Read dyu Sarakalasebagaw ka kitabu 19 Bible Online

Sarakalasebagaw ka kitabu 19 - dyu bible

Sarakalasebagaw ka kitabu 19

¹Masaba y'a fɔ Musa ye ko:

² «A fɔ Isirayɛli jama bɛɛ ye ko: Aw ka kɛ mɔgɔ senumanw ye, bari ne Masaba aw ka Ala ka senu.

³ «Aw kelen kelen bɛɛ k'aw faa n'aw baa boɲa. Aw ka ne ka lafiɲɛlonw bato. Ne le ye Masaba aw ka Ala ye.

⁴ «Aw kana yɛlɛma ka joow sɔn, aw kana fɛɛn dɔ jaa dilan k'o kɛ batofɛn ye. Ne le ye Masaba aw ka Ala ye.

⁵«Ni aw be jɛnɲɔgɔnya saraka bɔ ne Masaba ye, aw k'o kɛ cogo bɛnnin na, janko ne ka sɔn a la.

⁶Saraka nin be se ka dumu a bɔlon na ani o dugusagwɛ. N'a tɔɔ tora tile sabanan loon na, aw k'o jɛni.

⁷N'aw y'a dɔ dumu tile sabanan loon, o be kɛ fɛnnɔgɔnin ye, ne Masaba te sɔn o ma.

⁸Ni mɔgɔ o mɔgɔ y'a dumu, o tigi ka kojugu bena to a yɛrɛ kunna, bari a ye ne Masaba ka fɛɛn nɔgɔ. O tigi bena gwɛn ka bɔ a ka mɔgɔw cɛma.

⁹ «Ni aw be suman tigɛ aw ka forow kɔnɔ, aw ka foro daa la taw to yen. Aw kana fɛfɛri kɛ aw ka foro kɔnɔ.

¹⁰Aw kana aw ka *ɛrɛzɛn fɛfɛ, walima minw benbenna, aw kana olu tɔmɔ. Aw k'u to fantanw, ni lonanw ye minw be aw cɛma. Ne le ye Masaba aw ka Ala ye.

¹¹ «Aw kana soɲali kɛ. Aw kana galon tigɛ, aw kana ɲɔgɔn namara.

¹² Aw kana kali ne tɔgɔ la galon kan, o be ne, aw ka Ala tɔgɔ cɛn. Ne le ye Masaba ye.

¹³ «Aw kana aw mɔgɔɲɔgɔn tɔɲɔ, walima k'a bololafɛn soɲa. Aw ka baaraden ka sara kana si aw bolo.

¹⁴ Aw kana tulogweren nɛni, walima ka seen talonfɛn bila fiɲɛntɔ ɲa, aw ka siran aw ka Ala ɲa. Ne le ye Masaba ye.

¹⁵ «Aw kana kiti tigɛ tilenbaliya la. Aw kana ben mɔgɔ wɛrɛ kan ka fantan dɛmɛ cogo bɛnbali la a ka fantanya kosɔn. Aw kana tiɲɛ di faama ma a ka faamaya kosɔn. Aw ka kiti tigɛ ni tilenninya ye.

¹⁶Aw kana galon la aw ka mɔgɔ dɔ kan k'a tɔgɔ cɛn. Aw kana aw mɔgɔɲɔgɔn jalaki koo dɔ la min be se ka kɛ sababu ye u b'a faga. Ne le ye Masaba ye.

¹⁷ «Aw kana aw balima kɔniya. N'aw mɔgɔɲɔgɔn ye hakɛ kɛ, aw k'a ladi ni kɔnɔgwɛ ye, janko aw kana na jalaki a kosɔn.

¹⁸ Aw kana kojugu juru sara ɲɔgɔn na. Aw kana aw ka siyaden ka koo mara aw kɔnɔ. Aw k'aw mɔgɔɲɔgɔn kanu i n'a fɔ aw yɛrɛ. Ne le ye Masaba ye.

