Read dyu Ezayi ka kitabu 49 Bible Online

Ezayi ka kitabu 49 - dyu bible

Ezayi ka kitabu 49

¹ Jii cɛma dugukolo kan mɔgɔw ka mɛnni kɛ ne fɛ, siya minw be fɔɔ yɔrɔjanw na, aw k'aw tulo malɔ. Masaba ye ne wele ka ne to n baa kɔnɔ. Kabini n wolotuma, a ye ne tɔgɔ wele.

² A ye ne daa kɛ i ko murujan dadiman, a ye ne dogo a bolo kɔrɔ. A ye ne kɛ biɲɛ damisɛn ye, a ye ne dogo a ka biɲɛforoko kɔnɔ.

³A ko ne ma: «Isirayɛli, i ye ne ka baarakɛla ye, ne bena n ka boɲa yira e sababu la.»

⁴Nga ne tun b'a fɔra ko: «Ne ye n yɛrɛ sɛgɛn gwansan, ne ye n fanga ban koo fufafu la! K'a sɔrɔ, ne ka kan ni min ye, o be Masaba bolo, ne ka sara be ne ka Ala fɛ.»

⁵Sisan Masaba kumana, ale min ye ne labɛn ka n to n baa kɔnɔ, waasa n ka kɛ a ka baarakɛla ye, ka Isirayɛlidenw dɛmɛ u ka kɔsegi a ma, k'u lajɛn a fɛ. O la, Masaba be boɲa la ne kan. Ne ka Ala ye ne fanga ye.

⁶ A ko: «Ele ka kɛ n ka baarakɛla ye, ka Isirayɛlidenw ta ɲa tugu, ka kɔsegi ka na n'u tɔɔ ye, o te labɔri kɛ. Ne b'i kɛ siya wɛrɛw ka yeelen ye fana, janko ne ka kisili ka se fɔɔ diɲɛ daan na.»

⁷Mɔgɔ min koo man di mɔgɔw ye, u be ale min lɛɛbu, ale min ye kuntigi farimanw ka jɔɔn ye, Masaba, Isirayɛli kunmabɔbaga n'u ka Ala y'a fɔ ale ye ko: «Masaw mana i ye, u be wili ka lɔ, jamana kuntigiw be biri. O bena kɛ ne Masaba barika la, ne min ye kantigi ye, o bena kɛ ne Isirayɛli ka Ala barika la, ne min y'i woloma.»

⁸ Masaba y'a fɔ a ka jama ye ko: «Waati bɛnnin na, ne y'i lamɛn. Kisili loon na, ne y'i dɛmɛ. Ne bena aw mara, ka tɛmɛ aw fɛ ka bɛn ni adamadenw ye. Ne bena jamana dilan, k'a tilantilan ka di mɔgɔw ma tugu, yɔrɔ minw cɛnnin lo bii.

⁹Ne ben'a fɔ kasodenw ye k'u ka bɔ, k'a fɔ dibi kɔnɔ mɔgɔw ye k'u ka bɔ kɛnɛ kan! U bena kɛ i ko sagakulu min be dumuni kɛ siradaw la, ani kuluw kunna.

¹⁰ Kɔngɔ ni minnɔgɔ tena u minɛ tugu, cɛncɛn gwanninman, walima tile tena u jɛni tugu. Bari, min be makari u la, ale lo b'u bilara sira. A bena taga n'u ye jii bɔyɔrɔ la.

¹¹Ne bena sira bɔ kuluw kan, n bena tɛmɛsiraw lalaga.

¹²A filɛ, u natɔ ye ka bɔ yɔrɔjan! Dɔw bɔra kɔgɔdugu ɲafan fɛ, ni tileben fɛ, dɔw fana bɔra Asuwan mara faan fɛ.»

¹³Nisɔndiyapɛrɛnkan ka kɛ sankolo kɔnɔ, nisɔndiya ka kɛ dugukolo kan, dɔnkili ka la kuluw kan kosɔbɛ! Bari, Masaba b'a ka jama dusu saalo, a be makari a ka mɔgɔ tɔɔrɔninw la.

¹⁴*Siyɔn tun b'a fɔra ko: «Masaba banna ne la. Matigi ɲinɛna ne kɔ.»

¹⁵Nga Masaba b'a jaabi ko: «Muso be ɲinɛ a ka denɲɛnin kɔ wa? A te makari a yɛrɛ woloden na wa? Hali ni muso be ɲinɛ a deenw kɔ, ne te ɲinɛ i kɔ.

¹⁶Ayiwa, ne y'i tɔgɔ sɛbɛn n tigɛ kɔnɔ, n ɲaa b'i kan tuma bɛɛ.

¹⁷Mɔgɔ minw bena Siyɔn dugu lɔ tugu, olu be teliyara ka na. Minw tun y'a ci, k'a halaki, olu be bɔra ka taga!

¹⁸Siyɔn, i kuun kɔrɔta k'i lamini filɛ. I deenw bɛɛ be lajɛnna, u be nana. Ne tɔgɔ kosɔn, ne Masaba le ko ten, u bɛɛ bena kɛ i ko masirifɛn, i ko kɔɲɔmuso be cɛsirilan siri cogo min na.

¹⁹I kɛra tomo ye, yɔrɔlakolon, i ka yɔrɔ halakira. I bena dɔgɔya dugudenw ma sisan. O y'a sɔrɔ i cɛnbagaw tagara yɔrɔjan!

²⁰I tun be miiri ko i bɔnɔna i deen minw la, i bena tila ka olu kumakan mɛn ko: ‹Yɔrɔ ka dɔgɔ ne ma, gwɛrɛ janko ne ka sigiyɔrɔ sɔrɔ.›

²¹I ben'a fɔ i yɛrɛ kɔnɔ ko: ‹Jɔn le ye nunu wolo ne ye sa? Deen tun te ne fɛ, mɔgɔ tun te ne kɔrɔ. U tun y'u minɛ ka taga ka ne to yen. Jɔn le do nana ni nunu ye? Ne tun tora lakolon tuma min na, nunu tun be min?› »

²²Matigi, Masaba ko: «Ne bena n bolo kɔrɔta siya wɛrɛw faan fɛ, ka taamasiɲɛ wili k'a yira u la. U bena na n'i deenw ye u disi la, u bena i denmusow ta u gaman kan.

²³Masaw le bena kɛ i deenw ka lamɔfaw ye, masacɛ denmusow be kɛ u minɛbagaw ye. U bena biri k'u teen gwan duguma i ɲafɛ, u bena u yɛrɛ majigi i kɔrɔ k'i boɲa. I ben'a lɔn o seen fɛ ko ne ye Masaba ye. Mɔgɔ minw b'u jigi la ne kan, olu tena maloya abada!»

²⁴Kɛlɛdenŋana ye fɛɛn min sɔrɔ kɛlɛ la, o be se ka bɔsi a fɛ wa? Cɛfari ka kasoden be se ka bɔsi a la wa?

²⁵Masaba ko: «Kɛlɛdenŋana ka kasoden bena bɔsi a la jaati! Cɛfari ye min minɛ, o bena bɔsi a la. Ne bena i kɛlɛbagaw kɛlɛ, ne le bena i deenw kisi.

²⁶N bena i tɔɔrɔbagaw kɛ u b'u yɛrɛ farisogo dumu. U bena u yɛrɛ joli min ka fa i ko duvɛnkɛnɛ. Mɔgɔ bɛɛ ben'a lɔn ko ne Masaba le ye i kisibaga ye, ani i kunmabɔbaga, Yakuba ka Barikatigi.»