Read dyu Ezayi ka kitabu 47 Bible Online

Ezayi ka kitabu 47 - dyu bible

Ezayi ka kitabu 47

¹ Masaba ko: «Babilɔni, jigi ka bɔ i ka masasigilan kan ka sigi duguma. Sigi buguri la. E be i ko sunguruɲuman min nigɛ bɔra. U tena e wele tugu ko sunguruɲuman.

²Wugu ta ka sinni kɛ. Fani min birinin b'i ɲada kan, o bɔ, k'i ka delekejan daa kuru i senkalaw ka ye, ka kɔɔw tigɛ.

³I julakolon ka ye, maloya k'i minɛ. Ne bena n mɔnɛ bɔ. Mɔgɔ si te se ka n sɔsɔ!

⁴Anw ka siya kunmabɔbaga tɔgɔ ko Masaba, Setigi, Isirayɛli ka Ala.

⁵I daa tugu ka sigi. Don dibi kɔnɔ, Babilɔni. Bari, i tena wele siyaw ka faamadugu tugu.

⁶Ne tun dimina n ka jama kɔrɔ. Minw kɛra ne taw ye, ne tun y'u dɔgɔya, k'u don i bolo. Nga i ma makari u la fewu, i ye tɔɔrɔ la cɛkɔrɔbaw kan kosɔbɛ.

⁷I ko: ‹N bena to faamaduguya la kudayi!› Koo minw tun be kɛra, i ma miiri ka ɲa o la. U bena laban cogo min na, i m'o jati minɛ.

⁸ O la sa, dugu tilenbali, i tulo malɔ. E min sigicogo ka ɲi, e min tun b'a fɔra i yɛrɛ kɔnɔ ko: ‹Foyi te se ka suma ni ne ye! Ne cɛɛ tena sa, n deenw fana tena sa.›

⁹O bɔnɛ fila nunu bena i sɔrɔ loon kelen: i deenw bena sa, i cɛɛ bena sa. O bena kɛ i la fɔɔ ka ɲa k'a sɔrɔ i banbanin lo i ka subagaya la, ni kirisi koo la.

¹⁰I jigi tun lanin be i ka juguya kan ka to k'a fɔ ko: ‹Mɔgɔ si ɲaa te ne la.› I ka lɔnniya, n'i ka jatiminɛ y'a kɛ i kuun ɲagamina. O la, i y'a fɔ i yɛrɛ kɔnɔ ko: ‹Foyi te se ka suma ni ne ye!›

¹¹Bɔnɛ bena se i ma, i tena se ka min bali. Balawu bena ben i kan, i tena se k'i yɛrɛ tanga min ma. Gwɛrɛgwɛrɛko bena bari i la, i ma miiri loon min na.

¹²Banba i ka kirisi koow n'i ka subagaya la sa! I y'i yɛrɛ sɛgɛn minw kalan la kabini i sungurutuma. N'a sɔrɔ i bena nafa sɔrɔ a la, walima ka se ka mɔgɔw jaa tigɛ!

¹³I y'i yɛrɛ sɛgɛn lagwɛlikojugu fɛ. Lagwɛlikɛla minw be to ka sankolo cogo filɛ, ka lolow jati minɛ, ka koo nataw fɔ kalo o kalo, olu ka wili ka na aw kisi.

¹⁴U bena kɛ i ko kalamurumuru, tasuma bena u jɛni. U tena se k'u yɛrɛ bɔsi tasuma bolo. A tena kɛ tobilikɛ tasuma ye dɛ! A tena kɛ farija ta ye dɛ!

¹⁵I y'i yɛrɛ sɛgɛn lagwɛlikɛla minw fɛ dɛ, olu niyɔrɔ le bena kɛ o ye ten, i ye lagwɛli kɛ minw fɛ kabini i sungurutuma. U bɛɛ bena yɛrɛkɛ kelen kelen, u si tena se k'i bɔsi.