Read dyu Sarakalasebagaw ka kitabu 14 Bible Online

Sarakalasebagaw ka kitabu 14 - dyu bible

Sarakalasebagaw ka kitabu 14

² «Sariya min be farisogobanatigi koo la a saniyalon na, o filɛ nin ye. U bena na n'a ye sarakalasebaga fɛ loon min na,

³sarakalasebaga ka bɔ ka taga jama ka sigiyɔrɔ kɔfɛ, k'a filɛ. Ni banabagatɔ nin kɛnɛyara,

⁴sarakalasebaga k'a fɔ ko u ka na ni kɔnɔ saniyanin fila ye minw ɲanaman lo, banabagatɔ nin tɔgɔ la, ka na ni sɛdirilɔgɔ dɔ ye fana, ni gaari wuleman ani *izɔpiyiri furaburu.

⁵A k'a fɔ k'u k'o kɔnɔw kelen kaan tigɛ bɔgɔdaga sanfɛ, jii ɲanaman be min kɔnɔ.

⁶Kɔnɔ min kaan tun tigɛra jii ɲanaman sanfɛ, i ka kɔnɔ tɔ kelen ɲanaman, ni sɛdirilɔgɔ, ni gaari wuleman ani izɔpiyiri furaburu nunu kori k'o sun o joli la.

⁷Cɛɛ min ka kan ka saniya, i ka joli nin seriseri ale kan siɲɛ wolonwula k'a fɔ ko a saniyara. O kɔ, i ka kɔnɔ ɲanaman dɔ nin bila ka taga kongo kɔnɔ.

⁸«O kɔ, a tigi k'a ka faniw ko k'a farisi bɛɛ li, ka ko, o la, a be saniya sariya faan fɛ. A be se ka segi jama ka sigiyɔrɔ la, nga a man kan ka don a ka fanibugu kɔnɔ fɔɔ tile wolonwula.

⁹A tile wolonwulanan loon, a k'a farisi bɛɛ li: a kunsigi far'a bonbosi, n'a ɲasi, n'a farisi tɔɔ bɛɛ kan. A k'a ka faniw ko, k'a yɛrɛ ko, a be saniya.

¹⁰A tile seeginan loon, a ka na ni sagajigi fila ye, fiɲɛ te minw na, ani sagamuso kelen, min ye saan kelen sɔrɔ ni fiɲɛ t'a la. A ka na ni mugu tɛntɛnnin kilo kɔnɔntɔn ye fana, a ye min ɲagami ni tulu ye, k'o kɛ suman saraka ye, ka na ni tulu litiri tilancɛ ye fana.

¹¹Sarakalasebaga min be saniyako kɛ, ale ka taga n'a tigi ye, ni sarakafɛn nunu ye Masaba ɲafɛ ɲɔgɔnkunbɛn fanibugu daa la.

¹²«O kɔ, sarakalasebaga ka sagaden kelen minɛ k'o bɔ fili yafa saraka ye k'o tulu litiri tilancɛ dɔ ta, k'u fila bɛɛ fifa Masaba ɲafɛ.

¹³Hakɛ yafa saraka ni saraka jɛnita begɛnw kaan be tigɛ yɔrɔ senuman min na, a ka sagaden nin kaan tigɛ o yɔrɔ la. Hakɛ yafa saraka ye sarakalasebaga ta ye cogo min na, fili yafa ta fana be ten. Sarakalasebaga ta lo. Fɛɛn saniyanin lo kosɔbɛ.

¹⁴Mɔgɔ min nan'a yɛrɛ saniyayɔrɔ la, sarakalasebaga ka fili yafa saraka nin joli dɔ ta k'a kɛ a tigi kinibolo tulo dakun kan, n'a kinibolo bolokunnadenba kan, ani a kinibolo senkunnadenba kan.

¹⁵A ka tulu nin dɔ yɛlɛma a yɛrɛ numanbolo la,

¹⁶k'a kinibolo bolokunnaden sun tulu nin na a numanbolo la, k'o seriseri Masaba ɲakɔrɔ n'a bolokunnaden ye siɲɛ wolonwula.

¹⁷Tulu tɔɔ min tor'a bolo la, a k'o dɔ kɛ a tigi kinibolo tulo dakun kan, n'a kinibolo bolokunnadenba kan, n'a kinibolo senkunnadenba kan, fili yafa saraka joli kɛra yɔrɔ minw na.

