Read dyu Ezayi ka kitabu 60 Bible Online

Ezayi ka kitabu 60 - dyu bible

Ezayi ka kitabu 60

¹Zeruzalɛmu, wili ka lɔ i yeelen ka bɔ. Bari, e ka yeelen filɛ nin ye. Masaba ka nɔɔrɔ b'i kan.

²K'a sɔrɔ, dibi ye dugukolo minɛ, dibi ye siyaw datugu. Nga Masaba bena to ele kunna, a ka nɔɔrɔ b'i kan.

³Siya wɛrɛw bena na i ka yeelen faan fɛ, masaw bena na i ka kɛnɛ bɔtɔkura faan fɛ.

⁴I kuun kɔrɔta ka filɛli kɛ i lamini na, i deenw bɛɛ natɔ filɛ: u be lajɛnna i fɛ. U bɔra fɔɔ yɔrɔjan. U be segira n'i denmusow ye u gamanw kan.

⁵O yeko bena i nisɔndiya haali! I dusu bena diya kosɔbɛ. U bena kɔgɔji tigɛ ka na ni siya wɛrɛw ka nafolo ye i fɛ.

⁶Ɲɔgɔmɛ caaman bena na i ka yɔrɔ fa, u bɔra Madiyan ni Ɛfa le. Sabakaw bɛɛ bena na ni sanu ni wusulan ye. U bena to ka Masaba tanu.

⁷Kedariw ka begɛnw bɛɛ bena ɲɔgɔn lajɛn i fɛ, Nebayɔtikaw ka sagajigiw be kɛ i ka bila la. U bena o kɛ saraka ye a ka sarakabɔyɔrɔ kan, o bena diya a ye fana. A bena boɲa la a ka soo kan.

⁸Nunu ye jɔnw ye? U be tɛmɛna i ko sankaba, u be i ko tuganin minw be tagara ɲaga kɔnɔ.

⁹Jii cɛma dugukolo kan mɔgɔw be nana ne fɛ, kurunbabaw le be ɲafɛ. U be nana n'i deenw ye ka bɔ yɔrɔjan, n'u ka warigwɛ, n'u ka sanu ye. U be nana boɲa la Masaba e ka Ala kan, Isirayɛli ka Ala, ale min ye boɲa la i kan.

¹⁰Masaba ko: «Jamana wɛrɛ mɔgɔw le bena i laminikogo lɔ, u ka masaw bena baara kɛ i ye. Bari, dimikojugu fɛ, ne tun y'i tɔɔrɔ. Nga sisan a diyara ne ye ka makari i la.

¹¹ I daaw yɛlɛnin bena to tuma bɛɛ, suu fara tile kan, u tena tugu, janko u ka don ni siyaw ka nafolow ye, u ka masaw ka tugu ɲɔgɔnw kɔ ka don.

¹²«Ni siya min, walima jamana min banna ka baara kɛ i ye, ale be halaki, a bena cɛn pewu.

¹³Liban ka nɔɔrɔ bena kɛ aw ta ye. U bena Liban yiriɲuman sɔngɔgwɛlɛnw ta ka ne ka sigiyɔrɔ masiri n'o ye. Ne bena boɲa la n sigiyɔrɔ kan.

¹⁴ I tɔɔrɔbagaw deenw bena na biri i kɔrɔ. Minw bɛɛ tun b'i lɛɛbura, olu bena biri k'u teen gwan i ɲafɛ. U bena i wele ko Masaba ka dugu, Isirayɛli ka Ala ka *Siyɔn.

¹⁵I koo tun goyara mɔgɔw ye, u y'i fili, hali mɔgɔ si tun te tɛmɛ i fɛ. Nga ne bena i kɛ kunkɔrɔtafɛn ye tuma bɛɛ, ne bena i kɛ waati bɛɛ mɔgɔw ka nisɔndiya bɔyɔrɔ ye.

¹⁶Siya wɛrɛw n'u ka masacɛw bena janto i la i ko muso n'a ka denɲɛnin. O la, i ben'a lɔn ko i kisibaga ye ne Masaba ye, i kunmabɔbaga ye Yakuba ka Setigi ye.

¹⁷Ne ben'a to u be na ni sanu ye zira nɔɔ na, ka na ni warigwɛ ye nigɛ nɔɔ na, u ka na ni zira ye lɔgɔ nɔɔ na, u ka na ni nigɛ ye kabakuru nɔɔ na. Hɛrɛ ni tilenninya le bena bila aw ɲa.

¹⁸Benkanniko tena mɛn i ka jamana kɔnɔ tugu. Cɛnni, ani halakili tena mɛn tugu fɔɔ ka ta'a bila i ka yɔrɔ daan na. I laminikogo tɔgɔ bena la ko Kisili, a dondaw bena wele ko Tanuli.

¹⁹ Tile tena kɛ i ka yeelen ye tilefɛ tugu, kalo tena kɛ i ka yeelen ye sufɛ fana. Ne Masaba bena kɛ i ka yeelen ye tuma bɛɛ. Ne, i ka Ala bena kɛ i ka dawula ye.

²⁰I ka tile tena ben tugu, i ka kalo tena don dibi la tugu. Bari, ne Masaba bena kɛ i ka yeelen ye tuma bɛɛ. I ka dusukasi bena ban.

²¹I deenw bɛɛ lajɛnnin bena kɛ mɔgɔtilenninw ye, dugukolo bena kɛ u ta ye kudayi. U ye ne ka yiri tutuninw ye, ne y'u dan ne boɲa kama.

²²Denbaya min mɔgɔw man ca, olu bena buguya ka se waa kelen ma. Siya min fanga ka dɔgɔ, olu bena kɛ setigiw ye. N'o kɛwaati sera, ne Masaba le bena teliya k'o kɛ.»