Read dyu Ezayi ka kitabu 7 Bible Online

Ezayi ka kitabu 7 - dyu bible

Ezayi ka kitabu 7

¹ Oziyasi deen Yotamu dencɛ Akazi ka masaya tile la Zuda mara kunna, Siri masacɛ Eresin ni Eremaliyawu dencɛ Peka min ye Isirayɛli mara masacɛ ye, olu wilila ka na Zeruzalɛmu kama. Nga u ma se k'a minɛ.

²U taar'o kibaru fɔ Dawuda ka soo ko: «Siri kɛlɛdenw nana jigi Efarayimu mara la.» Akazi n'a ka jama kɔnɔ gwanna, fɔɔ u yɛrɛyɛrɛla i n'a fɔ fɔɲɔ be yiriw magamaga cogo min na tuu kɔnɔ.

³Masaba y'a fɔ Ezayi ye ko: «E n'i dencɛ Seyariyasubi ka bɔ ka taga Akazi kunbɛn. Jisira min be taga don Sanfɛdalan kɔnɔ, a be o daminɛyɔrɔ la, Fanikobaga ka foro sira daa la.

⁴I ben'a fɔ a ye ko: ‹I hakili sigi, kana siran! Kan'i fari faga Sirika Eresin ni Eremaliyawu dencɛ ka fariya kosɔn. U kɛra i n'a fɔ lɔgɔ fila, minw mananin lo.

⁵Siri jamana ni Eremaliyawu dencɛ ani Efarayimu mara bɛnn'a la i kama ko:

⁶An ka taga Zuda mara kama k'a kɛlɛ. An bena u sama ka far'an kan. An bena Tabeyɛli dencɛ sigi yen masaya la.

⁷Nga Matigi, Masaba ko: O koo nin tena se ka kɛ fewu.

⁸Bari, Siri jamana ka masadugu ye Damasi ye, Damasi masacɛ fana ye Eresin ye. Ayiwa, yanni saan bi wɔɔrɔ ni duuru, Efarayimu tena jati ka fara siyaw kan, a bena tunu.

⁹Efarayimu ka masadugu ye Samari ye, Samari masacɛ fana ye Eremaliyawu dencɛ ye. N'aw ma lɔ ka ɲa, aw tena to yen.› »

¹⁰Masaba y'a fɔ Akazi ye tugu ko:

¹¹«A ɲini ne Masaba e ka Ala fɛ ko n ka taamasiɲɛ dɔ yira i la ka bɔ lahara, walima fɔɔ sankolo la.»

¹²Akazi y'a jaabi ko: «Ne tena foyi ɲini. Ne tena Masaba kɔrɔbɔ.»

¹³O kɔ, Ezayi ko: «Dawuda ka soo ka mɛnni kɛ sa! Aw be ɲɔgɔnsɛgɛn min na, o ka dɔgɔ wa? N'aw be na n ka Ala fana sɛgɛn!

¹⁴ O la sa, Matigi yɛrɛ le bena taamasiɲɛ di aw ma. Ayiwa, sunguru dɔ be na kɔnɔ ta. A bena dencɛ wolo, k'a tɔgɔ la ko Emanuwɛli. [1]

¹⁵A bena balo ni naare ani lii ye, fɔɔ ka na koo lɔn, ka ban kojugu la, ka koɲuman kɛ.

¹⁶Nga sanni deen nin ka koo lɔn ko a be ban kojugu la ka koɲuman kɛ, i be siranna jamana min ka masacɛ fila ɲa, o yɔrɔ lakolon bena to.

¹⁷Masaba ben'a kɛ e n'i ka siya be loon dɔ ye, i faa ka soo ma min ɲɔgɔn ye ka tɛmɛ kabini Efarayimu faranna Zuda mara la. O ye koo ye min fɔra ka sin Asiri masacɛ nako ma.

¹⁸«O loon na, limɔgɔ minw be fɔɔ Ezipiti kɔda daan na, ani liden minw be Asiri jamana la, Masaba bena u wele ka na.

¹⁹U bɛɛ bena na sigisigi kɔbolo jigijigijuguw daa la, ni farawow la. U bena sigi tudenninw bɛɛ la, ni jiyɔrɔw bɛɛ la.

²⁰O loon na, Matigi bena serefɛ ta fɔɔ Efarati baji kɔ. O serefɛ ye Asiri masacɛ ye. A bena ale kɛ k'aw kuun li, k'aw sensiw li, ani aw bonbosiw fana.

²¹O waati la, mɔgɔ kelen kelen bɛɛ ka begɛn balotaw bena kɛ misi kelen, ani baa fila ye.

²²Nɔnɔ cayakojugu kosɔn, mɔgɔw bena to ka naare dumu. Tiɲɛ na, minw bɛɛ bena to jamana kɔnɔ, olu balofɛn bena kɛ naare, ni lii le ye.

²³O waati la, foro o foro kɔnɔ ni *ɛrɛzɛnsun waa kelen be sɔrɔ, n'o sɔngɔ ka kan ka kɛ warigwɛ kuru waa kelen ye, o yɔrɔ bena fa ŋɔniw na.

²⁴U bena taga donsoya kɛ yen, ni kala ni biɲɛw ye. Bari jamana bɛɛ bena kɛ ŋɔniw ye.

²⁵Kulu minw bɛɛ tun be sɛnɛ ni daba ye, mɔgɔw tena taga yen ŋɔniw ɲasiran kosɔn. O bena kɛ misiw dɛndɛyɔrɔ ye, ani sagaw ka dumunikɛyɔrɔ ye.»