Read dyu Sarakalasebagaw ka kitabu 24 Bible Online

Sarakalasebagaw ka kitabu 24 - dyu bible

Sarakalasebagaw ka kitabu 24

¹Masaba y'a fɔ Musa ye ko:

²«A fɔ Isirayɛlidenw ye ko u ka na ni olivutulu ɲanaman ye i fɛ. O bena kɛ fitinɛ tulu ye, janko fitinɛ mananin ka to loon bɛɛ sufɛ.

³Arɔn k'o fitinɛ labɛn Ɲɔgɔnkunbɛn fanibugu cɛtigɛfani ɲafɛ, min be ne Ala ka layidu taamasiɲɛ kɛsu datugu. A mananin ka to ne Masaba ɲakɔrɔ k'a ta wulafɛ fɔɔ ka dugu gwɛ, a man kan ka faga fewu. O ye sariya ye min tena dabila abada aw kɔmɔgɔw bɛɛ fɛ.

⁴Fitinɛ bilayɔrɔ ka kɛ ni sanu yɛrɛ yɛrɛ ye, Arɔn ka fitinɛw bila yen u mananin ka to ne Masaba ɲakɔrɔ loon bɛɛ sufɛ.

⁵ «I ka mugu tɛntɛnnin ta ka burukun tan ni fila dilan n'a ye. O burukun kelen kelen bɛɛ ka dilan ni mugu kilo wɔɔrɔ wɔɔrɔ ye.

⁶I k'o burukun tan ni fila tilan fila ye k'o la tabali kan min dilanna ni sanu yɛrɛ yɛrɛ ye, k'u bila ne Masaba ɲakɔrɔ, layɔrɔ kelen kelen bɛɛ burukun wɔɔrɔ wɔɔrɔ.

⁷I ka wusulan yɛrɛ yɛrɛ kɛ o layɔrɔ kelen kelen bɛɛ kan. O bena jɛni pewu ne Masaba ye buru nɔɔ na. O ka kɛ hakilijigifɛn ye.

⁸Lafiɲɛlon o lafiɲɛlon, o buru ka bila ne Masaba ɲakɔrɔ. O ye koo ye, Isirayɛlidenw ka kan ka min kɛ kudayi.

⁹ Buru nin ka kɛ Arɔn n'a deenw ta ye. Olu k'u dumu yɔrɔ senuman dɔ la, bari o ye fɛɛn saniyanin ye kosɔbɛ ka bɔ sarakaw la minw be jɛni ne Masaba ye pewu. O bena kɛ u niyɔrɔ ye tuma bɛɛ.»

¹⁰Muso dɔ tun be yen, Isirayɛliden dɔ tun lo, a cɛɛ tun ye Ezipitika ye. Deen dɔ tun b'u fɛ. Deen nin bɔra ka taga Isirayɛlidenw fɛ. Kɛlɛ wilil'a ni Isirayɛliden dɔ cɛ jama ka sigiyɔrɔ la.

¹¹Muso nin deen ye Ala tɔgɔjugu fɔ. O la, u tagara n'a ye Musa fɛ. Deen nin baa tɔgɔ ko Selomiti, Dan kɔmɔgɔ Dibiri denmuso tun lo.

¹²U ye deen nin datugu yɔrɔ dɔ la fɔɔ Masaba k'a sago yira o koo la k'a gwɛya u ye.

¹³O kɔ, Masaba y'a fɔ Musa ye ko:

¹⁴«Taga n'o Ala tɔgɔ cɛnbaga nin ye jama ka sigiyɔrɔ kɔfɛ. A ye kuma fɔ mɔgɔ minw bɛɛ ɲana, olu k'u bolo la a kuun na, o kɔ, jama bɛɛ k'a bon ni kabakuruw ye k'a faga.

¹⁵A fɔ Isirayɛlidenw ye ko ni mɔgɔ o mɔgɔ y'a ka Ala tɔgɔjugu fɔ, o tigi ka hakɛ kunko bena to a yɛrɛ kunna.

¹⁶Ni mɔgɔ min ye ne Masaba tɔgɔjugu fɔ, o ka kan ka faga. Jama bɛɛ k'a bon ni kabakuruw ye. Mɔgɔ te bɔ mɔgɔ la, dugulen walima lonan, min siginin be aw cɛma, n'a ye ne tɔgɔjugu fɔ, a ka kan ka faga.

¹⁷ «Mɔgɔ o mɔgɔ mana mɔgɔ nii bɔ, o tigi ka kan ka faga.

¹⁸Ni mɔgɔ dɔ ye mɔgɔ wɛrɛ ka begɛn faga, a ka kan k'a ɲɔgɔn di.

¹⁹«Ni mɔgɔ o mɔgɔ y'a mɔgɔɲɔgɔn mandimi, a ye min kɛ, o ɲɔgɔn ka kan ka kɛ a la fana.

²⁰ N'a y'a kolo kari, a kolo dɔ fana ka kari. Ɲaa juru be bɔ ni ɲaa ye. Ɲiin juru be bɔ ni ɲiin ye. N'a ye mɔgɔ mandimi cogo min na, o ɲɔgɔn ka kɛ a la fana.

²¹Mɔgɔ min ye begɛn faga, o tigi k'o ɲɔgɔn di. Nga n'a ye mɔgɔ faga, a fana ka kan ka faga.

²² «Lonan ni dugulen bɛɛ ka sariya ye kelen ye aw fɛ. Ne le ye Masaba aw ka Ala ye.»

²³Musa y'o fɔ Isirayɛlidenw ye. U tagara ni Ala tɔgɔ cɛnbaga nin ye jama sigiyɔrɔ kɔfɛ k'a bon ni kabakuru ye. Masaba y'a fɔ Musa ye ko min ka kɛ, Isirayɛlidenw y'o kɛ.