Read dyu Sarakalasebagaw ka kitabu 13 Bible Online

Sarakalasebagaw ka kitabu 13 - dyu bible

Sarakalasebagaw ka kitabu 13

²«Ni mɔgɔ fari yɔrɔ dɔ fununa, walima n'a fari kurukurula, walima ni yɔrɔ nugunin bɔr'a fari la, ka kɛ i n'a fɔ farisogobana, u ka na n'o tigi ye sarakalasebaga Arɔn fɛ, walima a dencɛ dɔ fɛ, min ye sarakalasebaga ye.

³Sarakalasebaga k'o fari dimiyɔrɔ filɛ. Ni dimiyɔrɔ nin sii gwɛra, n'a y'a ye k'o yɔrɔ nin jiginin lo dɔɔni ka kɛ dingɛ ye, o ye farisogobana ye. N'a y'a filɛ ka ban, a k'a fɔ k'o tigi nɔgɔnin lo.

⁴N'a y'a ye k'o yɔrɔ gwɛnin lo, n'a ma jigi ka kɛ dingɛ ye, n'o yɔrɔ sii fana ma gwɛ, sarakalasebaga ka banabagatɔ nin bila yɔrɔ dɔ la a danna tile wolonwula kɔnɔ.

⁵Tile wolonwulanan loon, sarakalasebaga k'a filɛ. N'a y'a ye ko yɔrɔ nin ma taga ɲa, a ma jɛnsɛn a fari la, a k'a tigi bila a danna tile wolonwula tugu.

⁶Ni tile wolonwula dafara tugu, sarakalasebaga ka segi k'a filɛ. Ni yɔrɔ nin tununa dɔɔni, n'a ma jɛnsɛn a fari la, sarakalasebaga k'a fɔ k'o tigi saniyanin lo, yɔrɔ kurukurunin dama lo. A tigi k'a ka faniw ko, o kɔ, a be saniya.

⁷Nga ni sarakalasebaga y'a filɛ ka ban, yɔrɔ kurukurunin nin ka sɔrɔ ka jɛnsɛn a fari la, a ka segi ka n'a yɛrɛ yira sarakalasebaga la.

⁸Ale k'a filɛ. Ni yɔrɔ nin boɲan'a fari la, sarakalasebaga k'a fɔ k'o tigi nɔgɔnin be. Farisogobana lo.

⁹«Ni farisogobana be mɔgɔ min na, u ka taga n'a ye sarakalasebaga fɛ,

¹⁰ale k'a filɛ. N'a tigi fari yɔrɔ dɔ fununa, n'a gwɛra, ni o yɔrɔ sii fana gwɛra, n'a faribugu be ye,

¹¹o ye farisogobana ye min ban ka gwɛlɛ kosɔbɛ. Sarakalasebaga k'a fɔ ko a nɔgɔnin be. A kana o tigi bila a danna, bari a nɔgɔnin be ka ban.

¹²Nga ni sarakalasebaga y'a ye k'o bana jɛnsɛnn'a fari bɛɛ la, k'a ta a kuun na fɔɔ ka ta'a bila a seen na,

¹³sarakalasebaga k'a filɛ. Ni bana nin b'a tigi fari yɔrɔ bɛɛ la, a k'a fɔ k'o tigi saniyanin lo. A yɔrɔ bɛɛ gwɛra minkɛ, a saniyanin lo.

¹⁴Nga u mana faribugu ye tuma min na, a be kɛ mɔgɔnɔgɔnin ye.

¹⁵Ni sarakalasebaga ye faribugu ye, a k'a fɔ k'o tigi nɔgɔnin be. Faribugu nɔgɔnin be, farisogobana lo.

¹⁶Ni o faribugu nin yɛlɛmana tuguni ka gwɛ, a tigi ka taga sarakalasebaga fɛ,

¹⁷ale k'a filɛ. Ni dimiyɔrɔ nin gwɛra, sarakalasebaga k'a fɔ k'o tigi saniyanin lo, ko a nɔgɔnin tɛ tugu.

¹⁸«Ni sumunin bɔra mɔgɔ farisogo la, ka tila ka ban,

¹⁹o kɔ, sumunin nin bɔyɔrɔ ka funu ka gwɛ, walima ka kɛ yɔrɔ nugunin ye, min wulenna dɔɔni ka gwɛ dɔɔni, o tigi k'a yɛrɛ yira sarakalasebaga la,

²⁰ale k'a filɛ. N'a y'a ye k'o yɔrɔ jiginin lo dɔɔni ka kɛ dingɛ ye, n'a sii gwɛra, a k'a fɔ k'o tigi nɔgɔnin be. Farisogobana lo, min be daminɛna sumunin nɔɔ na.

