Read dyu Ezayi ka kitabu 6 Bible Online

Ezayi ka kitabu 6 - dyu bible

Ezayi ka kitabu 6

¹ Masacɛ Oziyasi sara saan min na, ne ye Masaba siginin ye masasigilan dɔ kan min tun ka jan kosɔbɛ. A ka delekeba dakun ye Alabatoso fa.

²Mɛlɛkɛ sifa dɔ, minw be wele serafɛn, olu lɔnin tun b'a sanfɛ. U kelen kelen bɛɛ be ni gaman wɔɔrɔ wɔɔrɔ ye. U be fila kɛ k'u ɲaa datugu, ka fila kɛ k'u fari datugu, ka pan ni fila ye.

³ U tun be pɛrɛn ka to k'a fɔ ɲɔgɔn ye ko: «Senuman, senuman, senuman ye Masaba ye, Setigi! A ka nɔɔrɔ ye dugukolo bɛɛ fa.»

⁴ U pɛrɛnkan fɛ, daa koonw donyɔrɔw yuguyugura, Alabatoso fara sisi la.

⁵Ne y'a fɔ ko: «Bɔnɛ ye ne ta ye! Ne ta cɛnna! Bari, ne ye mɔgɔ min ye, n daa ma ɲi. Ne be mɔgɔ minw cɛma, olu fana daa ma ɲi. Ani ne ɲaa lara Masa kan, Masaba, Setigi kan.»

⁶Serafɛn nunu kelen panna ka na ne faan fɛ ni takami y'a bolo. A tun y'o ta sarakabɔyɔrɔ la ni nigɛ ye.

⁷A y'a maga ne daa la k'a fɔ ko: «Nin magara i daa la minkɛ, kabini sisan i ka kojuguw kunko bɔra i kan. I filila koo minw na, i y'o yafa sɔrɔ.»

⁸O tuma na, ne ye Masaba kumakan mɛn. A y'a fɔ ko: «Ne bena jɔn ci? Jɔn le bena taga an ka cira la?» Ne y'a fɔ ko: «Ne filɛ nin ye. Ne ci.»

⁹ A y'a fɔ ko: «Tag'a fɔ jama nin ye ko u k'u tulo malɔ, nga u tena foyi faamu, u ka filɛli kɛ kosɔbɛ, nga u tena foyi ye.

¹⁰A kɛ jama nin tulo ka gwɛlɛya! U tulow geren k'u ɲaaw nɔrɔ! U kana yeli kɛ, u kana mɛnni kɛ. U kana foyi faamu, u kana se ka nimisa ka faran u ka kojuguw la, ka kɛnɛya.»

¹¹Ne y'a fɔ ko: «Fɔɔ waati jumɛn sa, Matigi?» A ye ne jaabi ko: «Fɔɔ ni duguw cira, mɔgɔ kana sɔrɔ u kɔnɔ, mɔgɔ kana sɔrɔ boonw kɔnɔ, dugukolo ka cɛn ka kɛ dusukasiyɔrɔ ye.»

¹²Masaba bena mɔgɔw bila ka taga yɔrɔjan. Yɔrɔ caaman lakolon bena to jamana kɔnɔ.

¹³Hali ni jama nin tilan tannan kelen le tora, tasuma le bena olu jɛni, i ko joyiriba min tigɛra, a juu dama le be to yen. O juu nin le be segi ka kɛ fɛɛn ɲanaman ye Ala fɛ.