Read dyu Sarakalasebagaw ka kitabu 21 Bible Online

Sarakalasebagaw ka kitabu 21 - dyu bible

Sarakalasebagaw ka kitabu 21

¹Masaba y'a fɔ Musa ye ko: «A fɔ Arɔn dencɛ sarakalasebagaw ye ko: Sarakalasebaga man kan ka maga a ka mɔgɔ dɔ suu la k'a yɛrɛ nɔgɔ sariya faan fɛ.

²Fɔɔ n'a ka mɔgɔ tigitigi dɔ lo, i n'a fɔ a baa, a faa, a dencɛ, a denmuso, a kɔrɔcɛ, walima a dɔgɔcɛ.

³Walima a balimamuso yɛrɛ yɛrɛ min ma furu fɔlɔ. Cɛɛ t'a fɛ minkɛ, ale lo lɔnin be n'a kunko ye. O la, a be se k'a yɛrɛ nɔgɔ a kosɔn.

⁴Ale min ye ɲamɔgɔ ye a ka mɔgɔw cɛma, [1] a kan'a yɛrɛ nɔgɔ k'a yɛrɛ ɲagami.

⁵ «Sarakalasebagaw kana u kuun li, walima u bonbosi. U kana u farisogo tigɛtigɛ.

⁶U k'u yɛrɛ di u ka Ala ma. U kana u ka Ala tɔgɔ cɛn. Bari, olu le be Masaba ka saraka d'a ma, u ka Ala ka balo. O la, u man kan k'u yɛrɛ nɔgɔ.

⁷Muso min ye kakalaya kɛ k'a yɛrɛ nɔgɔ, walima musokolon, u kana ale furu. U kana muso furusanin fana furu, bari sarakalasebaga bilanin be a ka Ala ye.

⁸I k'a jati mɔgɔ ye min bilanin be Ala ye, bari a b'i ka Ala ka sarakaw d'a ma. Ne Masaba, aw saniyabaga, ne ka ɲi.

⁹«Ni sarakalasebaga denmuso dɔ ye kakalaya kɛ k'a yɛrɛ nɔgɔ, a y'a facɛ maloya. A ka kan ka jɛni.

¹⁰«Mɔgɔ min ye sarakalasebagaw kuntigi ye a balimaw cɛma, tulu min be kɛ fɛɛn kan, o bɔnna ale min kunna, n'a bilara Ala ye ka se ka sarakalasefaniw don, o tigi man kan k'a to a kunsigi be ɲagami, a kan'a ka faniw faran fana.

¹¹A man kan ka gwɛrɛ suu la. A man kan k'a yɛrɛ nɔgɔ, hali a faa suu, walima a baa ta.

¹²A man kan ka bɔ a ka Masaba ka sigiyɔrɔ la, janko a kana nɔgɔ, bari a bilara ne ka baara la. Ne, a ka Ala ka tulu kɛr'a kan. Ne le ye Masaba ye.

¹³«A ka kan ka sunguru kɛnɛkɛnɛ le furu.

¹⁴A man kan ka firiyamuso furu, walima muso furu sanin, walima muso min ye kakalaya kɛ k'a yɛrɛ nɔgɔ, fɔɔ sunguru kɛnɛkɛnɛ a ka mɔgɔw cɛma.

¹⁵N'o tɛ, a ben'a ka mɔgɔw ɲagami ni deen dɔ ye min saniyanin tɛ sariya faan fɛ. Ne le ye Masaba, a saniyabaga ye.»

¹⁶Masaba y'a fɔ Musa ye ko:

¹⁷«A fɔ Arɔn ye ko: ‹Waati nataw la, ni fiɲɛ b'i kɔmɔgɔ o kɔmɔgɔ la, o tigi man kan ka gwɛrɛ k'a ka Ala ka sarakaw d'a ma.

¹⁸Fiɲɛ be mɔgɔ min farikolo la, o tigi man kan ka gwɛrɛ k'o kɛ: fiɲɛntɔ, walima senkelennin, walima fiɲɛ be min ɲada la, walima mɔgɔ min farisogo yɔrɔ dɔ t'a cogo la,

¹⁹walima mɔgɔ min seen karila, walima a bolo,

²⁰walima dantɔ, walima mɔgɔ cɔrɔkɔnin, walima ni min ɲaa ma ɲi, walima bana o bana be mɔgɔ min fari kan, walima cɛɛ min kɔɔ bɔnin lo, olu si kana gwɛrɛ.

²¹Fiɲɛ be sarakalasebaga Arɔn kɔmɔgɔ o kɔmɔgɔ la, o si man kan ka gwɛrɛ ka sarakaw jɛni Masaba ye minw be jɛni pewu. Fiɲɛ b'a la minkɛ, o kama, a man kan ka gwɛrɛ ka Ala ka dumunifɛn d'a ma.

²²A be se k'a ka Ala ka dumunifɛn dumu, min saniyanin be, ni min saniyanin be kosɔbɛ.

²³Nga fiɲɛ b'a la minkɛ, o la, a man kan ka gwɛrɛ soo cɛtigɛfani la, walima sarakabɔyɔrɔ la, ka ne ka sigiyɔrɔ nɔgɔ. Ne le ye Masaba, u saniyabaga ye.› »

²⁴Musa y'o kuma fɔ Arɔn n'a dencɛw, ani Isirayɛlidenw bɛɛ ye.