Read dyu Ezayi ka kitabu 8 Bible Online

Ezayi ka kitabu 8 - dyu bible

Ezayi ka kitabu 8

¹Masaba y'a fɔ ne ye ko n ka sɛbɛba dɔ ta, k'a sɛbɛn a kan cogoɲuman na ko: «Aw ka teliya ka benkanni kɛ ka nafolo bɔsi.»

²O la, ne ye seeresɔbɛw ɲini: sarakalasebaga Uriya, ani Yebɛrɛkiyawu dencɛ Zakariyawu.

³O kɔ, ne gwɛrɛla kiramuso nin na, a ye kɔnɔ ta ka dencɛ wolo. Masaba ko ne ma: «A tɔgɔ la ‹Aw ka teliya ka benkanni kɛ ka nafolo bɔsi.›

⁴Bari, sanni deen nin ka se k'a fɔ: ‹Baba, baba. Naa, naa›, Damasi nafolo bena bɔsi, Samari ta be bɔsi ka taga u di Asiri masacɛ ma.»

⁵Masaba y'a fɔ ne ye tugu ko:

⁶«Jama nin banna Silowe jii ma, o jii min be woyo ɲamalɔ la, ka to k'u nisɔndiya Eresin koo la ani Eremaliyawu dencɛ koo la,

⁷o le kama, ne Matigi bena jiba bila ka n'u kan, jii caaman, ka bɔ Efarati baji la. Asiri masacɛ lo, a n'a ka fangatigiya bɛɛ. Baji bena caya, fɔɔ ka bɔ a dingɛ kɔnɔ, a bena yɛrɛkɛ a dagolo la yɔrɔ bɛɛ.

⁸A bena Zuda mara minɛ. Jii nin bena yɛlɛ, a bena se fɔɔ mɔgɔ kaan na. Jii nin bena fa ka woyo k'i ka jamana kɔnɔ boɲa bɛɛ ta. Emanuwɛli!»

⁹Siya wɛrɛw, aw ka yɛrɛyɛrɛ, aw jaa ka tigɛ! Yɔrɔjan mɔgɔw bɛɛ, aw ka mɛnni kɛ. Aw y'aw ka kɛlɛkɛminanw ta, aw jaa ka tigɛ. Aw y'aw ka kɛlɛkɛminanw ta, aw jaa ka tigɛ.

¹⁰Aw k'aw ka koo latigɛ, a bena cɛn! Aw k'aw ka miiriyaw fɔ, o kuma bena kɛ fuu ye! Bari, Ala be n'anw ye.

¹¹Masaba ka sebagaya fɛ, a kumana ne fɛ ka kangari la ne ye ko jama be sira min kan, ko ne kan'o ta.

¹² Ko u be min wele ko janfako, ko ne kan'a wele ten. Ko u be siran fɛɛn minw ɲa, ko ne kana siran o ɲa. Ko n kana siran o ɲa fewu.

¹³Aw k'a lɔn ko Masaba, Setigi ka senu, aw ka siran ale ɲa, aw ka yɛrɛyɛrɛ a ɲa.

¹⁴ Masaba Setigi ye tangayɔrɔ ye, nga a ye talonkabakuru ye fana. A bena kɛ Isirayɛli ni Zuda mara talonfarakulu ye. A bena kɛ jɔɔ ni jaan ye Zeruzalɛmukaw fɛ.

¹⁵A bena kɛ u caaman talonfɛn ye. U bena ben, u bena u kolow karikari. U bena don jaan kɔnɔ, a b'u minɛ.

¹⁶Seereyakuma nunu sɛbɛ datugu, ka n ka kalan nunu mara ka ɲa n ka kalandenw cɛma.

¹⁷ Ne be Masaba kɔnɔna, min y'a yɛrɛ dogo Yakuba kɔmɔgɔw la. Ne jigi b'ale lo kan.

¹⁸ Masaba ye deen minw di ne ma, ne ni olu kɛnin be taamasiɲɛw ye Isirayɛlidenw fɛ, ani koo nata yirafɛnw ye Masaba, Setigi tɔgɔ la. Min sigiyɔrɔ be *Siyɔn kulu kan.

¹⁹Dɔw b'a fɔ ko: «Mɔgɔ ka kan ka taga sukɔrɔ welebagaw ni lagwɛlikɛlaw fɛ, minw be to ka ŋunuŋunu. Ko siya man kan k'u ka joow ni sukɔrɔw ɲininga, nimanw ka hɛrɛ koo la wa?» Ni u y'o fɔ aw ye,

²⁰aw k'u jaabi ko u ka mɛnni kɛ Masaba ka kuma la. Ni mɔgɔ minw ka fɔta ma bɛn o ma, olu yɔrɔ ka jan kɛnɛ la.

²¹Jama sɛgɛnninba bena yaalayaala jamana kɔnɔ, u kɔnɔbara lakolon. Kɔngɔ sababu la, u bena dimi k'u ka masacɛ nɛni, k'u ka Ala nɛni. U bena filɛli kɛ sanfɛ,

²²ka tila ka filɛli kɛ duguma. U tena foyi sɔrɔ yen ni dusukasi tɛ, ani dibi, ni hakiliɲagamiko. U bena fili ka to dibi la pewu.

²³ Nga minw tun be dusukasi la, olu ka ɲanafin banna. Masaba tun ye maloya bila Zabulɔn ni Nɛfutali mara kan fɔlɔfɔlɔ. O kɔ, a ye boɲa la Zurudɛn baji kɔrɔn fɛ, ni siya min be kɔgɔjida la, ani siya wɛrɛw ka mara kan min ye Galile mara ye.