Read dyu Ezayi ka kitabu 55 Bible Online

Ezayi ka kitabu 55 - dyu bible

Ezayi ka kitabu 55

¹ «Minnɔgɔ be aw minw bɛɛ la, aw ye na jiyɔrɔ la. Hali ni wari te mɔgɔ min fɛ, o tigi ka na dumuni bɔ k'a dumu gwansan. Aw ye na duvɛn ni nɔnɔ minɛ, a te sara.

²Mun na aw b'aw ka wari don fɛɛn na min te mɔgɔ balo? Mun na aw b'aw ka sara don fɛɛn na min te mɔgɔ fa? Aw ka mɛnni kɛ, aw ka mɛnni kɛ ne fɛ. Fɛɛn min ka di, aw k'o dumu. Aw bena nisɔndiya, dumunifɛn diman sababu la.

³ Aw k'aw tulo malɔ, aw ye na ne fɛ. Aw ka mɛnni kɛ ne fɛ, o la, aw bena to nii la. Ne bena bɛɛn kɛ n'aw ye, min tena cɛn abada. Ne ye koɲuman minw kɛ Dawuda ye, ne bena o ɲɔgɔn kɛ aw ye.

⁴Ne tun y'a kɛ kuntigi ni fangatigi ye siyaw kunna. N tɛmɛna ale fɛ ka n ka setigiya yira siya wɛrɛw la.

⁵Ayiwa, aw tun te siya minw lɔn, aw bena olu wele. Siya minw tun t'aw lɔn, olu bena boli ka na aw fɛ Masaba aw ka Ala kosɔn, Isirayɛli ka Ala kosɔn. Sabu a ye boɲa la aw kan.»

⁶Aw ka Masaba yɔrɔ ɲini a sɔrɔtuma na. Aw k'a wele k'a to a yɔrɔ man jan.

⁷Mɔgɔjugu k'a ka juguya dabila. Mɔgɔ min kɔnɔ ka jugu, o tigi k'a ka miirijugu dabila. A ka kɔsegi Masaba ma, ale bena makari a la. A ka kɔsegi an ka Ala ma, ale bena yafa a ma tiɲɛ na.

⁸«Aw ka miiriya ni ne ta te kelen ye, aw ka kokɛcogow ni ne ta te kelen ye.» Masaba le ko ten.

⁹«Sankolo ni dugukolo yɔrɔ ka jan ɲɔgɔn na cogo min na, o cogo kelen na, aw ka kokɛcogow n'aw ka miiriyaw, ni ne ta cɛ ka jan ɲɔgɔn na.

¹⁰ Sanji, walima sanmurumuru be bɔ sankolo la ka jigi, a te kɔsegi ka yɛlɛ sanfɛ n'a ma dugukolo ɲigi, n'a ma fɛɛnw falen, n'a ma sumansi di sɛnɛkɛla ma, n'a ma balofɛn di dumunikɛla ma cogo min na,

¹¹ne ka kuma be o cogo kelen na. N'a bɔra ne daa la ka ban, a te kɔsegi ne fɛ n'a m'a bɔkun kɛ. Min ka di ne ye, a te kɔsegi n'a m'o kɛ. Ne y'a fɔ kuun min na, fɔɔ o ka kɛ ka dafa.»

¹²Tiɲɛ na, aw bena bɔ Babilɔni ni nisɔndiya ye, aw bena taga hɛrɛ la. Aw ka tɛmɛsira kan, kuluw ni tintinw bena nisɔndiyapɛrɛnkan bɔ, kongo kɔnɔ yiriw bɛɛ bena tɛgɛrɛ fɔ.

¹³Sipɛrɛyiri ni yiri kasadiman bena falen ŋɔniyiri nɔɔ na. O bena kɛ Masaba tɔgɔ boɲafɛn ye, o bena kɛ taamasiɲɛ ye min tena tunu fewu!