Read dyu Sarakalasebagaw ka kitabu 6 Bible Online

Sarakalasebagaw ka kitabu 6 - dyu bible

Sarakalasebagaw ka kitabu 6

¹Masaba y'a fɔ Musa ye ko:

²«A fɔ Arɔn n'a deenw ye ko: «Saraka jɛnita sariya filɛ nin ye. Saraka jɛnita ka kan ka to sarakabɔyɔrɔ kan fɔɔ ka dugu gwɛ, tasuma mananin ka to yen.

³Sarakalasebaga ka kan k'a ka forocaba don a kaan na min danna ni jese ɲanaman ye, k'a ka kurusi don a cɛɛ la min danna ni jese ɲanaman ye. Saraka jɛnita buguri min tora sarakabɔyɔrɔ kan, a k'o bugurigwɛ cɛ k'o bila sarakabɔyɔrɔ gɛrɛfɛ.

⁴O kɔ, a k'o fani nunu bɔ ka fani dɔ wɛrɛw don, ka sɔrɔ ka bugurigwɛ ta ka taga n'a ye jama sigiyɔrɔ kɔfɛ, yɔrɔ dɔ la min saniyanin lo sariya faan fɛ.

⁵Tasuma mananin ka to sarakabɔyɔrɔ la, a man kan ka faga. Sɔgɔma o sɔgɔma, sarakalasebaga ka lɔgɔ don a la ka saraka jɛnita la o kan, ani ka jɛnɲɔgɔnya sarakaw tulu jɛni o kan.

⁶Tasuma mananin ka to sarakabɔyɔrɔ la tuma bɛɛ, a man kan ka faga fewu.

⁷«Suman saraka sariya le filɛ nin ye. Arɔn dencɛw ka kan k'o bɔ ne Masaba ye sarakabɔyɔrɔ ɲafɛ.

⁸Sarakalasebaga ka kan k'a tigɛ ɲaa kelen bɔ mugu tɛntɛnnin na, ni tulu, ani wusulan bɛɛ, min be suman saraka kan, k'u bɛɛ jɛni sarakabɔyɔrɔ kan, k'o kɛ hakilijigifɛn ye. O saraka nin kasa ka di ne Masaba ye.

⁹Arɔn n'a dencɛw k'a tɔɔ dumu. U k'a dumu yɔrɔ senuman dɔ la. U k'a dumu Ɲɔgɔnkunbɛn fanibugu luu kɔnɔ, fununan kana kɛ a la.

¹⁰N'u be suman saraka wusu, fununan man kan ka don a la. O ye Arɔn n'a dencɛw ta ye, ne y'a di u ma ka bɔ sarakaw la minw be jɛni ne ye pewu. A saniyanin lo kosɔbɛ i n'a fɔ hakɛ yafa saraka, ani fili yafa ta.

¹¹Arɔn deen cɛmanw dɔrɔn le be se k'a dumu. O ye u niyɔrɔ ye sarakaw la minw be jɛni ne Masaba ye pewu, waati nataw bɛɛ la. Ni mɔgɔ wɛrɛ magar'a la, o tigi ta be cɛn.»

¹²Masaba y'a fɔ Musa ye fana ko:

¹³«Kabini loon min na tulu kɛra Arɔn n'a dencɛw kan ka kɛ ne Masaba ka sarakalasebagaw ye, u ka kan ka to ka saraka min bɔ ne ye, o ye mugu tɛntɛnnin kilo saba ye. A tilan kelen ka bɔ sɔgɔma, a tɔɔ ka bɔ wulafɛ.

¹⁴A ka ɲagami ni tulu ye ka yiran ŋɔmidaga kɔnɔ. A ka karikari, k'o kunkurunw bɔ suman saraka ye, a kasa ka di ne Masaba ye.

¹⁵Arɔn dencɛ min mana kɛ sarakalasebagaw kuntigi ye a nɔɔ na, ale fana k'o ɲɔgɔn kɛ. O ye ne Masaba niyɔrɔ ye tuma bɛɛ, a bɛɛ ka jɛni pewu.

¹⁶Sarakalasebaga yɛrɛ ka suman sarakaw bɛɛ ka kan ka jɛni pewu, o man kan ka dumu.»

¹⁷Masaba y'a fɔ Musa ye ko:

¹⁸«A fɔ Arɔn n'a dencɛw ye ko: Hakɛ yafa saraka sariya le ye nin ye: Saraka jɛnita kaan be tigɛ yɔrɔ min na, hakɛ yafa saraka kaan ka tigɛ yen ne Masaba ɲakɔrɔ. Fɛɛn saniyanin lo kosɔbɛ.

¹⁹Sarakalasebaga min b'o koo ɲafɛ, ale lo be se k'a dumu. A k'a dumu yɔrɔ senuman dɔ la, Ɲɔgɔnkunbɛn fanibugu luu kɔnɔ.

²⁰Ni fɛɛn o fɛɛn magara o sogo nin na, a ta be cɛn. N'a joli serila fani dɔ kan, a k'a ko yɔrɔ senuman dɔ la.

²¹Sogo nin tobira bɔgɔdaga min kɔnɔ, o ka kan ka ci. Nga n'a tobira ziradaga le kɔnɔ, a k'a jɔsi ka ɲa, k'a sananko jii la.

²²Sarakalasebaga ka somɔgɔ cɛmanw bɛɛ be se k'a dumu. Fɛɛn saniyanin lo kosɔbɛ.

²³Nga n'u donna ni hakɛ yafa saraka min joli ye Ɲɔgɔnkunbɛn fanibugu kɔnɔ ne ka sigiyɔrɔ la janko ka yafa daali, o sogo si kana dumu, a ka jɛni.