Read dyu Sarakalasebagaw ka kitabu 17 Bible Online

Sarakalasebagaw ka kitabu 17 - dyu bible

Sarakalasebagaw ka kitabu 17

¹Masaba y'a fɔ Musa ye ko:

²«A fɔ Arɔn n'a dencɛw ye, ani Isirayɛlidenw bɛɛ ye ko ne Masaba be min ɲini aw fɛ, o filɛ nin ye:

³«Isirayɛlidenw cɛma, mɔgɔ o mɔgɔ mana tura, walima saga, walima baa faga jama ka sigiyɔrɔ la, walima u ka sigiyɔrɔ kɔfɛ,

⁴n'a ma na n'a ye Ɲɔgɔnkunbɛn fanibugu daa la k'a kɛ saraka ye ne Masaba ye, n ka soo daa la, o tigi ye kunko sɔrɔ bari a ye joli bɔn gwansan. U k'a gwɛn ka bɔ a ka mɔgɔw cɛma.

⁵O ka kɛ janko Isirayɛlidenw be saraka minw faga kongo kɔnɔ, u ka na n'olu ye sarakalasebaga fɛ ɲɔgɔnkunbɛn fanibugu daa la ne Masaba ɲakɔrɔ, k'u kɛ jɛnɲɔgɔnya sarakaw ye ne ye.

⁶Sarakalasebaga k'u joli seriseri ne ka sarakabɔyɔrɔ kan Ɲɔgɔnkunbɛn fanibugu daa la k'u tulu jɛni. Fɛɛn lo min kasa ka di ne Masaba ye.

⁷O la, u tun be to ka kakalaya kɛ ka bakɔrɔnin jaa minw sɔn, u kana u ka sarakaw faga olu ye tugu. O ye sariya ye min tena dabila abada u n'u kɔmɔgɔw bɛɛ fɛ.

⁸«A fɔ u ye fana ko ni Isirayɛliden fɛɛn o fɛɛn, walima lonan min siginin be u cɛma, n'olu dɔ b'a fɛ ka saraka jɛnita, walima saraka sifa wɛrɛ bɔ,

⁹n'a ma na n'a ye Ɲɔgɔnkunbɛn fanibugu daa la k'a kɛ saraka ye ne Masaba ye, o tigi ka gwɛn ka bɔ a ka mɔgɔw cɛma.

¹⁰ «Ni Isirayɛliden fɛɛn o fɛɛn ye joli dumu, walima lonan min siginin be u cɛma, ne bena wili o tigi kama k'a gwɛn ka bɔ a ka mɔgɔw cɛma.

¹¹ Bari, danfɛn bɛɛ nii b'a joli la. Ne y'o di aw ma janko aw ka se ka hakɛ yafa daali n'o ye sarakabɔyɔrɔ kan, bari joli ye nii ye. O le kosɔn, a be se k'a kɛ hakɛ be yafa.

¹²O le y'a to ne y'a fɔ Isirayɛlidenw ye ko u si kana joli dumu, lonan min be u cɛma, olu si kan'a dumu fana.

¹³«Ni Isirayɛliden dɔ, walima lonan minw b'u cɛma, n'o dɔ ye sogo, walima kɔnɔ sɔrɔ yaalayɔrɔ la, min be dumu, a k'o fɛɛn joli bɔn duguma ka buguri kɛ k'a datugu.

¹⁴Danfɛn bɛɛ nii y'a joli ye. O le y'a to ne y'a fɔ Isirayɛlidenw ye k'u kana fɛɛn si joli dumu, bari danfɛn bɛɛ nii y'a joli ye. Ni mɔgɔ o mɔgɔ ye joli dumu, o tigi bena gwɛn ka bɔ a ka mɔgɔw cɛma.

¹⁵«Ni sogo min sar'a yɛrɛ ma, walima ni wara ye min minɛ, ni mɔgɔ ye o ɲimi, dugulen wo, lonan wo, o tigi k'a ka faniw ko ka jii ko. A nɔgɔnin fana be to fɔɔ wulafɛ. O kɔ, a be saniya.

¹⁶Nga n'a m'a ka faniw ko ka jii ko, a ka tilenbaliya bena kɛ a yɛrɛ kunko ye.»