Read dyu Sarakalasebagaw ka kitabu 4 Bible Online

Sarakalasebagaw ka kitabu 4 - dyu bible

Sarakalasebagaw ka kitabu 4

¹Masaba y'a fɔ Musa ye ko:

²«A fɔ Isirayɛlidenw ye ko: Ni mɔgɔ dɔ filila ka hakɛ kɛ, n'a ma ne Masaba ka fɔta dɔ lo bato, n'a ye kodagabali kɛ, o tigi ka kan ka min kɛ, o filɛ nin ye:

³«Ni sarakalasebagaw kuntigi le ye hakɛ kɛ, min kosɔn jama jalakira, a ka na ni tura kɛɲɛnin ye fiɲɛ te min na, k'a kɛ hakɛ yafa saraka ye ne Masaba ye a ka hakɛ kosɔn.

⁴A ka na n'a ye Ɲɔgɔnkunbɛn fanibugu daa la ne Masaba ɲakɔrɔ, k'a bolo la a kuun na k'a kaan tigɛ ne ɲakɔrɔ.

⁵O kɔ, ale sarakalasebagaw kuntigi yɛrɛ k'a joli dɔ ta ka don n'a ye Ɲɔgɔnkunbɛn fanibugu kɔnɔ,

⁶k'a bolokunnaden sun joli nin na k'o seriseri siɲɛ wolonwula ne Masaba ɲafɛ, ne ka sigiyɔrɔ la, cɛtigɛfani ɲafɛ.

⁷O kɔ, wusulan kasadiman saraka be jɛni sarakabɔyɔrɔ min kan Ɲɔgɔnkunbɛn fanibugu kɔnɔ ne Masaba ɲakɔrɔ, a ka joli nin dɔ kɛ o nɔnkɔnw kan, k'a tɔɔ bɛɛ bɔn saraka jɛnita bɔyɔrɔ juu kɔrɔ, min be Ɲɔgɔnkunbɛn fanibugu daa la.

⁸O kɔ, a ka tura nin tulu bɛɛ bɔ a la: a kɔnɔnatulu bɛɛ,

⁹n'a kɔkili fila ni tulu min b'u kan, n'a soron ta, ani a biɲɛ yɔrɔ ɲanaman, a bena min bɔ n'a kɔkiliw ye,

¹⁰i n'a fɔ a be jɛnɲɔgɔnya saraka tura ta bɔ cogo min na. O kɔ, sarakalasebaga k'a jɛni saraka jɛnita bɔyɔrɔ la.

¹¹Nga tura nin golo n'a sogo bɛɛ, n'a kunkolo n'a seenw, n'a nugu ani a boo,

¹²o kɔrɔ ko tura nin tɔɔ bɛɛ, a ka taga n'a bɛɛ ye jama ka sigiyɔrɔ kɔfɛ, yɔrɔ dɔ la min saniyanin lo sariya faan fɛ, bugurigwɛ bɔnyɔrɔ la, k'a jɛni lɔgɔ kan yen.

¹³«Ni Isirayɛli jama bɛɛ le filila ka hakɛ kɛ, n'u ma ne Masaba ka fɔta bato ka kodagabali kɛ, hali n'u ma bɔ o kala ma, u jalakira.

¹⁴N'u nana bɔ u ka hakɛ nin kala ma tuma min na, u ka na ni tura kɛɲɛnin ye k'o kɛ hakɛ yafa saraka ye. U ka na n'a ye Ɲɔgɔnkunbɛn fanibugu ɲafɛ.

¹⁵Jama ka cɛkɔrɔbaw k'u bolow la tura nin kuun na ne Masaba ɲakɔrɔ, ka tura nin kaan tigɛ ne ɲana.

¹⁶O kɔ, sarakalasebagaw kuntigi k'a joli dɔ ta ka don n'o ye Ɲɔgɔnkunbɛn fanibugu kɔnɔ,

¹⁷k'a bolokunnaden sun joli nin na k'o seriseri siɲɛ wolonwula ne Masaba ɲakɔrɔ soo cɛtigɛfani ɲafɛ.

¹⁸Sarakabɔyɔrɔ min be ne ɲafɛ Ɲɔgɔnkunbɛn fanibugu kɔnɔ, a ka joli nin dɔ kɛ o nɔnkɔnw kan, k'a tɔɔ bɛɛ bɔn saraka jɛnita bɔyɔrɔ juu kɔrɔ, min be Ɲɔgɔnkunbɛn fanibugu daa la.

