Read dyu Sarakalasebagaw ka kitabu 26 Bible Online

Sarakalasebagaw ka kitabu 26 - dyu bible

Sarakalasebagaw ka kitabu 26

¹ «Aw kana joo si dilan, aw kana yiri lɛsɛnin, walima kabakuru si lɔ k'a bato, aw kana kabakuru ɲɛgɛnin si bila aw ka jamana kɔnɔ ka biri a kɔrɔ. Ne le ye Masaba aw ka Ala ye.

²«Aw ka lafiɲɛlonw bato ne kama, ka ne ka sigiyɔrɔ boɲa. Ne le ye Masaba ye.

³ «Ni aw ye ne ka fɔta bato ka banba ka ne ka kuma bato,

⁴o tuma na, ne bena sanji di aw ma a waati la, sɛnɛ bena ɲa, yiriw bena den,

⁵aw bena suman caaman sɔrɔ k'a gosi fɔɔ ka se *ɛrɛzɛn tigɛtuma na. Ɛrɛzɛn fana tena ban tigɛ la ni dannikɛtuma ma se. Aw bena dumuni kɛ aw sago la ka sigi hɛrɛ la aw ka jamana kɔnɔ.

⁶Ne bena hɛrɛ kɛ jamana mɔgɔw ye. Aw bena la, mɔgɔ si tena siranya bila aw la. Ne bena sogojuguw gwɛn ka bɔ jamana na. Kɛlɛ tena don aw ka jamana kɔnɔ.

⁷Aw bena tugu aw juguw kɔ k'u halaki ni murujan ye.

⁸Aw ka mɔgɔ duuru bena mɔgɔ kɛmɛ gwɛn, mɔgɔ kɛmɛ bena mɔgɔ waa tan gwɛn. Aw bena aw juguw halaki ni murujan ye.

⁹Ne bena n janto aw la k'aw jiidi, k'aw caya ka ne ka layidu dafa aw ye.

¹⁰Aw bena to ka sumankɔrɔw le dumu. Aw bena sumankɔrɔ bɔ bondo kɔnɔ ka kuraman don yen.

¹¹Ne bena sigi aw cɛma, aw koo tena goya ne ye.

¹² Ne bena to aw cɛma ka kɛ aw ka Ala ye, aw bena kɛ ne ka mɔgɔw ye.

¹³Ne le ye Masaba aw ka Ala ye, ne y'aw bɔ Ezipiti jamana na, janko aw kana kɛ Ezipitikaw ka jɔɔnw ye tugu. Aw tun be jɔnya la mɔgɔ minw bolo, ne ye olu ka fanga bɔ aw kunna, ka kunkɔrɔta di aw ma.

¹⁴«Nga n'aw ma sɔn ka mɛnni kɛ ne fɛ ka ne ka kuma nunu bɛɛ bato,

¹⁵n'aw banna ne ka fɔta ma, ni ne ka sariyaw koo goyara aw ye, fɔɔ aw be ban ka ne ka kuma bɛɛ bato, n'aw ye an ka bɛɛn cɛn,

¹⁶ne bena min kɛ aw la, o filɛ nin ye. Ne bena jatigɛkobabaw lase aw ma, mɔgɔfasabana ni farigwan bena aw ɲaa cɛn, k'aw barika ban dɔɔni dɔɔni. Aw bena danni kɛ fu, bari aw juguw bena o suman dumu.

¹⁷Ne bena wili aw kama. O la, aw juguw bena se aw kɔrɔ, aw kɔniyabagaw bena kɛ aw kuntigiw ye. Aw bena boli hali ni mɔgɔ si te aw nɔɔ fɛ.

¹⁸«O bɛɛ kɛnin kɔ, ni aw ma sɔn ka mɛnni kɛ ne fɛ, ne bena o tɔɔrɔ ɲɔgɔn wolonwula la aw kan aw ka hakɛ kosɔn.

¹⁹Fanga min b'aw la n'aw be to k'aw yɛrɛ yira n'a ye, ne ben'o cɛn, ka sankolo kɛ i n'a fɔ nigɛ aw fɛ, ani k'aw ka dugukolo kɛ i n'a fɔ zira, sanji benbaliya kosɔn.

²⁰Aw bena sɛgɛn fu, bari aw ka sɛnɛfɛnw tena ɲa, jamana yiriw tena den.

²¹«Ni aw banna ne ma, n'aw ma sɔn ka mɛnni kɛ ne fɛ, ne bena o tɔɔrɔ ɲɔgɔn wolonwula la aw kan aw ka hakɛ kama.

²²Ne bena sogojuguw bila aw la, u bena aw deenw minɛ k'aw ka begɛnw halaki. Aw tɔɔ bena kɛ fitini fɔɔ mɔgɔ tena sɔrɔ min be taama aw ka siraw kan tugu.

²³«N'o koow si ma aw kolo, n'aw tora ka ban ne ma,

²⁴o tuma na, ne fana bena ban aw la. Ne bena aw ka tɔɔrɔ ɲɔgɔn wolonwula la aw kan aw ka hakɛ kama.