¹⁸Tulu tɔɔ min tora sarakalasebaga bolo, a k'o kɛ a kuun na, k'a tigi saniyako kɛ Masaba ɲakɔrɔ.

¹⁹O kɔ, sarakalasebaga ka hakɛ yafa saraka bɔ, k'a tigi ka nɔgɔ bɔ a la. O kɔ, a ka saraka jɛnita kaan tigɛ,

²⁰ka suman saraka fara o kan k'o bɔ saraka ye sarakabɔyɔrɔ kan, k'a saniyako kɛ. O la, a be saniya.

²¹«N'a tigi ye dɛsɛbagatɔ ye, n'a te se k'o fɛɛn nunu bɛɛ sɔrɔ, a ka na ni sagaden kelen ye k'a kɛ fili yafa saraka ye min bena fifa janko k'a ka hakɛ yafa daali. A ka mugu tɛntɛnnin kilo saba ta, a ye min ɲagami ni tulu ye, k'o kɛ suman saraka ye ani tulu litiri tilancɛ,

²²ani tuganin fila, walima jɛnɛtuba fila, ka kɛɲɛ n'a seko ye. Kelen ka kɛ hakɛ yafa saraka ye, a tɔ kelen ka kɛ saraka jɛnita ye.

²³A tile seeginan loon, a ka na n'o fɛɛn nunu ye sarakalasebaga fɛ a ka saniyako kama Ɲɔgɔnkunbɛn fanibugu daa la Masaba ɲakɔrɔ.

²⁴Sagaden min be kɛ fili yafa saraka ye, sarakalasebaga ka o ni tulu litiri tilan minɛ, k'u fifa Masaba ɲakɔrɔ.

²⁵A ka sagaden nin kaan tigɛ k'a kɛ fili yafa saraka ye. Mɔgɔ min ka kan ka saniya, a k'a joli dɔ ta k'o kɛ ale kinibolo tulo dakun kan, n'a kinibolo bolokunnadenba, ani a kinibolo senkunnadenba kan.

²⁶A k'o tulu nin dɔ yɛlɛma a yɛrɛ numanbolo la,

²⁷k'a dɔ seriseri n'a kinibolo bolokunnaden ye Masaba ɲakɔrɔ siɲɛ wolonwula.

²⁸Tulu min b'a bolo la, a k'o dɔ kɛ a tigi kinibolo tulo dakun kan, n'a kinibolo bolokunnadenba, an'a kinibolo senkunnadenba kan, a tun ye fili yafa saraka joli kɛ yɔrɔ minw na.

²⁹Tulu tɔɔ min tora sarakalasebaga bolo, a k'o kɛ a kuun na janko k'a tigi saniyako kɛ Masaba ɲakɔrɔ.

³⁰O kɔ, a ka tuganin kelen, walima jɛnɛtuba kelen minɛ, min kɛra a tigi seko ye,

³¹k'o kɛ hakɛ yafa saraka ye, k'a tɔ kelen kɛ saraka jɛnita ye. O ni suman saraka ka kan ka bɔ ɲɔgɔn fɛ. O la, sarakalasebaga b'a tigi saniyako kɛ Masaba ɲakɔrɔ.

³²«See te farisogobanatigi min ye ka sarakafɛnw sɔrɔ, o saniyako sariya le ye nin ye.»

³³Masaba y'a fɔ Musa ni Arɔn ye ko:

³⁴«Ne be Kanaan jamana min di aw ma ka kɛ aw ta ye, n'aw sera o yɔrɔ la tuma min na, ni ne y'a kɛ bugun bɔra soo min kɔnɔ aw ka jamana nin na,

³⁵o soo tigi ka kan ka ta'a fɔ sarakalasebaga ye, ko ale y'a kɔlɔsi k'a ye ko fɛɛn dɔ b'a ka soo kɔnɔ min bɔnin be bugun ma.

³⁶Sarakalasebaga k'a fɔ k'u ka minanw bɛɛ bɔ soo nin kɔnɔ sanni a ka don k'o bugunyɔrɔ filɛ, janko sokɔnɔfɛnw si kana jati fɛnnɔgɔnin ye. O kɔ, sarakalasebaga ka don o soo nin kɔnɔ k'a filɛ.

