Read dyu Sarakalasebagaw ka kitabu 3 Bible Online

Sarakalasebagaw ka kitabu 3 - dyu bible

Sarakalasebagaw ka kitabu 3

¹«Ni mɔgɔ dɔ b'a fɛ ka jɛnɲɔgɔnya saraka bɔ ne Masaba ye, ni begɛnba lo, tura, walima misimuso, a ka kɛ misi ye fiɲɛ te min na.

²A k'a bolo la a ka saraka nin kuun na, k'a kaan tigɛ Ɲɔgɔnkunbɛn fanibugu daa la. O kɔ, Arɔn dencɛ sarakalasebagaw k'a joli seriseri sarakabɔyɔrɔ faan bɛɛ kan.

³Dɔ be bɔ saraka nin na ka jɛni pewu ne Masaba ye. O y'a kɔnɔnatulu bɛɛ,

⁴ n'a kɔkili fila ni tulu min b'u kan, n'a soron ta. Ani a biɲɛ yɔrɔ ɲanaman, a bena min bɔ n'a kɔkiliw ye.

⁵O kɔ, saraka jɛnita min be lɔgɔ mananin kan sarakabɔyɔrɔ kan, Arɔn dencɛw k'a la o kan k'a jɛni. Saraka jɛnita lo pewu, a kasa ka di ne Masaba ye.

⁶«Ni begɛnmisɛn lo, n'a b'a fɛ k'a kɛ jɛnɲɔgɔnya saraka ye ne Masaba ye, a ka na n'a cɛman ye, walima musoman, fiɲɛ te min na.

⁷N'a be sagaden bɔ, a ka na n'a ye ne Masaba ɲakɔrɔ,

⁸k'a bolo la a ka saraka nin kuun na, k'a kaan tigɛ Ɲɔgɔnkunbɛn fanibugu ɲafɛ. O kɔ, sarakalasebagaw k'a joli seriseri sarakabɔyɔrɔ faan bɛɛ kan.

⁹Sarakasogo nin tuluyɔrɔw be bɔ ka jɛni pewu ne Masaba ye: kukala bɛɛ, a b'o tigɛ ka bɔ a kɔkolo la, n'a kɔnɔnatulu bɛɛ,

¹⁰n'a kɔkili fila ni tulu min b'u kan, n'a soron ta, ani a biɲɛ yɔrɔ ɲanaman, a bena min bɔ n'a kɔkiliw ye.

¹¹ Sarakalasebaga k'o jɛni sarakabɔyɔrɔ kan. Dumunifɛn lo, min be jɛni pewu ne Masaba ye.

¹²«N'a ka saraka ye baa le ye, a ka na n'a ye ne Masaba ɲakɔrɔ,

¹³k'a bolo la a kuun na k'a kaan tigɛ ɲɔgɔnkunbɛn fanibugu ɲafɛ. O kɔ, Arɔn dencɛw k'a joli seriseri sarakabɔyɔrɔ faan bɛɛ kan.

¹⁴Dɔ be bɔ saraka nin na ka jɛni ne Masaba ye, o y'a kɔnɔnatulu bɛɛ ye,

¹⁵n'a kɔkili fila ni tulu min b'u kan, n'a soron ta, ani a biɲɛ yɔrɔ ɲanaman, a bena min bɔ n'a kɔkiliw ye.

¹⁶Sarakalasebaga k'olu jɛni sarakabɔyɔrɔ kan. Dumunifɛn lo, min be jɛni pewu, a kasa ka di ne Masaba ye. «Begɛn tulu bɛɛ ye ne ta ye.

¹⁷Aw kan'a tulu, walima a joli dumu. O ye sariya ye min tena dabila aw kɔmɔgɔw fɛ abada aw sigiyɔrɔw bɛɛ la.»