Read dyu Ezayi ka kitabu 63 Bible Online

Ezayi ka kitabu 63 - dyu bible

Ezayi ka kitabu 63

¹ Jɔn be nana ten ka bɔ Edɔmu mara la, ka bɔ Bɔsira dugu kɔnɔ ni faniwulen b'a kaan na? Fani ɲanaman b'a kaan na, a b'a yɛrɛ wongora, a taamatɔ, a jigi b'a ka fanga kan. Masaba ko: «Ne lo, ne nana ka kiti tilennin tigɛ ka n ka mɔgɔw kisi.»

²Mun na i ka fani wulenna i ko *ɛrɛzɛn nɔɔnibaga ta?

³ «Ne ye ɛrɛzɛn nɔɔni n kelen, mɔgɔ si tun te ni ne ye ka bɔ siyaw cɛma. Ne y'u nɔɔni dusudimi fɛ, ne y'u dɔn dimikojugu fɛ. U jii serila ne ka fani kan, ne ka fani bɛɛ wulenna ten.

⁴Bari ne tun b'a fɛ ka n mɔnɛ bɔ, ne ka mɔgɔw kunmabɔsan le sera.

⁵ Ne ye filɛli kɛ, ne ma dɛmɛbaga si ye. Ne kabakoyara bari mɔgɔ ma sɔrɔ min bena n dɛmɛ. N dimikojugu ye barika don n la, ne ye see sɔrɔ.

⁶Dusudimi y'a to ne ye siyaw halaki, ne y'u tɔɔrɔ dimikojugu fɛ, ne y'u joli bɔn dugukolo kan.»

⁷Ne bena Masaba ka ɲumanya koo fɔ. A ye koo min bɛɛ kɛ anw ye, ne ben'a tanu o kama. A ye koɲuman caaman kɛ Isirayɛlidenw ye a ka makari n'a ka ɲumanyaba kosɔn.

⁸A ko: «Sɔbɛ la, u kɛra ne ka jama ye. Deen minw lo, u tena ne janfa.» O la, a kɛra u kisibaga ye

⁹u ka tɔɔrɔwaatiw bɛɛ la. A ma mɔgɔ si ci ka na u kisi, ale yɛrɛ le y'u kisi. A b'u kanu, a be makari u la, o la, a y'u kunmabɔ. A y'u ɲun, a y'u ta fɔlɔfɔlɔ tilew bɛɛ la.

¹⁰Nga olu murutira, o ma diy'a ka Nii Senuman ye fewu, o la, a yɛlɛmana ka kɛ u jugu ye, a y'u kɛlɛ.

¹¹O tuma la, u hakili jigira fɔlɔfɔlɔ tile la. U hakili jigira Masaba ka baarakɛla Musa la. Tigi min y'a ka jama n'u ɲamɔgɔw tigɛ kɔgɔji la, o tigi be min? Min ye a ka Nii Senuman d'u ma, o tigi be min?

¹² Ale lo tun be Musa kinibolo fɛ n'a b'a ka sebagaya yirala. Ale lo ye baji cɛtigɛ fila u ɲa ka tɔgɔba sɔrɔ min koo fɔli tena ban.

¹³Ale lo y'a kɛ u ye jiba tigɛ i ko soo be tɛmɛna kongokolon kɔnɔ cogo min na, n'a te talon.

¹⁴Masaba ka Nii tun b'u bilara sira lafiɲɛyɔrɔ le, i ko begɛnkulu min be jigira kɔkɛnɛ la. E y'u ka jama bila sira ten ka tɔgɔba sɔrɔ.

¹⁵K'i to i sigiyɔrɔɲuman senuman na sankolo la, i ka filɛli kɛ! I ka kanuyaba, n'i ka fanga be min? I ka hinɛ n'i ka makari tagara min?

¹⁶Ele lo ye an Faa ye. Ibrayima t'anw lɔn do, Isirayɛli t'anw lɔn fana. Ele, Masaba le ye an Faa ye. Ele le ye an kunmabɔbaga ye, kabini tumajan, o le y'i tɔgɔ ye.

¹⁷Masaba, mun na i b'an to yen, an yɔrɔ be taga jaɲa i ka sira la, an dusu be taga gwɛlɛya fɔɔ an te siran i ɲa? Kɔsegi ka na i ka baarakɛlaw kosɔn, i ka jama kosɔn.

¹⁸Jamana min kɛra e ka jama niyɔrɔ ye, o ma to an bolo ka mɛn. An juguw y'i sigiyɔrɔ mafiɲɛya.

¹⁹Kabini tumajan, i ma kɛ an ka masacɛ ye, a kɛra i ko i tɔgɔ yɛrɛ ma la an ka siya kan. Ee! N'i tun ye sankolo faran ka jigi kɔni, kuluw tun bena yɛrɛyɛrɛ i ɲa!