Read dyu Sarakalasebagaw ka kitabu 20 Bible Online

Sarakalasebagaw ka kitabu 20 - dyu bible

Sarakalasebagaw ka kitabu 20

¹Masaba y'a fɔ Musa ye ko:

²«A fɔ Isirayɛlidenw ye ko: «Ni mɔgɔ o mɔgɔ y'a deen dɔ di *Milikɔmu ma, Isirayɛliden fara lonan kan min siginin be Isirayɛli jamana kɔnɔ, o tigi ka faga. Jama k'a bon ni kabakuruw ye.

³Ne yɛrɛ bena wili o tigi kama, k'a niin bɔ a ka mɔgɔw cɛma, bari a y'a deen di Milikɔmu ma ka ne ka sigiyɔrɔ nɔgɔ, ani ka ne tɔgɔ senuman cɛn.

⁴O tigi y'a deen di Milikɔmu ma tuma min na, ni jama y'a kɛ i n'a fɔ u m'a ye, n'u ma o tigi faga,

⁵ne yɛrɛ bena wili o tigi n'a ka somɔgɔw kama, ani minw bɛɛ be tugu a kɔ ka kakalaya kɛ ka Milikɔmu bato. Ne bena u niin bɔ u ka mɔgɔw cɛma.

⁶«Ni mɔgɔ min ye kakalaya kɛ ka taga sukɔrɔ welebaga, walima lagwɛlikɛla fɛ, ne bena wili o tigi kama k'a niin bɔ a ka mɔgɔw cɛma.

⁷Aw k'aw yɛrɛ di ne ma ka kɛ mɔgɔɲumanw ye, bari ne le ye Masaba aw ka Ala ye.

⁸«Aw ka banba ka ne ka sariyaw mara. Ne ye Masaba ye, ne y'aw woloma k'aw kɛ n taw ye.

⁹ «Ni mɔgɔ o mɔgɔ y'a faa, walima a baa nɛni, o tigi ka faga. A y'a faa, walima a baa nɛni minkɛ, o kunko bena to a yɛrɛ kunna.

¹⁰ «Ni mɔgɔ dɔ ye kakalaya kɛ n'a sigiɲɔgɔn muso ye, o tigi n'o muso fila bɛɛ bena faga.

¹¹ «Ni mɔgɔ dɔ jɛnna n'a faa ka muso ye, a y'a faa lɛɛbu. U fila bɛɛ ka kan ka faga. U kunko be to u yɛrɛ kunna.

¹² «Ni mɔgɔ dɔ jɛnna n'a dencɛ muso ye, u fila bɛɛ ka kan ka faga. U ye koɲagaminin le kɛ. U kunko be to u yɛrɛ kunna.

¹³ «Ni mɔgɔ dɔ y'a cɛɲɔgɔn ɲini i n'a fɔ muso, u fila bɛɛ ye koo kolon kɛ. U ka kan ka faga. U kunko be to u yɛrɛ kunna.

¹⁴ «Ni mɔgɔ dɔ ye denmuso n'a baa furu ɲɔgɔn fɛ, o ye kojuguba ye. U ka kan ka jɛni, cɛɛ ni muso nunu. O la, o kojugu ɲɔgɔn tena sɔrɔ aw cɛma.

¹⁵ «Ni cɛɛ dɔ jɛnna ni begɛn ye, a ka kan ka faga. Aw ka begɛn nin faga fana.

¹⁶«Ni muso dɔ gwɛrɛla begɛn dɔ la ko a be jɛn n'a ye, o muso ni begɛn nin ka kan ka faga. U ka kan ka faga le. U kunko be to u yɛrɛ kunna.

¹⁷ «Ni mɔgɔ dɔ y'a balimamuso furu, a faa denmuso, walima a baa denmuso, ka jɛn n'a ye, o ye malobaliyako ye. U fila ka kan ka gwɛn u ka mɔgɔw ɲana. O cɛɛ NIN y'a balimamuso lɛɛbu minkɛ, a ka tilenbaliya kunko bena to a yɛrɛ kunna.

¹⁸ «Ni cɛɛ dɔ jɛnna ni muso ye k'a to a ka landa la, u fila bɛnn'a la ka muso nin ka joli bɔyɔrɔ ye. U ka kan ka gwɛn ka bɔ u ka mɔgɔw cɛma.

¹⁹ «Aw kana jɛn n'aw baa dɔgɔmuso, walima a kɔrɔmuso ye, walima aw tɛnɛmuso ye, bari o ye aw balima yɛrɛ yɛrɛ lɛɛbuko ye. Aw ka tilenbaliya kunko bena kɛ aw yɛrɛ kunna.

²⁰«Ni mɔgɔ dɔ jɛnna n'a facɛfitini ka muso ye, a y'o muso nin cɛɛ lɛɛbu. U fila bɛɛ ka hakɛ bena to u yɛrɛ kunna, u bena sa deen sɔrɔbaliya la.

²¹ «Ni mɔgɔ dɔ y'a balimacɛ yɛrɛ yɛrɛ muso bɔsi, o ye konɔgɔnin ye. A y'a kɔrɔ, walima a dɔgɔnin lɛɛbu. U tena deen sɔrɔ.

²²«Aw ye banba ka ne ka sariyaw ni ne ka kuma bɛɛ bato, janko ne be tagara n'aw ye jamana min na aw ka sigi yen, n kana aw gwɛn ka bɔ yen.

²³Ne be siya minw gwɛn na ka bɔ aw ɲa, aw kana tugu olu ka landaw kɔ. Olu y'o koo nunu bɛɛ le kɛ, o le y'a to u nigɛ bɔra ne la.

²⁴Ne y'a fɔ aw ye ko aw bena u ka jamana tigiya kɛ. Ne bena jamana nin di aw ma ka kɛ aw ta ye, nɔnɔ ni lii ka ca kosɔbɛ o yɔrɔ la, jamana diman lo. Ne le ye Masaba aw ka Ala ye. Ne y'aw kɛ danna siya tɔw la.

²⁵«Begɛn minw saniyanin lo ne ka sariya faan fɛ, aw k'olu ni begɛn nɔgɔninw faranfasi ka bɔ ɲɔgɔn na, ani kɔnɔ saniyaninw ni kɔnɔ nɔgɔninw. Begɛn ni kɔnɔ, ani fɛɛn minw be yaala dugukolo kan, ne y'o faranfasi ka bɔ tɔw la aw ye ko u nɔgɔnin be, aw kana aw yɛrɛ nɔgɔ ni olu ye.

²⁶«Aw ka kɛ mɔgɔɲumanw ye ne fɛ, bari ne Masaba ka ɲi. Ne ye aw faran ka bɔ siya tɔw la k'aw bila danna, janko aw ka kɛ ne taw ye.

²⁷«Cɛɛ, walima muso min be sukɔrɔw wele, walima min be lagwɛli kɛ, o tigi ka kan ka faga. Mɔgɔw k'u bon ni kabakuruw ye. U ka kunko bena to u yɛrɛ kunna.»