²¹Nga n'a y'a filɛ, k'a ye ko sii gwɛman t'a la, a ma jigi ka kɛ dingɛ ye fana, n'a ɲaa faganin lo dɔɔni, a k'o tigi bila a danna tile wolonwula kɔnɔ.

²²N'a y'a sɔrɔ bana nin jɛnsɛnna a fari la, sarakalasebaga k'a fɔ k'o tigi nɔgɔnin be, farisogobana lo.

²³Nga n'o yɔrɔ nugunin tora ten, a ma jɛnsɛn, o ye sumunin nɔɔ ye. Sarakalasebaga k'a fɔ k'o tigi saniyanin lo.

²⁴«Ni tasuma ye mɔgɔ dɔ jɛni, ni yɔrɔ nugunin dɔ bɔra jɛniyɔrɔ nin na, min wulenna dɔɔni ka gwɛ dɔɔni, walima min gwɛra,

²⁵sarakalasebaga k'a filɛ. Ni yɔrɔ nugunin nin sii gwɛra, n'a y'a ye k'o yɔrɔ nin jiginin be ka kɛ dingɛ ye, farisogobana lo. A bɔra jɛniyɔrɔ la. Sarakalasebaga k'a fɔ k'o tigi nɔgɔnin be, farisogobana lo.

²⁶Nga ni sarakalasebaga y'a filɛ, ni sii gwɛman te o yɔrɔ la, a ma jigi dɔɔni ka kɛ dingɛ ye, n'a ɲaa faganin lo dɔɔni, sarakalasebaga k'a tigi bila a danna tile wolonwula kɔnɔ.

²⁷A tile wolonwulanan loon, a k'a filɛ. Ni bana jɛnsɛnn'a fari la, a k'a fɔ k'o tigi nɔgɔnin be, farisogobana lo.

²⁸Nga n'a yɔrɔ nugunin tora ten, a ma jɛnsɛn a fari la, n'a ɲaa faganin lo dɔɔni, o tuma na, o yɔrɔ nin funun'a jɛniko kama. Sarakalasebaga k'a fɔ k'o tigi saniyanin lo, tasuma nɔɔ lo dɔrɔn.

²⁹«Ni joli bɔra cɛɛ, walima muso kuun na, walima a bonbo la,

³⁰sarakalasebaga k'o dimiyɔrɔ nin filɛ. N'a y'a ye ko a jiginin be ka kɛ dingɛ ye, ni siwulen dɔɔni b'a la, sarakalasebaga k'a fɔ k'o tigi nɔgɔnin be, kaba sifa dɔ lo, farisogobana lo a kungolo la, walima a bonbo kan.

³¹Nga ni sarakalasebaga y'o dimiyɔrɔ nin filɛ k'a ye ko a ma jigi ka kɛ dingɛ ye, sii finman t'a la, a k'o banabagatɔ nin bila a danna tile wolonwula kɔnɔ.

³²A tile wolonwulanan loon, a ka dimiyɔrɔ nin filɛ. Ni a ma jɛnsɛn, ni siwulen t'a la, n'a ma jigi ka kɛ dingɛ ye,

³³o tigi k'a kunsigi, walima a bonbosi li, nga a man kan ka yɔrɔ nin li. Sarakalasebaga k'a bila a danna ka tile wolonwula wɛrɛ kɛ.

³⁴Ni tile wolonwula dafara tugu, a k'a yɔrɔ filɛ. Ni kaba ma jɛnsɛn a tigi fari la, n'a y'a ye ko a ma jigi ka kɛ dingɛ ye, a k'a fɔ k'o tigi saniyanin lo. A k'a ka faniw ko, a be saniya.

³⁵Nga n'o kaba nin jɛnsɛnn'a fari la a fɔnin kɔ ko a saniyanin lo,

³⁶sarakalasebaga k'a filɛ. Ni kaba jɛnsɛnna o tigi fari la, kuun t'a la a ka siwulen filɛ tugu, a tigi nɔgɔnin be.

³⁷Nga n'a y'a ye ko kaba ma taga ɲa, ni sii finman bɔr'a la, kaba nin banna. A tigi kɛnɛyara ka ban. A saniyanin lo. Sarakalasebaga k'a fɔ ko a saniyanin lo.

³⁸«Ni yɔrɔ nugunin gwɛman dɔ bɔra cɛɛ, walima muso fari la,

³⁹sarakalasebaga k'a filɛ. Ni yɔrɔ nin gwɛra dɔɔni, bana nɔgɔman lo, a tigi saniyanin lo.