¹⁹A k'a tulu bɛɛ bɔ a la k'o jɛni sarakabɔyɔrɔ kan.

²⁰A ye hakɛ yafa saraka tura ta kɛ cogo min na, a ka tura dɔ nin ta kɛ ten fana. O la, sarakalasebaga bena o koo yafa daali, ne Masaba be yafa u ma.

²¹O kɔ, a ka taga n'o tura nin ye jama sigiyɔrɔ kɔfɛ k'a jɛni, i n'a fɔ a ye fɔlɔta jɛni cogo min na. O ye jama ka hakɛ yafa saraka ye.

²²«Ni jama ɲamɔgɔ dɔ filila ka hakɛ kɛ, n'a ma ne Masaba a ka Ala ka fɔta bato, ka kodagabali dɔ kɛ, a jalakira.

²³N'a nana bɔ a kala ma tuma min na, a ka na ni bakɔrɔnin ye fiɲɛ te min na, k'o kɛ saraka ye.

²⁴Saraka jɛnita kaan be tigɛ ne Masaba ɲafɛ yɔrɔ min na, a k'a bolo la a kuun na k'a kaan tigɛ yen. Hakɛ yafa saraka lo.

²⁵O kɔ, sarakalasebaga k'a joli dɔ ta k'a bolokunnaden sun a la, k'a mɔ saraka jɛnita bɔyɔrɔ nɔnkɔnw kan, k'a tɔɔ bɔn sarakabɔyɔrɔ nin juu kɔrɔ.

²⁶A k'a tulu bɛɛ jɛni sarakabɔyɔrɔ kan, i n'a fɔ jɛnɲɔgɔnya saraka ta tulu be jɛni cogo min na. O la, sarakalasebaga b'o tigi ka hakɛ yafa daali, ne Masaba bena yafa a ma.

²⁷ «Ni mɔgɔ dɔ le filila ka hakɛ kɛ jama cɛma, n'a ma ne Masaba ka fɔta bato ka kodagabali dɔ kɛ, a jalakira.

²⁸N'a nana bɔ o kala ma tuma min na, a ka na ni bamuso ye fiɲɛ te min na, k'a kɛ saraka ye a ka hakɛ kosɔn.

²⁹Saraka jɛnita kaan be tigɛ yɔrɔ min na, a k'a bolo la a kuun na k'a kaan tigɛ yen.

³⁰O kɔ, sarakalasebaga k'a joli dɔ ta k'a bolokunnaden sun a la k'a mɔ saraka jɛnita bɔyɔrɔ nɔnkɔnw kan k'a tɔɔ bɛɛ bɔn sarakabɔyɔrɔ juu kɔrɔ.

³¹Jɛnɲɔgɔnya saraka tulu be bɔ cogo min na, a k'a tulu bɛɛ bɔ ten, k'o jɛni sarakabɔyɔrɔ kan. A kasa ka di ne Masaba ye. O la, sarakalasebaga b'o tigi ka hakɛ yafa daali, ne be yafa a ma.

³²«N'o tigi be na ni sagaden ye k'a kɛ hakɛ yafa saraka ye, a ka na ni sagamuso ye fiɲɛ te min na.

³³Saraka jɛnita kaan be tigɛ yɔrɔ min na, a k'a bolo la a kuun na k'a kaan tigɛ yen, k'a kɛ hakɛ yafa saraka ye.

³⁴O kɔ, sarakalasebaga k'a joli dɔ ta k'a bolokunnaden sun a la k'a mɔ saraka jɛnita bɔyɔrɔ nɔnkɔnw kan k'a tɔɔ bɛɛ bɔn sarakabɔyɔrɔ juu kɔrɔ.

³⁵A k'a tulu bɛɛ bɔ a la, i n'a fɔ jɛnɲɔgɔnya saraka sagaden ta be bɔ cogo min na. Sarakalasebaga k'o jɛni sarakabɔyɔrɔ kan, ka fara sarakaw kan minw be jɛni ne Masaba ye pewu. O la, sarakalasebaga be o tigi ka hakɛ yafa daali, ne Masaba be yafa a ma.