Read dyu Ezayi ka kitabu 53 Bible Online

Ezayi ka kitabu 53 - dyu bible

Ezayi ka kitabu 53

¹ An be min mɛnna, jɔn le lara o la? Masaba y'a ka sebagaya yira jɔn na?

²A ka baarakɛla wilil'a ɲakɔrɔ i ko yiri falennin kura. A be i ko yiri min wilila yɔrɔ janin na. A tun ma ɲi, a filɛ tun man di, a foyi tun t'a koo diya an ye. A ɲaa faganin tun lo haali, fɔɔ a nigɛ tun te mɔgɔ minɛ.

³A koo tun ka go mɔgɔw ye, u bann'a la. Sɛgɛn tun b'a kan, a tɔɔrɔla. A yetɔ, a te se ka filɛ! A koo goyara mɔgɔw ye fɔɔ an tun t'a jati.

⁴ Tiɲɛ na, a y'an ka sɛgɛnw le ta. A lɔra n'an ka tɔɔrɔw le ye. Anw tora k'a miiri ko Ala be koo dɔ jurusara le bɔr'a la. Ko a y'a ɲaa gwan, k'a dɔgɔya.

⁵ K'a sɔrɔ anw ka kojuguw kosɔn lo, u y'a sɔgɔ. Anw ka juguya kosɔn lo, a halakira. Tɔɔrɔ min be hɛrɛ lase an ma, o le lar'a kan. An kɛnɛyara a ka jolidaw sababu la.

⁶ Anw bɛɛ tun be yaalala an kunfɛ i ko sagaw, an kelen kelen bɛɛ tun be n'an ka sira ye. Nga Masaba ye anw bɛɛ ka juguya sara la a kunna.

⁷ U y'a tɔɔrɔ! A y'a yɛrɛ to u bolo. A fana ma foyi fɔ. A kɛra i ko sagaden, u be tagara ni min ye fagayɔrɔ la. A jera i ko saga, a sii tigɛbagaw bolo, a ma foyi fɔ.

⁸U y'a karaba, k'a kiti, ka taga n'a ye a fagayɔrɔ la. A ka waati mɔgɔw la, jɔn hamin'a la? U y'a niin bɔ diɲɛ mɔgɔw la. U y'a bugɔ a ka jama ka kojugu le kosɔn.

⁹ U y'a suu don ni mɔgɔjuguw ye, a kaburu tun be fɛntigiw taw cɛma. K'a sɔrɔ a tun ma kojugu si kɛ, namarakuma si ma bɔ a daa la ka ye.

¹⁰Nga Masaba sago tun lo k'a tɔɔrɔ k'a halaki. N'a y'a nii di fili yafa saraka ye, a bena kɔmɔgɔw sɔrɔ, a bena sijan sɔrɔ. Masaba be min fɛ, o bena kɛ ale sababu la.

¹¹Masaba ko: «N'a ye tɔɔrɔba nin muɲu, a ben'a diya bɔ. Ne ka baarakɛla tilennin sababu la, mɔgɔ caaman bena tilenninya sɔrɔ, ale min y'u ka kojugu kunko ta.

¹² O le y'a to, ne bena niyɔrɔ d'a ma mɔgɔbabaw cɛma. A bena niyɔrɔ sɔrɔ ni setigiw ye. Bari, ale yɛrɛ le y'a yɛrɛ di saya ma, u y'a jati kojugukɛlaw dɔ ye. Jama ka kojugu le tun b'a kunna, a tun be yafa ɲinina kojugukɛlaw le ye.