Read dyu Ezayi ka kitabu 62 Bible Online

Ezayi ka kitabu 62 - dyu bible

Ezayi ka kitabu 62

¹*Siyɔn kama, ne tena je. Zeruzalɛmu kama, ne tena se ka sigi yɔrɔ kelen. Fɔɔ a ka tilenninya ka ye i ko dugugwɛ kɛnɛ, a kisiko ka manamana i ko kala mananin.

² Siya wɛrɛw bena aw ka tilenninya lɔn, masaw bɛɛ bena aw ka dawula ye. U bena aw ka dugu wele ni tɔgɔkura ye, Masaba bena min di.

³I bena kɛ i ko masafugulanɲuman, Masaba bolo. I bena kɛ masa kunmelekefani ye i ka Ala bolo.

⁴Mɔgɔw tena i wele tugu ko Dugu labilanin, u ten'a fɔ aw ka dugukolo ma tugu ko Yɔrɔlakolon. Nga u bena i wele ko Masaba diyanadugu, k'i ka dugukolo wele ko Muso furunin. Bari i koo bena diya Masaba ye, a bena kɛ i fɛ i ko cɛɛ.

⁵Kanbelen be sunguru furu cogo min na, i kɔnɔ mɔgɔw bena i furu ten. Maminɛcɛ be nisɔndiya a ka maminɛmuso kosɔn cogo min na, i ka Ala bena nisɔndiya i kosɔn ten.

⁶Ne ye kɔlɔsilikɛbagaw bila e Zeruzalɛmu laminikogo kan. Suu fara tile kan, u tena je. Aw minw be to ka Masaba hakili jigi Zeruzalɛmu koo la, aw tena lafiɲɛ fewu.

⁷Aw tena to ɲasuma na fana fɔɔ a ka Zeruzalɛmu lalaga, fɔɔ a k'a kɛ tandofɛn ye dugukolo kan.

⁸Masaba kalila ko: «Ne ka setigiya kosɔn, ne ten'a to aw juguw b'aw ka suman dumu tugu. Lonanw tena aw ka duvɛnkɛnɛ min tugu, aw sigɛnna minw baara la.

⁹Ni minw ye suman tigɛ, u bena o dumu, ka barika la ne Masaba ye. Ni minw ye *ɛrɛzɛn cɛ, u bena o duvɛn min ne batoso luuw kɔnɔ.»

¹⁰ Zeruzalɛmukaw, aw ye bɔ! Aw ye bɔ, ka sira bɔ nabagaw ye. Aw ka sira dingɛyɔrɔw datugu. Aw ka kabakuruw walo ka bɔ yen. Aw ka taamasiɲɛ bila siya wɛrɛw ye!

¹¹ Masaba be min fɔra, o bena mɛn fɔɔ diɲɛ daan na ko: «Aw k'a fɔ Siyɔnkaw ye k'u kisibaga be nana. A be nana n'a ka sara ye, a ka baara tɔnɔ fana b'a ɲa.»

¹²U bena u wele ko Siya senuman, Masaba ye minw kunmabɔ. U bena i wele ko Madiyadugu, Dugu min labilanin tɛ.