Read dyu Ezayi ka kitabu 5 Bible Online

Ezayi ka kitabu 5 - dyu bible

Ezayi ka kitabu 5

¹ Ne bena dɔnkili la n tericɛ ye. Dɔnkili lo n tericɛ n'a ka *ɛrɛzɛnforo koo la. Ɛrɛzɛnforo tun be ne tericɛ fɛ tintin dɔ kan, a yɔrɔ tun ka ɲi kosɔbɛ.

²A ye dugukolo wiliwili, k'a kabakuruw bɔ, ka suun ɲanamanw tutu yen, ka sangaso lɔ a kɔlɔsibagaw ye a cɛma, ka dingɛ sɔgɔ ka ɛrɛzɛnji bɔyɔrɔ dilan. A tun be ɛrɛzɛnɲuman le kɔnɔna, nga denɲuman ma sɔrɔ a la.

³O la, n tericɛ ko: «Zeruzalɛmukaw ni Zuda mara mɔgɔw, aw ye kiti ban an ni ɲɔgɔn cɛ, ne ni n ka ɛrɛzɛnforo cɛ.

⁴N tun ka kan ka mun le kɛ foro nin ye tugu, ni n m'a kɛ? Ne tun be denɲuman le kɔnɔn'a la, mun n'a m'a kɛ?

⁵Ayiwa, ne bena min k'a la, ne bena o yira aw la. Ne bena jata bɔ a la, a bena cɛn. Ne ben'a kogo ci ka bɔ yen, u ben'a dɔndɔn.

⁶N ben'a kɛ yɔrɔkolon ye, a suunw bolow tena tigɛ, a kɔrɔ tena sɛnɛ tugu. Ŋɔniw bena fa yen. N bena sanji bali ka ben a kan.»

⁷Masaba, Setigi ka ɛrɛzɛnforo ye Isirayɛlidenw le ye. Zuda mara mɔgɔw le kɛra ɛrɛzɛnsunw ye, minw koo tun ka d'a ye haali. A tun be tilenninya le kɔnɔn'u fɛ, nga tilenbaliya le be kɛra. A tun be hɔrɔnya le fɛ, nga tɔɲɔli lo be yɔrɔ bɛɛ.

⁸Bɔnɛ ye aw ta ye! Aw minw be luu fara luu kan, ka foro fara foro kan, fɔɔ ka taga yɔrɔ bɛɛ minɛ, aw dama be to jamana kɔnɔ.

⁹Ne ye kuma min mɛn ka bɔ Masaba, Setigi fɛ, n'a y'a fɔ k'a gwɛlɛya, o filɛ ko: «Soo caaman bena kɛ yɔrɔlakolon ye, soɲumanɲuman nunu, sobaba nunu, mɔgɔ tena sɔrɔ u kɔnɔ.

¹⁰*Ɛrɛzɛnforo ɛkitari saba bena duvɛn daga kelen dɔrɔn le fa! Sumansi sinsin ɲaa tan dannin foro kɔnɔ, o tigɛnin bena kɛ sinsin ɲaa kelen ye.»

¹¹Mɔgɔ minw be boli ka yaala dɔrɔ farimanw kɔ dugu gwɛtɔ, bɔnɛ ye u ta ye! U be nɛnɛ bɔ u yɛrɛ la ni duvɛn ye hali dugutilama.

¹²U b'u ka dɔrɔtɔya kɛ ni gɔniw, ani kolonjow ni dundunw ani filew le ye. Masaba be min kɛ, u t'o filɛ yɛrɛ. Masaba bolo ye koo minw kɛ, u t'o yera.

¹³O la, ne ka jama bena minɛ ka taga u ka kolɔnbaliya kosɔn. Kɔngɔ bena u ka mɔgɔbabaw faga, minnɔgɔ bena jamaba nin halaki!

¹⁴O kama, lahara daa yɛlɛnin lo belebeleba! A kɔnɔ wagara! Dugu mɔgɔbabaw n'a ka jamaba be jigi yen k'u to nisɔndiya la.

