ wɛrɛ te yen ne kɔ.

¹⁹Ne ma kuma dogo la, yɔrɔ dibinin dɔ la dugukolo kan. Ne m'a fɔ Isirayɛlidenw ye ko: ‹Aw ka ne yɔrɔ ɲini yɔrɔlakolon la!› Koo min ye tiɲɛ ye, ne Masaba b'o le fɔ. Min tilennin lo, n b'o le fɔ.

²⁰«Siya wɛrɛw min tora, aw ka ɲɔgɔn lajɛn ka na, aw ka gwɛrɛ ɲɔgɔn fɛ. Minw b'u ka joo lɔgɔlamanw kɔrɔta, olu te foyi lɔn. Batofɛn min te se ka mɔgɔ kisi, u be daalili kɛ o le fɛ.

²¹Kuma min b'aw fɛ, n'aw bena tiɲɛ sɔrɔ n'a ye, aw k'o fɔ. Aw be se ka ɲɔgɔnye kɛ. Koo min be kɛra bii, jɔn tun y'o fɔ kabini tumajan? Jɔn kɔnna k'o fɔ? Ne Masaba tɛ wa? Ala dɔ wɛrɛ te yen ne kɔ. Ne tilennin lo, ne be mɔgɔ kisi, ka ne niin bɔ a la, Ala dɔ wɛrɛ te yen.

²²Aw ka yɛlɛma k'aw ɲaa sin ne ma, ne bena aw kisi, aw minw be fɔɔ diɲɛ daan na. Bari, ne le ye Ala ye, dɔ wɛrɛ te yen ne kɔ.

²³ Ne be kali n yɛrɛ tɔgɔ la, kuma min be bɔ ne daa la, tiɲɛkuma lo, a te se ka yɛlɛma. Ko mɔgɔw bɛɛ bena u kunbiri gwan ne ɲakɔrɔ ka kali

²⁴k'a fɔ ne koo la ko: ‹Tilenninya ni fanga be sɔrɔ Masaba kelenpe le fɛ.› Mɔgɔ minw bɛɛ tun dimin'a kɔrɔ, olu maloyanin le bena na a fɛ.

²⁵Masaba barika la, Isirayɛli kɔmɔgɔw bɛɛ bena tilenniya ni kunnawolon sɔrɔ.