⁴⁰«Ni mɔgɔ dɔ kuun wulanna, n'a kuncɛ nɛmunin lo, o tigi saniyanin be.

⁴¹N'a tenda le wulanna, o tigi ye tenda wulannin ye, a saniyanin lo.

⁴²Nga ni joli bɔr'a kuncɛ wulannin nin na, walima a tenda wulannin nin na, ni o yɔrɔ wulenna dɔɔni ka gwɛ dɔɔni, farisogobana bɔtɔ lo a kuncɛ, walima a tenda la.

⁴³Sarakalasebaga k'a filɛ. Dimiyɔrɔ min fununin b'a kuncɛ, walima a tenda la, n'o wulenna dɔɔni ka gwɛ dɔɔni, i n'a fɔ farisogobana be cogo min na,

⁴⁴bana b'a la, a nɔgɔnin lo. Sarakalasebaga k'a fɔ ko a nɔgɔnin lo bana nin kosɔn min b'a kungolo la.

⁴⁵«Mɔgɔ min bananin be ten, a ka fani faranninw don, k'a kunsigi ɲagaminin to, a k'a bonbo datugu ka to ka pɛrɛn k'a fɔ ko: ‹Nɔgɔnin, nɔgɔnin!›

⁴⁶Bana b'a la waati min bɛɛ la, a nɔgɔnin be to o waati la. A be to a danna, a sigiyɔrɔ be kɛ jama ka sigiyɔrɔ kɔfɛ.

⁴⁷«Ni bugun bɔra fani min kan, sagasifani, walima fani min danna ni jese ɲanaman ye,

⁴⁸danfani fɛɛn o fɛɛn dilanna ni jese ɲanaman ye, walima ni sagasi ye, ni golo, walima fɛɛn o fɛɛn ye golo ye,

⁴⁹n'o yɔrɔ ɲaa kɛra binkɛnɛ ye, walima n'a wulenna o fani kan, danfani fɛɛn o fɛɛn lo, ani golo, walima fɛɛn o fɛɛn ye golo ye, o ye bugun ye. A ka kan ka yira sarakalasebaga la,

⁵⁰ale k'o yɔrɔ nin filɛ. A be fɛɛn min kan, a k'o bila danna tile wolonwula kɔnɔ.

⁵¹A tile wolonwulanan loon, a k'o yɔrɔ nin filɛ. N'a jɛnsɛnna fani nin kan, walima danfani fɛɛn o fɛɛn, walima fɛɛn o fɛɛn kɛra golo ye, o ye cɛnnikɛbugun ye, o fɛɛn nin nɔgɔra.

⁵²Bugun nin be fani min kan, a danna ni jese ɲanaman ye wo, walima sagasi ye, walima ni fɛɛn o fɛɛn ye gololaman ye wo, sarakalasebaga k'a jɛni, bari bugun nin be cɛnni kɛ. A k'a jɛni pewu.

⁵³Nga ni sarakalasebaga y'a filɛ k'a ye ko a ma jɛnsɛn fani kan, walima danfani nin, walima fɛɛn gololaman nin kan,

⁵⁴o tuma na, a k'a fɔ k'u ka fɛɛn nin ko. A k'a bila danna tile wolonwula wɛrɛ tugu.

⁵⁵O fɛɛn nin konin kɔ, sarakalasebaga k'a filɛ. Ni yɔrɔ nin ɲaa ma yɛlɛma, hali n'a ma jɛnsɛn, a nɔgɔnin lo. Nɔɔ nin kɛr'a ɲaɲuman kan wo, a ɲajugu lo wo, i k'a jɛni.

⁵⁶Ni sarakalasebaga y'a filɛ, k'a ye ko bugun nin ɲaa faganin lo dɔɔni fɛɛn nin konin kɔ, o tuma na, a k'a yɔrɔ faran ka bɔ fani na, walima fɛɛn gololaman nin, walima danfani nin na.

⁵⁷Nga o kɔ, ni bugun yera o fani nin kan tugu, walima o danfani nin kan, walima o fɛɛn gololaman nin kan, a be jɛnsɛnna tugu. Bugun be fɛɛn min kan, i k'o jɛni.

⁵⁸I ye fɛɛn o fɛɛn ko, a kɛra fani ye, walima danfani sifa o sifa, walima fɛɛn gololaman, n'o bugun bɔra, a ka ko tugu. O kɔ, a bena saniya.

⁵⁹«O ye sariya ye bugun koo la, min be bɔ sagasifani kan, walima fani ɲanaman, walima danfani sifa o sifa, walima fɛɛn gololaman kan. O b'a yira n'a saniyanin be, walima n'a nɔgɔnin be.»