Read dyu Ezayi ka kitabu 52 Bible Online

Ezayi ka kitabu 52 - dyu bible

Ezayi ka kitabu 52

¹ Wili, *Siyɔn, wili joona ka barika don i yɛrɛ la. Zeruzalɛmu, dugu senuman, wili k'i ka faniɲumanw don. Bari, kɛnɛkɛnɛbaliw ni mɔgɔ minw saniyanin tɛ, olu tena don i kɔnɔ tugu.

²Zeruzalɛmu, wili ka buguri furan k'a bɔ i yɛrɛ la ka sigi i nɔɔ na. Siyɔn, jɔnya juru min b'i kaan na, wili k'o foni.

³Tiɲɛ na, Masaba y'a fɔ a ka jama ye ko: «Mɔgɔ ma wari bɔ k'aw san k'aw kɛ jɔɔnw ye, wari fana tena bɔ k'aw hɔrɔnya.»

⁴Matigi, Masaba y'a fɔ tugu ko: «Ne ka jama ka koo daminɛ na, u tun tagara Ezipiti ka sigi yen. A laban na, Asirikaw y'u minɛ k'u tɔɔrɔ.

⁵ Sisan ne be mun lo sɔrɔ o la? Ne ka jama minɛna gwansan, foyi ma sara. U kuntigiw be pɛrɛnna setigiya la. Ne Masaba le ko ten. Ne tɔgɔ fana cɛnnin lo tuma bɛɛ.

⁶O kama, ne ka jama bena n tɔgɔ lɔn. O loon na, u ben'a lɔn ko ne le be kumana. Tiɲɛ na, ne lo.»

⁷ Ciden min be nana kibaru diman fɔ, ale yenin be mɔgɔ nisɔndiya, min be hɛrɛkuma wango la, min be kibaru diman fɔ ka kisili wango la, min b'a fɔ *Siyɔn ye ko: «I ka Ala ye masa ye!»

⁸Dugu kɔlɔsibagaw be pɛrɛnna, u be pɛrɛnna ɲɔgɔn fɛ nisɔndiya la. Bari, olu yɛrɛ ɲaa be Masaba kɔsegitɔ la Siyɔn.

⁹Zeruzalɛmu tomow, aw ka nisɔndiyapɛrɛnkan bɔ ɲɔgɔn fɛ. Bari, Masaba ben'a ka jama dusu saalo, a bena Zeruzalɛmu kunmabɔ.

¹⁰Masaba y'a bolo barikaman yira siyaw bɛɛ ɲana. Masaba bena an kisi cogo min na, diɲɛ danyɔrɔ mɔgɔw bɛɛ bena o ye.

¹¹ Aw ye bɔ! Aw ye bɔ! Aw ye bɔ Babilɔni. Aw kana maga fɛɛn nɔgɔnin si la. Masaba batominanw be aw minw bolo, aw ye bɔ a kɔnɔ, k'aw yɛrɛ saniya.

¹²Aw ka bɔko tena kɛ kɔrɔtɔko ye, aw tena taga i ko bolibagaw. Sabu, aw ka ɲabila ye Masaba le ye, aw ka kɔbila ye Isirayɛli ka Ala ye.

¹³Masaba ko: «Ayiwa, ne ka baarakɛla ka koo bena taga ɲa, a bena boɲa sɔrɔ kosɔbɛ!

¹⁴Mɔgɔ caaman kabakoyar'a halakikojugu kosɔn. Adamadenya tun te lɔn a la tugu, a tun te lɔn tugu ko cɛɛ lo.

¹⁵ A kɛra ten, siya caaman bena kabakoya a kosɔn. Fɔtaw tena sɔrɔ masaw fɛ. Bari min ma deli ka lakali u ye, u bena o ye. U ma deli ka min mɛn, u bena o faamu.»