Read dyu Sarakalasebagaw ka kitabu 18 Bible Online

Sarakalasebagaw ka kitabu 18 - dyu bible

Sarakalasebagaw ka kitabu 18

¹Masaba y'a fɔ Musa ye ko:

²«A fɔ Isirayɛlidenw ye ko: Ne ye Masaba aw ka Ala ye.

³Aw tun be Ezipiti jamana min kɔnɔ, o yɔrɔ mɔgɔw tun be koo minw kɛ, aw kana o ɲɔgɔn kɛ. Ne be taga n'aw ye Kanaan jamana min kɔnɔ fana, aw kana olu ka kɛwaliw ɲɔgɔn kɛ, aw kana tugu u ka landaw kɔ.

⁴Aw ka ne ka kuma bato ka banba ka ne ka sariyaw mara. Ne le ye Masaba aw ka Ala ye.

⁵ «Aw ka ne ka sariyaw ni ne ka kuma bato. Ni mɔgɔ min y'o kɛ, o tigi bena balo o barika la. Ne le ye Masaba ye.

⁶«Aw cɛma, mɔgɔ si man kan ka jɛn n'a balima yɛrɛ yɛrɛ ye. Ne le ye Masaba ye.

⁷«Aw kana jɛn n'aw baa ye, k'aw faa lɛɛbu. I baa lo, i kana jɛn n'a ye.

⁸ «Aw kana jɛn n'aw faa ka muso ye, k'aw faa lɛɛbu.

⁹ «Aw kana jɛn n'aw balimamuso ye fadenya la, walima badenya la, a wolola aw ka soo wo, walima soo wɛrɛ wo, aw kana jɛn n'a ye.

¹⁰«Aw kana jɛn n'aw mamaden musoman ye, aw dencɛ denmuso, walima aw denmuso ta. O b'aw yɛrɛ lɛɛbu.

¹¹«Aw kana jɛn n'aw faa ka muso dɔ denmuso ye, min ye a woloden yɛrɛ yɛrɛ ye, bari aw balimamuso lo.

¹² «Aw kana jɛn n'aw tɛnɛmuso ye, ale ye aw faa balimamuso yɛrɛ yɛrɛ ye.

¹³«Aw kana jɛn n'aw bamuso dɔgɔmuso, walima a kɔrɔmuso ye, ale ye i baa ka somɔgɔ yɛrɛ yɛrɛ ye.

¹⁴«Aw kana jɛn n'aw facɛkɔrɔba, walima aw facɛfitini ka muso ye, k'a lɛɛbu, aw bamusofitini lo.

¹⁵ «Aw kana jɛn n'aw biranmuso ye. Aw dencɛ ka muso lo. Aw kan'a lɛɛbu.

¹⁶ «Aw kana jɛn n'aw kɔrɔ, walima aw dɔgɔ ka muso ye. O bena aw balimacɛ lɛɛbu.

¹⁷ «Aw kana jɛn ni muso ye ka tila ka jɛn n'a denmuso ye. Aw kana jɛn n'o muso mamaden ye fana, a dencɛ deen, walima a denmuso deen. U ye a ka mɔgɔw yɛrɛ yɛrɛ ye, o ye mɔgɔkolonya ye.

¹⁸«Aw kana aw muso kɔrɔmuso, walima a dɔgɔmuso furu, k'aw muso to sii la. O be keliya don u cɛ.

¹⁹ «Aw kana jɛn ni muso ye a ka landa tuma na, bari a nɔgɔnin lo.

²⁰ «Aw kana jɛn n'aw mɔgɔɲɔgɔn ka muso ye k'aw yɛrɛ nɔgɔ a fɛ.

²¹ «Aw kana aw deen si kɛ saraka ye *Milikɔmu ye. Aw kana ne, aw ka Ala tɔgɔ cɛn. Ne le ye Masaba ye.

²² «Aw kana aw cɛɲɔgɔn ɲini i n'a fɔ muso, o ye koo kolon ye.

²³ «Cɛɛ kana begɛn ɲini i n'a fɔ muso k'a yɛrɛ nɔgɔ a fɛ. Jɛnɲɔgɔnya kana don muso ni begɛn cɛ, o ye koɲagaminin ye.

²⁴«Aw kana aw yɛrɛw nɔgɔ o koo nunu si la, bari ne be siya minw gwɛnna ka bɔ aw ɲafɛ, olu y'u yɛrɛ nɔgɔ ten le.

²⁵O la, jamana nin nɔgɔra. O le y'a to ne y'u ka tilenbaliya sara, k'u gwɛn a ka bɔ jamana nin na.

²⁶«Aw kɔni ka kan ka ne ka sariyaw ni ne ka kuma bato. Dugulen fara lonan kan min be aw cɛma, aw kana o koo nunu si kɛ, minw ka go ne Masaba ye.

²⁷Mɔgɔ minw tun be jamana nin kɔnɔ aw ɲa, olu ye o koo nunu bɛɛ kɛ, jamana nin nɔgɔra.

²⁸Aw kana o kɛ, waasa ne kana aw gwɛn jamana nin na aw ka konɔgɔninw kosɔn, i n'a fɔ ne ye siya nunu gwɛn cogo min na, minw tun be aw ɲa yɔrɔ nin na.

²⁹Ni mɔgɔ o mɔgɔ y'o koo goman nunu ɲɔgɔn dɔ kɛ, o kɛbaga bena gwɛn ka bɔ a ka mɔgɔw cɛma.

³⁰«Aw ka ne ka fɔta bato, janko koo dagabali minw tun be kɛ aw ɲa, aw kana o ɲɔgɔn si kɛ k'aw yɛrɛ nɔgɔ. Ne le ye Masaba aw ka Ala ye.»