²⁵Ne ben'a kɛ murujan be se aw ma ka ne ka dimi bɔ aw la, bari aw ye an ka bɛɛn cɛn. Aw bena yɛrɛsutarayɔrɔ ɲini aw ka dugubabaw kɔnɔ, nga ne bena fɔɲɔbana bila aw la, aw bena don aw juguw bolo fana.

²⁶Ni ne ye aw ka dumuni sɔrɔko gwɛlɛya tuma min na, muso tan bena se k'aw ka buru jɛni dibi kelen kɔnɔ. U bena dɔɔni min d'aw kelen kelen ma, o bena dɔgɔya fɔɔ aw bena dumuni min kɛ, o tena aw ka kɔngɔ nɔgɔya.

²⁷«O bɛɛ kɛnin kɔ, ni aw ma sɔn ka mɛnni kɛ ne fɛ, n'aw tora ka ban ne ma halibi,

²⁸o tuma na, ne diminin bena ban aw la. Ne yɛrɛ le bena aw ka tɔɔrɔ ɲɔgɔn wolonwula la aw kan tugu aw ka hakɛ kama.

²⁹Aw bena aw dencɛw n'aw denmusow le dumu.

³⁰Ne bena aw ka sɔnnikɛyɔrɔw cɛn k'aw ka wusulan sarakabɔyɔrɔw halaki, k'aw suuw lala aw ka joo cɛnninw kan. Aw koo bena goya ne ye.

³¹Ne bena aw ka dugubabaw kɛ yɔrɔlakolonw ye k'aw ka batolikɛyɔrɔw cɛn. Aw ka sarakaw kasa diman tena diya ne ye tugu.

³²Ne bena jamana nin cɛn fɔɔ aw jugu minw bena sigi a kɔnɔ, olu bena kabakoya.

³³Ne bena aw jɛnsɛn siyaw cɛma ka murujan bila aw nɔɔ fɛ. Aw ka jamana bena cɛn, aw ka dugubabaw bena kɛ yɔrɔlakolon ye.

³⁴«O tuma na, k'aw to aw juguw ka jamana na, aw ka dugukolo ben'a ka lafiya sɔrɔ, a tena sɛnɛ o waati bɛɛ la. A ma lafiɲɛ sɔrɔ saan minw na k'aw to a kɔnɔ, a bena o sɔrɔ o waati la.

³⁵Ka jamana labilanin to, a bena lafiya sɔrɔ, a ma min sɔrɔ *lafiɲɛsanw na, aw tor'a kɔnɔ waati min na.

³⁶«Aw tɔɔ minw ɲanaman bena to, ne bena olu kɛ siranbagatɔw ye u juguw ka jamana na, fɔɔ u bena boli yirifuraburu mankan ɲa. U bena boli, i n'a fɔ mɔgɔ be boli murujan ɲa cogo min na, u bena ben, k'a sɔrɔ mɔgɔ si te tugura u kɔ.

³⁷U seenw bena talon ɲɔgɔn na, i n'a fɔ u be boli murujan ɲa, k'a sɔrɔ mɔgɔ si te tugura u kɔ. Aw tena se ka lɔ aw juguw ɲa.

³⁸Aw bena halaki siya wɛrɛw cɛma, aw bena sa aw juguw ka jamana na.

³⁹Aw tɔɔ minw ɲanaman bena to, olu bena nagasi k'u to u juguw ka jamanaw la u ka tilenbaliya, n'u faaw ta kosɔn.

⁴⁰«Ayiwa, u bena tila ka sɔn u ka tilenbaliya, n'u faaw ta la, k'a fɔ ko u ye ne janfa, ko u banna ne la.

⁴¹Min y'a to ne fana banna u la k'a kɛ u tagara u juguw ka jamana na. O tuma na, o mɔgɔ tulogwɛlɛn nunu bena u yɛrɛ majigi ka lɔ n'u ka tilenbaliya kunko ye.

⁴² Ne bena n hakili jigi n ka layidu tanin na u bɛmaw ye, Yakuba ni Isiyaka ani Ibrayima ye, ka n hakili to jamana nin na.

⁴³Jamana labilanin bena to yen, u tena to a kɔnɔ, a ben'a ka *lafiɲɛsanw sɔrɔ o waati la. U bena u ka tilenbaliya sara sɔrɔ, bari u banna ne ka kuma ma. Ne ka sariyaw koo goyara u ye.

⁴⁴O bɛɛ n'a ta, hali k'u to u juguw ka jamana na, ne tena ban u la, ani k'u koo goya n yɛrɛ ye k'u halaki pewu, ka n ka layidu cɛn. Ne le ye Masaba u ka Ala ye.

⁴⁵Ne bena n hakili to n ka layidu tanin na ka hɛrɛ kɛ u ye, ne ye layidu min ta u bɛmaw ye, ne ye minw bɔ Ezipiti jamana na siya wɛrɛw ɲana, janko ne ka kɛ u ka Ala ye. Ne le ye Masaba ye.»

⁴⁶O le ye Masaba ka kuma ye, ni a ka ɲinitaw ani a ka sariyaw. A ye minw sigi ale yɛrɛ ni Isirayɛlidenw cɛ Musa sababu la Sinayi kulu kan.