¹⁹ «Aw ka ne ka sariyaw bato. «Aw kan'a to aw ka begɛn fila ka jɛn min te sifa kelen ye. Aw kana sumansi sifa fila dan foro kelen kɔnɔ. Aw kana fani don aw kaan na min danna ni jese sifa fila ye.

²⁰«Ni jɔnmuso dɔ maminɛnin be mɔgɔ dɔ fɛ, n'a ma hɔrɔnya fɔlɔ ka bɔ jɔnya la, ni cɛɛ wɛrɛ jɛnna n'a ye, u bena o tigi ɲaa gwan o kosɔn. [1] Nga u man kan k'a faga, bari o muso nin tun te hɔrɔn ye.

²¹O tigi ka na ni sagajigi ye Ɲɔgɔnkunbɛn fanibugu daa la k'o kɛ fili yafa saraka ye ne Masaba ye.

²²Sarakalasebaga k'o sagajigi nin bɔ fili yafa saraka ye ne Masaba ɲakɔrɔ, janko k'o tigi ka hakɛ yafa daali. A ka hakɛ bena yafa.

²³«Ni aw donna jamana nin kɔnɔ tuma min na, ka yiri sifa o sifa tutu, min deen be dumu, aw k'o yiridenw jati tanafɛn ye, fɔɔ saan saba kɔnɔ. Aw kana u dumu.

²⁴Saan naaninan na, aw k'o yiriw deenw bɛɛ di ne Masaba ma, ka ne tanu.

²⁵Saan duurunan, aw k'o yiri nunu deenw dumu. O la, u bena to ka den kosɔbɛ aw fɛ. Ne le ye Masaba aw ka Ala ye.

²⁶ «Aw kana fɛɛn si dumu, n'a joli b'a la. Aw kana lagwɛli kɛ, walima ka subagaya kɛ.

²⁷ Aw kana aw kun li, aw kana aw bonbosi li fana.

²⁸Aw kana aw farisogo tigɛtigɛ suuw kosɔn, aw kana nɔɔ bila aw farisogo la. Ne le ye Masaba ye.

²⁹ «Aw kana aw denmusow bila landako kakalaya la min b'u dɔgɔya. N'o tɛ, kakalaya bena caya jamana nin kɔnɔ, a bɛɛ be fa kojugu la.

³⁰ «Ne ye lafiɲɛlon min sigi, aw k'o bato, ani ka boɲa la ne ka sigiyɔrɔ kan. Ne le ye Masaba ye.

³¹ «Aw kana tugu sukɔrɔ welebagaw ni lagwɛlikɛlaw kɔ k'aw yɛrɛ nɔgɔ u fɛ. Ne le ye Masaba aw ka Ala ye.

³²«Aw ka mɔgɔkɔrɔba jati, ka kunsigigwɛtigi boɲa. Aw ka siran ne, aw ka Ala ɲa fana. Ne le ye Masaba ye.

³³ «Ni lonan nana sigi aw ka jamana kɔnɔ, aw kan'a tɔɲɔ.

³⁴Aw ka lonan minɛ i n'a fɔ dugulen. Aw k'a kanu i n'a fɔ aw yɛrɛ, bari aw fana tun siginin be Ezipiti jamana na lonanya la. Ne le ye Masaba aw ka Ala ye.

³⁵«Aw kana tilenbaliyako kɛ ni sumanikɛkala ye, walima ni kilo, ani sumanikɛminan ye.

³⁶ Kilo bɛnnin ni sumanikɛnigɛ ɲanaman, ni sumanikɛfilen bɛnnin ani litiri bɛnnin ka sɔrɔ aw fɛ. Ne le ye Masaba aw ka Ala ye, ne le y'aw bɔ Ezipiti jamana na.

³⁷«Aw ka banba ka ne ka sariyaw ni ne ka kuma bɛɛ bato. Ne le ye Masaba ye.»