Read dyu Sarakalasebagaw ka kitabu 5 Bible Online

Sarakalasebagaw ka kitabu 5 - dyu bible

Sarakalasebagaw ka kitabu 5

¹«Ni mɔgɔ dɔ welela janko a ka seereya kɛ ka tiɲɛ fɔ koo dɔ la, a ye min ye, walima a ye min mɛn, n'a ma sɔn k'o fɔ, o be kɛ hakɛ ye a kunna.

²Ni mɔgɔ dɔ magara fɛɛn dɔ la, min saniyanin tɛ sariya faan fɛ, a kɛra kongokɔnɔfɛn suu ye wo, walima begɛn suu ye wo, walima fɛɛn fofota suu ye, hali n'a tigi ma bɔ a kala ma, a tigi be nɔgɔ. A jalakinin lo.

³N'a magara mɔgɔ dɔ ka fɛnnɔgɔnin dɔ la, a kɛra fɛɛn o fɛɛn ye min be se ka mɔgɔ nɔgɔ, hali n'a ma bɔ a kala ma, n'a y'a lɔn tuma min na, a jalakinin lo.

⁴Ni mɔgɔ dɔ daa teliyara ka kali ko a bena koo dɔ kɛ, n'a ma miiri fɔlɔ, o kɛra koo ye min b'a nafa wo, walima min t'a nafa, mɔgɔ be se ka kali koo o koo la n'a ma miiri, hali n'a ma bɔ a kala ma, n'a y'a lɔn tuma min na, a jalakinin lo.

⁵«Mɔgɔ o mɔgɔ mana o koo nunu dɔ kɛ, a ka lɔ a hakɛ la.

⁶O kɔ, a ka na ni begɛnmisɛn ye, sagamuso, walima bamuso, k'o bɔ hakɛ yafa saraka ye Masaba ye, a ka hakɛ kosɔn. Sarakalasebaga ka yafa daali a ye a ka hakɛ nin kosɔn.

⁷«Ni see te mɔgɔ min ye ka saga, walima baa sɔrɔ, o tigi ka na ni tuganin fila ye, walima jɛnɛtuba fila, k'u kɛ saraka ye Masaba ye, a ka hakɛ kosɔn. Kelen be kɛ hakɛ yafa saraka ye, kelen be kɛ saraka jɛnita ye.

⁸A ka na n'u ye sarakalasebaga fɛ, ale ka kɔn ka hakɛ ta bɔ fɔlɔ. A k'a kaan tigɛ, nga a kan'a kungolo bɔ a la.

⁹A k'a joli dɔ seriseri sarakabɔyɔrɔ gɛrɛn na, k'a tɔɔ bɔn sarakabɔyɔrɔ juu kɔrɔ. Hakɛ yafa saraka lo.

¹⁰O kɔ, a ka kɔnɔ filanan kɛ saraka jɛnita ye ka kɛɲɛ n'a cogo ye, k'o tigi ka hakɛ yafa daali a ye. O la, Masaba bena yafa a ma.

¹¹«Ni tuganin fila, walima jɛnɛtuba fila sɔrɔ see t'a ye fana, a ka na ni mugu tɛntɛnnin kilo naani ye k'o kɛ hakɛ yafa saraka ye a ka hakɛ kosɔn. A kana tulu, walima wusulan kɛ a kan, bari hakɛ yafa saraka lo.

¹²A ka na n'o ye sarakalasebaga fɛ, sarakalasebaga k'a tigɛ ɲaa kelen bɔ mugu nin na. Saraka minw be jɛni ne Masaba ye pewu, a k'o jɛni ni olu ye sarakabɔyɔrɔ kan, o ka kɛ hakilijigifɛn ye. Hakɛ yafa saraka lo.

¹³O la, n'a ye hakɛ min kɛ, sarakalasebaga bena o yafa daali a ye, ne Masaba be yafa a ma. Suman saraka koo be kɛ cogo min na, sarakalasebaga ben'a kɛ ten.» [1]

¹⁴Masaba y'a fɔ Musa ye ko:

¹⁵«Fɛɛn minw be di ne Masaba ma, ni mɔgɔ dɔ filila ka hakɛ kɛ o fɛɛn nunu dɔ koo la, n'a ma tugu k'a kɛ, a ka na ne ɲafɛ ni sagajigi ye, fiɲɛ te min na. A k'a bɔ a ka sagaw cɛma k'a kɛ fili nin yafa saraka ye, saga min sɔngɔ be bɛn warigwɛ hakɛ dɔ ma ka kɛɲɛ ni ne ka sigiyɔrɔ warigwɛ kuru jaticogo ye.

¹⁶A tigi ma min di ne ka sigiyɔrɔ la, a b'o sara, k'a ɲɔgɔn tilan duurunan fara a kan, k'a bɛɛ di sarakalasebaga ma, ale ka sagajigi nin faga k'a kɛ fili yafa saraka ye k'o tigi ka hakɛ yafa daali. O la, ne Masaba bena yafa a ma.

¹⁷«Ni mɔgɔ dɔ ye hakɛ kɛ, n'a ma ne Masaba ka fɔta bato ka kodagabali kɛ, hali n'a ma bɔ a kala ma, a jalakinin lo. O kunko b'a kunna.

¹⁸A ka sagajigi bɔ a ka sagaw cɛma, fiɲɛ te min na, min sɔngɔ be bɛn o saraka nin ɲɔgɔn ma, ka na o di sarakalasebaga ma k'o kɛ fili yafa saraka ye. O la, a filila ka hakɛ min kɛ, sarakalasebaga bena o yafa daali a ye, ne Masaba be yafa a ma.

¹⁹O ye fili yafa saraka ye, bari o tigi tun ye hakɛ kɛ ne Masaba la.»

²⁰ Masaba y'a fɔ Musa ye ko:

²¹«Ni mɔgɔ dɔ ye hakɛ kɛ ka fili ne Masaba ma, n'a ye galon tigɛ a mɔgɔɲɔgɔn ye fɛɛn dɔ koo la, min kalifar'a ma, walima a ye min dɔndɔ, walima fɛnsoɲanin dɔ koo la, walima n'a y'a tɔɲɔ,

²²walima n'a ye fɛntununin dɔ ye ka galon tigɛ a koo la, walima n'a kalila galon kan o koo nunu dɔ la minw ye hakɛ ye,

²³n'a ye hakɛ kɛ ten, a jalakinin lo. A ka kan k'o fɛɛn nin sara, a ye min soɲa, walima a ye mɔgɔ tɔɲɔ ka min sɔrɔ, walima fɛɛn min tun kalifar'a ma, walima a ye fɛntununin min ye,

²⁴walima n'a kalila galon kan fɛɛn min la. Loon min na a b'a ka fili yafa saraka bɔra, a k'o fɛɛn nin tilan duurunan fara a kan k'a di fɛɛn tigi ma.

²⁵A ka sagajigi bɔ a ka sagaw cɛma, fiɲɛ te min la, min sɔngɔ be bɛn o saraka nin ɲɔgɔn ma, ka na o di sarakalasebaga ma k'o kɛ fili yafa saraka ye ne Masaba ye.

²⁶O la, sarakalasebaga bena yafa daali o tigi ye ne Masaba fɛ. A ye fɛɛn o fɛɛn kɛ min ye fili ye k'a kɛ a jalakira, ne Masaba bena o yafa.»