Read dyu Sarakalasebagaw ka kitabu 27 Bible Online

Sarakalasebagaw ka kitabu 27 - dyu bible

Sarakalasebagaw ka kitabu 27

¹Masaba y'a fɔ Musa ye ko: «A fɔ Isirayɛlidenw ye ko:

²Ni mɔgɔ dɔ ye dajuru ta ne Masaba ye ko a bena mɔgɔ dɔ di ne ma, ka kɛ ne ta ye, o tigi be se ka kunmabɔ ni warida dɔ ye.

³Ni cɛɛ lo min sii ye saan mugan sɔrɔ fɔɔ ka ta'a bil'a saan bi wɔɔrɔ la, i k'o kunmabɔ ni warigwɛ kuru bi duuru ye, ka kɛɲɛ ni ne ka sigiyɔrɔ warigwɛ kuru ye.

⁴Ni muso lo, warigwɛ kuru bi saba.

⁵Mɔgɔ min sii ye saan duuru, fɔɔ ka ta'a bila saan mugan ma, cɛɛ ta ye warigwɛ kuru mugan ye, muso ta ye tan ye.

⁶K'a ta kalo kelen ma fɔɔ ka ta'a bila saan duuru ma, cɛɛ ta ye warigwɛ kuru duuru ye, muso ta ye saba ye.

⁷K'a ta saan bi wɔɔrɔ ma ka taga ɲa, cɛɛ ta ye warigwɛ kuru tan ni duuru ye, muso ta ye tan ye.

⁸«Ni mɔgɔ min ye dajuru ta ne Masaba ye, n'ale dɛsɛnin lo fɔɔ see t'a ye ka se ka warigwɛ hakɛ nin di, a ye dajuru ta mɔgɔ min koo la, a ka taga n'o tigi ye sarakalasebaga fɛ, ale k'o sɔngɔ sigi ka kɛɲɛ ni dadibaga seko ye.

⁹«Ni mɔgɔ min y'a daa di ne Masaba ma begɛn koo la, min be se ka kɛ saraka ye ne ye, o begɛn nin bena jati ne ta ye.

¹⁰A tigi kan'a falen, a kana ɲuman di kolon nɔɔ na, a kana kolon di ɲuman nɔɔ na. N'a ye dɔ bila dɔ nɔɔ na, u fila bɛɛ be kɛ ne Masaba ta ye.

¹¹«N'a y'a daa di begɛn min koo la, n'o saniyanin tɛ sariya faan fɛ, n'o te se ka kɛ saraka ye ne Masaba ye, a tigi k'a yira sarakalasebaga la,

¹²ale k'a filɛ n'a ka ɲi, walima n'a ma ɲi. Sarakalasebaga mana warida min fɔ, o te se ka sɔsɔ.

¹³Ni begɛntigi b'a fɛ ka segi k'a san, sɔngɔ min fɔra, a ka kan k'o tilan duurunan fara a kan.

¹⁴«Ni mɔgɔ dɔ y'a ka soo di ne Masaba ma, o tuma na, sarakalasebaga k'a filɛ n'a ka ɲi, walima n'a ma ɲi. Sarakalasebaga mana warida min fɔ, o te se ka sɔsɔ.

¹⁵N'a tigi segira ko a b'a san, o tuma na, warida min fɔra, a ka kan k'o tilan duurunan fara a kan, a be segi ka kɛ a ta ye.

¹⁶«Ni mɔgɔ dɔ y'a ka dugukolo faan dɔ di ne Masaba ma, a sɔngɔ ka kan ka la ka kɛɲɛ ni yɔrɔ suman danta hakɛ ye. Suman min be wele *orizi, o kilo kɛmɛ saba be dan foro min kɔnɔ, o sara bena kɛ warigwɛ kuru bi duuru ye.

¹⁷N'o yɔrɔ nin dira ne Masaba ma saan bi duurunan na, a sɔngɔ be to a nɔɔ na.

