Read dyu Ezayi ka kitabu 65 Bible Online

Ezayi ka kitabu 65 - dyu bible

Ezayi ka kitabu 65

¹ Masaba ko: «Mɔgɔ minw tun te foyi ɲinina ne fɛ, ne ye n yɛrɛ yira olu la. Mɔgɔ minw tun te ne yɔrɔ ɲinina, ne y'a to olu ye ne ye. Siya min tun te ne daali, n tun y'a fɔ u ye ko: ‹Ne filɛ, ne be nana.›

² Ne tilera ka n bolo di siya murutinin nin ma, minw be sirajugu kan, n'u b'u yɛrɛ sago kɛra.

³Koo minw be ne dimi, u be to k'o le kɛ n ɲaa na. U be taga sɔnni kɛ tuuw kɔnɔ, u be wusulanw jɛni sarakabɔyɔrɔ kan min lɔra ni kabakuru ye.

⁴U be sigi kaburutuw la, u be si kuluwo kɔnɔ. U be lɛsogo ɲimi, Dumuni min saniyanin tɛ, u b'o lo don u ka minanw kɔnɔ.

⁵U be to k'a fɔ ko: ‹Kana gwɛrɛ n la, bari ne saniyanin lo, o be se k'i faga.› O koo nunu be ne dusu gwan i ko tasuma.

⁶Heyi! O koo nunu sɛbɛnnin lo ne ɲakɔrɔ dɛ! O la, ne tena je ka to ten. Wajibi fɔɔ ne k'o bɛɛ jurusara bɔ u la. Ne bena n dimi bɔ u la.

⁷K'u ka kojuguw, n'u faaw taw jurusara bɔ waati kelen na. Ne Masaba ko ten. U tun be taga wusulanw jɛni kuluw kan, u tun b'u ɲaa don ne la tintinw kan. O la, ne bena u ka kɛwali kɔrɔmanw juru sara u ye.»

⁸Masaba ko: «Ni mɔgɔ ye *ɛrɛzɛn sɔrɔ jii be min na, u b'a fɔ ko: ‹Aw kan'a cɛn, bari duvɛn diman bena sɔrɔ a la.› N ben'a kɛ ten n ka baarakɛlaw kosɔn, ne tena u bɛɛ halaki.

⁹Ne bena kɔmɔgɔ dɔw bɔ Yakuba la, ne bena u bɔ Zuda la u ka kɛ ne ka kuluw tigiw ye. Ne ye mɔgɔ minw woloma, u bena kɛ olu ta ye. Ne ka baarakɛlaw bena sigi yen.

¹⁰ Sarɔn mara bena kɛ begɛnmisɛnw ka dumunikɛyɔrɔ ye, Akɔri kɔkɛnɛ bena kɛ misiw ka lafiɲɛyɔrɔ ye. N bena o kɛ n ka mɔgɔw ye. Ne yɔrɔ ɲinibagaw ye.

¹¹Nga aw minw banna ne Masaba la, aw minw ɲinɛna ne ka kulu senuman kɔ, ka to ka taga joo Gaadi sɔn ni dumuni ye, ka to ka taga joo Meni sɔn ni duvɛn ɲagaminin ye, [1]

¹²ne be aw kɛ murujan ta ye. Aw bɛɛ bena aw kunbiri gwan, u b'aw kaan tigɛ. Bari, ne tun ye weleli kɛ, nga aw m'a laminɛ. Ne tun kumana, aw m'aw tulo malɔ. Aw ye kojugu kɛ ne ɲakɔrɔ. Koo min man di ne ye, aw tora k'o le kɛ.

¹³O kama, ne Matigi, Masaba ko: Ne ka baarakɛlaw bena dumuni kɛ, aw bena to kɔngɔ la. U bena minni kɛ, aw bena to minnɔgɔ la. U bena nisɔndiya, aw bena to maloya la.

¹⁴U dusu diyanin bena pɛrɛn, aw dusu kasinin bena kule. Aw nii tɔɔrɔnin bena kasi kosɔbɛ.

¹⁵Ni ne ka mɔgɔw bena mɔgɔ dɔ danga, u bena aw tɔgɔ le wele ka tila k'a fɔ ko: ‹Matigi, Masaba k'i faga.› Nga a bena tɔgɔ wɛrɛ di a ka baarakɛlaw ma.

¹⁶Ni mɔgɔ o mɔgɔ ko a be duba kɛ jamana kɔnɔ, a bena o kɛ ni Tiɲɛtigi Ala tɔgɔ ye. Ni min ko a bena kali, a bena kali ni Tiɲɛtigi Ala tɔgɔ ye.» Tiɲɛ na, fɔlɔfɔlɔ tɔɔrɔw koo tena to hakili la, u bena tunu ka bɔ n ɲakɔrɔ.

¹⁷ Masaba ko: «Ne bena sankolokura, ni dugukolokura dan. Mɔgɔw tena miiri koo tɛmɛninw na tugu, o tena na u hakili la tugu.

¹⁸Ne bena min dan, aw ka nisɔndiya kosɔbɛ tuma bɛɛ o kosɔn. Bari ne bena Zeruzalɛmu kɛ nisɔndiyayɔrɔ ye. A kɔnɔ mɔgɔw bena nisɔndiya kosɔbɛ.

¹⁹ Ne bena nisɔndiya Zeruzalɛmu kosɔn, ne dusu bena diya n ka jama kosɔn. Kasikan ni kulekan tena mɛn yen tugu abada!

²⁰Denɲɛninsanga tena bɔ yen tugu. Ni mɔgɔkɔrɔba min ma se a ka loon ma, o tena sa fewu. Ni min sara k'a sii to saan kɛmɛ, o tigi be jati denmisɛn ye. Ni min sara n'a sii ma saan kɛmɛ bɔ, o be jati dangaden ye.

²¹U bena soow lɔ ka sigi u kɔnɔ. U bena *ɛrɛzɛnforow bɔ k'u deen dumu.

²²U tena soow lɔ tugu janko mɔgɔ wɛrɛ be don u la. U tena yiriw tutu tugu janko mɔgɔ wɛrɛ k'u deen dumu. Bari, ne ka mɔgɔw bena sijan sɔrɔ i ko yiriw. Ne ka mɔgɔ wolomaninw bena u ka baara tɔnɔ dumu.

²³U tena sigɛn gwansan tugu, u tena deen wolo min ka kan ka sa joona tugu. U bena kɛ siya ye, ne Masaba yɛrɛ ye barika don min la, olu n'u deenw.

²⁴Sanni u ka ne wele, o y'a sɔrɔ ne y'u jaabi ka ban. Sanni u ka tila u ka daalili la, o y'a sɔrɔ ne y'u lamɛn ka ban.

²⁵ Kongowulu ni sagaden bena dumuni kɛ ɲɔgɔn fɛ, jara bena biin ɲimi i ko misi. Saaw tena cinni kɛ tugu. Kojugu, walima cɛnni tena kɛ ne ka kulu senuman yɔrɔ si la.» Masaba le ko ten.