Read dyu Sarakalasebagaw ka kitabu 22 Bible Online

Sarakalasebagaw ka kitabu 22 - dyu bible

Sarakalasebagaw ka kitabu 22

¹Masaba y'a fɔ Musa ye ko:

²«A fɔ Arɔn n'a dencɛw ye ko Isirayɛlidenw ye ne niyɔrɔ minw di ne ma, u ka kan k'olu minɛ ni boɲa ye, janko u kana ne tɔgɔ senuman cɛn. Ne le ye Masaba ye.

³A fɔ u ye ko waati nataw la, Isirayɛlidenw ye ne niyɔrɔ minw di ne Masaba ma, ni aw kɔmɔgɔw dɔ gwɛrɛla olu la k'a sɔrɔ a nɔgɔnin lo sariya faan fɛ, o tigi bena gwɛn ka bɔ sarakalasebaara la. Ne le ye Masaba ye.

⁴«Farisogobana be Arɔn kɔmɔgɔ fɛɛn o fɛɛn na, walima dilan kan bana, ni jii be bɔ a cɛya la, o man kan ka ne niyɔrɔ dumu, fɔɔ n'a tigi saniyara. Ni mɔgɔ o mɔgɔ magara mɔgɔ dɔ la min tun magara suu la, k'a yɛrɛ nɔgɔ, ale t'a dumu. Mɔgɔ min kɔji bɔnna, ale fana t'a dumu.

⁵Ani mɔgɔ min magara fɛɛn fofota dɔ la min be se ka mɔgɔ nɔgɔ, walima mɔgɔ dɔ la min be se ka mɔgɔ nɔgɔ cogo wɛrɛ la.

⁶Ni mɔgɔ min magara o fɛɛn nunu dɔ la, o tigi nɔgɔnin bena to fɔɔ wulafɛ. A kana ne niyɔrɔ dumu, a ka kan ka jii ko.

⁷Ni tile benna ka ban, a be saniya. O kɔ, a be se ka ne niyɔrɔ nunu dumu, bari o y'a ka dumuni ye.

⁸Fɛɛn min sar'a yɛrɛ ma, walima wara ye min minɛ, a man kan k'o dumu, k'a yɛrɛ nɔgɔ n'o ye. Ne le ye Masaba ye.

⁹«Ne be min ɲini sarakalasebagaw fɛ, u ka kan k'o kɛ, n'o tɛ, u bena hakɛ kɛ u ka dumuni koo la, ka sa, bari u ye tulon kɛ ni ne ka dumuni ye. Ne le ye Masaba ye, ne y'u bila danna n ka baara kama.

¹⁰«Ni mɔgɔ min te sarakalasebaga ka gwamɔgɔ ye, o man kan ka ne niyɔrɔ dumu. Sarakalasebaga ka lonan, n'a ka baaraden fana man kan k'a dumu,

¹¹nga ni sarakalasebaga ye jɔɔn min san, walima a ka jɔɔn dɔ ye deen min wolo k'a to a fɛ, ale be se k'a dumu.

¹²«Sarakalasebaga denmuso min furula mɔgɔ wɛrɛ ma, min te sarakalasebaga ye, o denmuso nin man kan ka sarakafɛn nunu dumu, min bɔra ne Masaba ye.

¹³Nga sarakalasebaga denmuso min cɛɛ sara, walima min ka furu sara, ni deen t'a fɛ, n'a kɔsegir'a faa ka soo i n'a fɔ a denmisɛnman tuma, a be se k'a faa ka dumuni kɛ, hali ni sarakalasebaga ka gwamɔgɔw dama le ka kan k'a dumu.

¹⁴«Ni mɔgɔ dɔ filila ka ne niyɔrɔ dumu, o tuma na, a ka na n'o ɲɔgɔn ye k'a tilan duurunan fara a kan, k'o di sarakalasebaga ma.

