Read dyu Sarakalasebagaw ka kitabu 7 Bible Online

Sarakalasebagaw ka kitabu 7 - dyu bible

Sarakalasebagaw ka kitabu 7

¹«Fili yafa saraka sariya le filɛ nin ye: Fɛɛn saniyanin lo kosɔbɛ.

²Saraka jɛnita kaan be tigɛ yɔrɔ min na, fili yafa saraka kaan ka tigɛ yen. A joli ka seriseri sarakabɔyɔrɔ faan bɛɛ kan.

³A tulu bɛɛ ka di ne Masaba ma: a kukala n'a kɔnɔnatulu,

⁴n'a kɔkili fila ni tulu min b'u kan, n'a soron ta. Ani a biɲɛ yɔrɔ ɲanaman, a bena min bɔ n'a kɔkiliw ye.

⁵Sarakalasebaga k'o bɛɛ jɛni pewu ne Masaba ye sarakabɔyɔrɔ kan. Fili yafa saraka lo.

⁶Sarakalasebaga ka somɔgɔ cɛmanw bɛɛ be se k'o dumu. A ka dumu yɔrɔ senuman dɔ la. Fɛɛn saniyanin lo kosɔbɛ.

⁷Hakɛ yafa saraka ka kan ka kɛ cogo min na, fili yafa saraka fana ka kan ka kɛ ten. Sariya kelen le be u fila bɛɛ bɔcogo la. Sarakasogo nin be kɛ sarakalasebaga ta ye, min ye yafa daali.

⁸«Ni sarakalasebaga ye mɔgɔ min ka saraka jɛnita koo ɲanabɔ, a be se ka to n'a golo ye.

⁹Suman saraka o saraka min dilanna dibi kan, walima min yiranna tango kɔnɔ, walima ŋɔmidaga kɔnɔ, o ye sarakalasebaga ta ye min y'a koo ɲanabɔ.

¹⁰Nga tulu ɲagamina suman saraka minw na, walima minw janin lo, o bɛɛ ye Arɔn dencɛw bɛɛ lajɛnnin ta ye. U bɛɛ niyɔrɔ ka kan ka kɛ kelen ye.

¹¹«Jɛnɲɔgɔnya saraka min ka kan ka bɔ Masaba ye, o sariya filɛ nin ye:

¹²Ni mɔgɔ dɔ b'a fɛ ka jɛnɲɔgɔnya saraka bɔ ka kɛ ɲumanlɔnbaga ye, o tigi ka kan ka fɛɛn minw fara o foli saraka kan, o filɛ nin ye: tulu ɲagamina burumisɛn minw na, ni fununan te u la, ani furufuru, tulu ka funfun o kan, fununan te min na, ani burumisɛn minw dilanna ni mugu tɛntɛnnin ye, min nɔɔnina kosɔbɛ, tulu ɲagaminin be minw na.

¹³Fununan be burumisɛn minw na, olu fana be bɔ ka foli saraka nin bila sira.

¹⁴A ka dɔ bɔ fɛɛn nunu sifa bɛɛ la k'u di ne Masaba ma. Sarakalasebaga min be jɛnɲɔgɔnya saraka joli seriseri, a be kɛ o ta ye.

¹⁵Jɛnɲɔgɔnya saraka min bɔra ka ne waleɲuman lɔn, o sogo ka kan ka ɲimi a bɔlon yɛrɛ la, a tɔɔ kana si.

¹⁶«Nga ni mɔgɔ dɔ ka saraka ye dajuru sarata ye, walima n'a diyara a tigi ye k'o bɔ dɔrɔn, a ka kan ka ɲimi a bɔlon na, nga n'a tɔɔ tora, a be se k'a ɲimi a dugusagwɛ fana.

¹⁷Ni sogo tɔɔ tora fɔɔ tile sabanan loon, u k'a jɛni.

¹⁸Ni mɔgɔ dɔ ye jɛnɲɔgɔnya saraka sogo dɔ dumu a tile sabanan loon na, saraka nin tena minɛ. A tena foyi ɲa a bɔbaga ye, bari fɛɛn nɔgɔnin lo. A ɲimibaga ka tilenbaliya bena kɛ a yɛrɛ kunko ye.