³⁷A ka bugunyɔrɔ filɛ ka ɲa soo kogo kan. N'a y'a ye k'o bugunyɔrɔ nin jiginin lo ka kɛ dingɛ ye kogo la, ka fin, walima ka wulen,

³⁸a ka bɔ soo nin kɔnɔ ka lɔ soo daa la fɔlɔ k'a daa tugu, a daa tugunin ka to tile wolonwula.

³⁹Tile wolonwulanan loon, sarakalasebaga ka segi ka n'a filɛ. N'a y'a ye ko bugun nin jɛnsɛnna kogo kan,

⁴⁰a k'a fɔ ko bugun be kabakuru minw na, u ka olu walaka ka taga u fili yɔrɔ nɔgɔnin dɔ la dugu kɔfɛ.

⁴¹A k'a to u ka soo kɔnɔna bɛɛ siɲɛ. U ka taga o bɔgɔ bɔn yɔrɔ nɔgɔnin dɔ la dugu kɔfɛ.

⁴²O kɔ, u ka kabakuru wɛrɛw cɛ k'u don dɔ nunu nɔɔ na, ka bɔgɔ wɛrɛ kɛ ka soo nin kogo mɔ.

⁴³«N'u ye kabakuru nunu walaka ka bɔ soo nin kogo la, ani k'a siɲɛ ka tila k'a mɔn tugu, ni bugun segira ka bɔ kogo nin kan,

⁴⁴sarakalasebaga ka ta'a filɛ. Ni bugun nin jɛnsɛnna soo kɔnɔ, o ye bugun ye min be cɛnni kɛ soo kɔnɔ, soo nin nɔgɔnin lo.

⁴⁵U ka soo nin walaka k'a kabakuruw n'a lɔgɔw n'a bɔgɔ bɛɛ cɛ ka taga n'o ye dugu kɔfɛ, yɔrɔ nɔgɔnin dɔ la.

⁴⁶Soo nin datugunin be waati min na, ni mɔgɔ o mɔgɔ donn'a kɔnɔ o waati la, o tigi nɔgɔnin be to fɔɔ wulafɛ.

⁴⁷Ni mɔgɔ o mɔgɔ lara soo nin kɔnɔ, walima ni min ye dumuni kɛ a kɔnɔ, o tigi k'a ka faniw ko.

⁴⁸«Nga ni sarakalasebaga donna soo nin kɔnɔ k'a filɛ, k'a ye ko bugun ma jɛnsɛn soo nin kɔnɔ a mɔnnin kɔ, o tuma na, a ben'a fɔ ko soo nin saniyanin lo, bari bugun tununa.

⁴⁹A ka kɔnɔ fila, ni sɛdirilɔgɔ dɔ, ni gaari wuleman, ani *izɔpiyiri furaburu dɔ ta k'o kɛ ka soo nin saniya.

⁵⁰A ka kɔnɔ kelen kaan tigɛ bɔgɔdaga sanfɛ, jii ɲanaman be min kɔnɔ,

⁵¹ka sɛdirilɔgɔ ni izɔpiyiri furaburu ni gaari wulenman, ani kɔnɔ ɲanaman nin minɛ k'u don dɔ nin joli ni jii ɲanaman nin na k'o seriseri soo nin kan siɲɛ wolonwula.

⁵²A k'o soo saniya ni kɔnɔ nin joli ye, ani jii ɲanaman nin, ni kɔnɔ ɲanaman nin, ani sɛdirilɔgɔ, ni izɔpiyiri furaburu, ani gaari wuleman ye.

⁵³O kɔ, a ka kɔnɔ ɲanaman nin bila ka bɔ dugu kɔnɔ ka taga kongo kɔnɔ. O la, a be soo nin saniyako kɛ, a be kɛ fɛɛn saniyanin ye.

⁵⁴«O ye sariya ye farisogobana sifa bɛɛ koo la, ani *kaba,

⁵⁵ni fani ka bugun, ani soo kɔnɔ bugun,

⁵⁶ni fari funufunubana, ani fari kurukurubana, ni fari nugunugubana,

⁵⁷k'a lɔn ni fɛɛn dɔ nɔgɔnin be, walima n'a saniyanin be. O ye sariya ye farisogobana, ni bugun koo la.»