¹⁸Nga n'a b'a kɛ saan bi duurunan tɛmɛnin kɔ, saan tɔɔ minw tora sanni saan bi duurunan wɛrɛ ka se, sarakalasebaga k'a sɔngɔ jati minɛ a ye ka kɛɲɛ n'o saanw daa ye. A sɔngɔ siginin nin bena nɔgɔya.

¹⁹Ni dɔ b'a fɛ ka segi k'a ka yɔrɔ san tugu, a k'a sɔngɔ siginin nin tilan duurunan fara a sɔngɔ kan, a be segi ka kɛ a ta ye.

²⁰Nga n'a ma se k'a san, a do y'a feere mɔgɔ wɛrɛ ma, a tena se k'a san tugu fewu k'a kɛ a yɛrɛ ta ye.

²¹Ni yɔrɔ sanbaga y'a labila saan bi duurunan na, a bena kɛ ne Masaba ta ye. A bena kɛ sarakalasebagaw ta ye.

²²«Ni mɔgɔ dɔ ye yɔrɔ san min te a faaw ta ye, n'a y'a di ne Masaba ma,

²³o tuma na, sarakalasebaga ben'a sɔngɔ jati ka kɛɲɛ ni saanw daa ye minw tora sanni saan bi duurunan ka se. A tigi ka kan k'o wari di o loon na, o wari ye ne Masaba ta ye.

²⁴Saan bi duurunan na, yɔrɔ nin sanna mɔgɔ min fɛ ka kɔrɔ, min tun ye a tigi ye, a bena segi ka kɛ o ta ye.

²⁵«Fɛɛn bɛɛ sɔngɔ ka sigi ka kɛɲɛ ni ne ka sigiyɔrɔ warigwɛ kuru ye. O warigwɛ kuru kelen ye garamu tan ye.

²⁶«Mɔgɔ si man kan ka dajuru ta ko a ben'a ka begɛn deen fɔlɔ di ne Masaba ma, bari deen fɔlɔ ye ne ta ye ka ban. A kɛra misi ye wo, saga lo wo, o ye ne Masaba ta ye.

²⁷Ni begɛn saniyanin tɛ sariya faan fɛ, a tigi be se k'a san tugu a sɔngɔ siginin na, k'o sɔngɔ tilan duurunan fara a kan. N'a m'a san, begɛn nin ka feere mɔgɔ wɛrɛ ma a sɔngɔ la.

²⁸ «Mɔgɔ man'a bololafɛn min bila ka kɛ ne Masaba ta ye, begɛn fara adamaden kan, ani a yɛrɛ ka dugukolo dɔ, o si te se ka feere, a tigi fana te se k'a san tugu. Fɛɛn minw bilara ne Masaba ye ten, olu bɛɛ ye ne kelenpe ta ye.

²⁹Ni mɔgɔ bilara ka kɛ ne ta ye, a te se ka kunmabɔ ni wari ye. Wajibi lo a ka faga.

³⁰ «Dugukolo kan fɛɛnw bɛɛ jaka ye ne Masaba ta ye. Sumanw ta, ni yiridenw ta.

³¹Ni mɔgɔ dɔ b'a fɛ k'a ka jaka dɔ sɔrɔ tugu, a k'a sɔngɔ di ani k'o tilan duurunan fara a kan.

³²Begɛn jakaw bɛɛ ye ne Masaba ta ye. Misi fara begɛnmisɛnw kan. Begɛn minw tɛmɛna begɛnmarabaga ka bere kɔrɔ u jatituma na, [1] olu tantannan bɛɛ ye ne Masaba ta ye.

³³A tigi man kan k'a ka begɛn ɲanamanw woloma ka bɔ begɛn kuntanw na, a kana u falen fana. Nga n'a ye dɔ falen, a falenna minw na, u fila bɛɛ be kɛ ne Masaba ta ye. A tigi te se k'u san tugu.»

³⁴Masaba ye sariya minw fɔ Musa ye Sinayi kulu kan, waasa a k'u fɔ Isirayɛlidenw ye, olu lo ye nunu ye.