¹⁵«Isirayɛlidenw be niyɔrɔ minw di ne Masaba ma, sarakalasebagaw man kan k'olu mafiɲɛya,

¹⁶k'a to u dibagaw k'o dumu. N'o tɛ, u be jalaki ben u kan, min b'u wajibiya k'o koo sara. Ne le ye Masaba ye, ne y'u bila u danna n ka baara kama.»

¹⁷Masaba y'a fɔ Musa ye ko:

¹⁸«A fɔ Arɔn n'a dencɛw, ani Isirayɛlidenw bɛɛ ye ko: Ni Isirayɛli ka somɔgɔ o somɔgɔ, walima lonan min be Isirayɛli jamana na, n'o be saraka jɛnita bɔ ne Masaba ye, a kɛra dajuru sarata ye ne ma wo, walima diyanata wo,

¹⁹a ka tura bɔ, walima sagajigi, walima bakɔrɔnin fiɲɛ te min na, janko ne Masaba ka sɔn a ka saraka la.

²⁰ Aw kana na ni fɛɛn ye fiɲɛ be min na. Ne Masaba tena sɔn a la aw bolo.

²¹Ni mɔgɔ dɔ b'a fɛ ka misi, walima begɛnmisɛn bɔ jɛnɲɔgɔnya saraka ye ne Masaba ma, janko k'a ka dajuru sara, walima k'a kɛ diyanasaraka ye, o begɛn nin ka kɛ begɛn dafanin ye, fiɲɛ si kana sɔrɔ a la. N'o tɛ, ne tena sɔn a la.

²²«Begɛn min ɲaa fiɲɛnnin lo, walima kolo karinin, walima min yɔrɔ dɔ tigɛra, walima jolijugu be begɛn min na, walima *kaba, aw kana olu si bɔ ne Masaba ye. Aw kana u si bila sarakabɔyɔrɔ kan, k'o kɛ saraka ye min be jɛni pewu ne Masaba ye.

²³Tura, walima sagajigi min farisogo yɔrɔ dɔ t'a cogo la, walima min cɔrɔkɔnin lo, i be se k'o bɔ diyanasaraka ye, nga i ye dajuru min ta ne ye, a tena kɛ o sara saraka ye.

²⁴Begɛn min kili cinin be, walima min kili mugumugunin be, walima min kɔɔ bɔnin be, walima min ta tigɛnin be, aw kana olu si bɔ saraka ye ne Masaba ye. Aw kana o ɲɔgɔn kɛ aw ka jamana kɔnɔ,

²⁵aw kana sɔn fana k'olu si san lonan fɛ k'o kɛ saraka ye aw ka Ala ye ka kɛ a ka dumuni ye. Cɛnyɔrɔ min b'u la, o be jati fiɲɛ ye, o la, ne tena sɔn o la aw bolo.»

²⁶Masaba y'a fɔ Musa ye ko:

²⁷«Ni misiden, walima sagaden, walima baden wolola, a ka tile wolonwula kɛ a baa kɔrɔ. K'a ta a tile wolonwulanan loon ma, a be se ka kɛ saraka ye min be jɛni pewu ne Masaba ye.

²⁸I kana misimuso, walima sagamuso n'a deen faga loon kelen na.

²⁹«N'aw be foli saraka bɔ ne Masaba ye, aw k'a bɔ cogo bɛnnin na janko ne ka sɔn saraka nin na.

³⁰Aw k'a dumu o loon kelen na, a tɔɔ kana si. Ne le ye Masaba ye.

³¹«Aw ka banba ka ne ka kuma bato. Ne le ye Masaba ye.

³²Aw kana ne tɔgɔ senuman cɛn, Isirayɛlidenw ka kan k'a lɔn ko ne ka ɲi. Ne le ye Masaba, aw saniyabaga ye.

³³Ne y'aw bɔ Ezipiti jamana na janko ne ka kɛ aw ka Ala ye. Ne le ye Masaba ye.»