Read dyu Ezayi ka kitabu 9 Bible Online

Ezayi ka kitabu 9 - dyu bible

Ezayi ka kitabu 9

¹ Dibilamɔgɔw ye yeelenba ye. Siya min tun siginin be jamana dibinin kɔnɔ, yeelen bɔra u ye.

²Masaba, i y'u nisɔn diya kosɔbɛ. E y'u dusu diya haali! U be nisɔndiyara i ɲakɔrɔ i ko sɛnɛkɛlaw, suman tigɛtuma la. U be nisɔndiyara i ɲakɔrɔ i ko nisɔndiya min be kɛ juguw bololafɛnw tilantuma la.

³Bari, jɔnyazu min tun be u kaan na, bere min tun lanin be u kan, n'u kuntigiw ka dakun, i y'olu kari i ko see sɔrɔla madiyanw kan loon min na.

⁴Kɛlɛdenw be sanbara minw don ka taga kɛlɛ la, joli kɛra u ka fani minw bɛɛ kan, olu bɛɛ ka kan ka jɛni, olu bena kɛ tasuma niyɔrɔ ye.

⁵Bari, deen dɔ wolola an fɛ, dencɛ dira an ma. Masaya dir'a ma. A bena wele ko Ladibagasɔbɛ, Ala Fangatigi, Waati bɛɛ Faa, Hɛrɛtigi.

⁶ A ka fanga bena boɲa, a ka masaya hɛrɛ tena ban. A bena to Dawuda ka masasigilan kan masaya la. A bena o masaya sabati, ka barika don a la tiɲɛ, ni tilenninya la kabini sisan ni tuma bɛɛ. Masaba, Setigi bena o kɛ bari a jijanin lo o kama.

⁷Matigi ye kuma dɔ fɔ Yakuba kɔmɔgɔw kama, o koo kɛra Isirayɛli mara la.

⁸Jama bɛɛ lajɛnnin ben'o koo lɔn. Efarayimu mara mɔgɔw ni Samarikaw ben'o lɔn, minw b'u yɛrɛ boɲa n'u b'a fɔra ko:

⁹«Kogo bɔgɔlaman benna, nga an ben'a lɔ ni kabakuru lɛsɛninw ye. Torosun banabiriw karila, an bena sɛdiriyiri banabiriw kɛ u nɔɔ na.»

¹⁰Masaba y'u juguw wili u kama. A ye jagwɛlɛya di u kɛlɛbagaw ma.

¹¹Sirikaw ka bɔ kɔrɔn fɛ, ani filisiw ka bɔ tileben faan fɛ, u ye Isirayɛli mara kunu yɛrɛ le! O n'a ta bɛɛ, Masaba ka dimi ma ban, halibi, a bolo wilinin be sanfɛ.

¹²Nga jama ma kɔsegi u bugɔbaga ma. U ma Masaba, Setigi yɔrɔ ɲini.

¹³O la, Masaba ye Isirayɛli kuun tigɛ, k'a kuu tigɛ. A ye tamarosunw ani burukuw tigɛ loon kelen!

¹⁴Cɛkɔrɔbaw ni mɔgɔbabaw le ye kungolo nin ye. Kira galontigɛlaw le ye kuu ye.

¹⁵Jama nin ɲamɔgɔw y'u lafili. U tun be minw ɲatilenna, olu kunnacɛnna.

¹⁶O kama, Matigi tena nisɔndiya u ka kanbelenw koo la, a tena makari u ka falatɔw n'u ka firiyamusow la. Bari, u bɛɛ kɛra Alaɲasiranbaliw ni mɔgɔjuguw ye, kumakolon le be bɔ u bɛɛ daa la. O n'a ta bɛɛ, Masaba ka dimi ma ban, halibi, a bolo wilinin be sanfɛ.

¹⁷Bari juguya ka fari i ko tasuma. A be ŋɔniw jɛni ka tuu mana, sisiba be wili sankolo la.

¹⁸Masaba, Setigi dimikojugu kosɔn, jamana halakira. Mɔgɔ kɛra i ko tasuma niyɔrɔ, mɔgɔ si t'a balima ye k'a to yen.

¹⁹Dumuni be kɛ kinibolo fɛ, o n'a ta bɛɛ, kɔngɔ te ban. Ɲimini be kɛ numanbolo fɛ, o n'a ta bɛɛ, fako kuma te fɔ. Bɛɛ b'a tɔɲɔgɔn sogo ɲimina.

²⁰Manase be Efarayimu ɲimina, Efarayimu fana be Manase ɲimina, u be jɛn Zuda kama. O n'a ta bɛɛ, Masaba ka dimi ma ban, halibi, a bolo wilinin be sanfɛ.