¹⁵Mɔgɔw na majigi, adamadenw bena maloya, yɛrɛboɲalaw kuun bena surun.

¹⁶Masaba, Setigi bena boɲa sɔrɔ a ka kiti loon na. Ala b'a ka ɲumanya yira a ka tilenninya fɛ.

¹⁷Sagaw bena ɲimini kɛ dugu tomo kan. U b'a fɛ baa minw ka tulɔ, yan tomo bena kɛ olu dɛndɛyɔrɔ ye.

¹⁸Mɔgɔ minw be kojugu kɛ namara sababu la, bɔnɛ y'u ta ye! U b'u ka hakɛw samana u kɔfɛ i ko wotoro.

¹⁹U yɛrɛ b'a fɔra halibi ko: «Ala ka teliya. A b'a fɛ ka min kɛ, a ka teliya k'o kɛ, an k'a ye. Isirayɛli ka Ala ye min latigɛ, o ka kɛ waasa an ka dɔ lɔn o la.»

²⁰Minw b'a fɔ ko kojugu ye koɲuman ye, ko koɲuman ye kojugu ye, bɔnɛ y'u ta ye! U be dibi le kɛ yeelen ye, ka yeelen kɛ dibi ye. Fɛɛn min ka timi, u b'o le kɛ kunanman ye. Fɛɛn min ka kunan, u k'o ka timi.

²¹Bɔnɛ y'u ta ye! U b'a miiri k'olu ye kolɔnbagaw ye, u ka jati la, hakilitigiw lo.

²²Mɔgɔ minw ye dɔrɔminlawaraw ye, minw ye dɔrɔtobilaŋanaw ye, bɔnɛ ye olu ta ye.

²³U be tiɲɛ di mɔgɔjalakinin ma a ka daa sanfɛn kosɔn, ka ban ka tiɲɛ di tiɲɛtigi ma.

²⁴Tasuma be biin jɛni cogo min na, binmurumuru be jɛni ka tunu cogo min na, o cogo kelen na, u bena tunu. U liliw bena toli, U feerenw bena taga fɔɲɔ fɛ i ko buguri. Bari u banna Masaba, Setigi ka sariya la, u ma Isirayɛli ka Ala ka kuma jati.

²⁵O kama, Masaba dusu dimina a ka jama kɔrɔ, a y'a bolo kɔrɔta k'u bugɔ. Kuluw yɛrɛyɛrɛla, u suuw tora siradaw la i ko ɲamaɲama. O n'a ta bɛɛ, a ka dimi ma nɔgɔya, a bolo be sanfɛ halibi.

²⁶Masaba ye taamasiɲɛ kɔrɔta yɔrɔjan siya dɔ ye. A b'u welela ni dalafilen ye ka bɔ fɔɔ diɲɛ daan na. U natɔ filɛ ni karama ye!

²⁷U ka mɔgɔw si ma sɛgɛn, u si te talon. U si te sinɔgɔ hali dɔɔni. U ka cɛsirilanw ma foni, u ka sanbaraw juru ma tigɛ.

²⁸U ka biɲɛw daa labɛnnin lo kosɔbɛ, u y'u ka kalaw bɛɛ labɛn. U ka soow sensɔnniw kɛra i ko kabakuruw, u ka kɛlɛkɛwotorow seen ka teli i ko fununfunun.

²⁹U mankan kɛra i ko jaramuso ta, u mankan kɛra i ko jarakanbelenw ta. U be sɔngɔ k'u ka sogo minɛ k'a ta ka taga n'a ye, mɔgɔ si ten'a bɔsi u la.

³⁰Nga loon dɔ la, mankan bena ci u kunna, kɔgɔji ka mankan ɲɔgɔn. I mana filɛli kɛ jamana kɔnɔ, dibi ni dusukasi le be yen. Yɔrɔ bɛɛ bena dibi.