¹⁹Sogo nin mana maga fɛɛn o fɛɛn na min nɔgɔnin lo sariya faan fɛ, a man kan ka ɲimi, a ka jɛni. «Mɔgɔ minw saniyanin be sariya faan fɛ, olu be se k'o saraka sogo ɲimi.

²⁰Nga ni mɔgɔ min saniyanin tɛ, n'a ye jɛnɲɔgɔnya saraka sogo ɲimi, min ye ne Masaba ta ye, a ka kan ka gwɛn ka bɔ a ka mɔgɔw cɛma.

²¹Ni mɔgɔ dɔ magara fɛnnɔgɔnin dɔ la, adamaden ka nɔgɔ, walima begɛn nɔgɔnin, walima fɛnnɔgɔnin fɛɛn o fɛɛn na, ka tila ka jɛnɲɔgɔnya saraka sogo dɔ ɲimi, min ye Masaba ta ye, o tigi ka gwɛn ka bɔ a ka mɔgɔw cɛma.»

²²Masaba y'a fɔ Musa ye ko:

²³«A fɔ Isirayɛlidenw ye ko u kana misi, walima saga, walima baa tulu si dumu.

²⁴Sogo min sar'a yɛrɛ ma, walima wara ye min minɛ, u be se k'u mako ɲa n'a tulu ye. Nga u kan'a dumu.

²⁵Saraka min ka kan ka jɛni Masaba ye pewu, ni mɔgɔ dɔ y'o tulu dɔ dumu, o tigi ka gwɛn ka bɔ a ka mɔgɔw cɛma.

²⁶ «Ni u sigira yɔrɔ o yɔrɔ, u man kan ka joli si dumu, kɔnɔ joli, walima sogo ta.

²⁷Fɛɛn o fɛɛn kɛra joli ye ni mɔgɔ min y'o dumu, o tigi ka gwɛn ka bɔ a ka mɔgɔw cɛma.»

²⁸Masaba y'a fɔ Musa ye ko:

²⁹«A fɔ Isirayɛlidenw ye ko ni mɔgɔ dɔ be jɛnɲɔgɔnya saraka bɔ, a ka ne Masaba niyɔrɔ di ne ma.

³⁰A be saraka min bɔ ne ye, o saraka yɔrɔ minw ka kan ka jɛni pewu, a yɛrɛ ka na n'o ye a bolo. A ka na n'a tulu ye, n'a disi, k'a disi fifa ne Masaba ɲafɛ.

³¹Sarakalasebaga k'a tulu jɛni sarakabɔyɔrɔ kan, nga a disi ye Arɔn n'a dencɛw ta ye.

³²U k'u ka jɛnɲɔgɔnya sarakaw kinibolo woto bɔ k'a di sarakalasebaga ma.

³³O woto nin ye Arɔn dencɛ niyɔrɔ ye, min ye saraka nin joli n'a tuluko ɲanabɔ.

³⁴Disi min be fifa ne Masaba ɲakɔrɔ, ni woto min ka kan ka bɔ, ne ye olu bɔ Isirayɛlidenw ka jɛnɲɔgɔnya sarakaw la k'u di sarakalasebaga Arɔn n'a dencɛw ma, ka kɛ u niyɔrɔ ye waati bɛɛ la.»

³⁵Nin ye Arɔn n'a dencɛw niyɔrɔ ye sarakaw la minw be jɛni Masaba ye pewu. O y'u ta ye kabini u kɛra sarakalasebagaw ye loon min na Masaba ɲafɛ.

³⁶U ye tulu kɛ u kan k'u bila Masaba ka baara la loon min na, Masaba y'a fɔ ko Isirayɛlidenw k'o fɛɛn nunu d'u ma ka kɛ u niyɔrɔ ye, k'a daminɛ bii fɔɔ tuma bɛɛ.

³⁷O ye sariya ye saraka jɛnita, ni suman saraka, ni hakɛ yafa saraka, ani fili yafa saraka, ni sarakalasebagaw donko u ka baara la, o saraka, ani jɛnɲɔgɔnya saraka koo la.

³⁸Masaba y'o fɔ Musa ye kongokolon kɔnɔ Sinayi kulu kan loon min na, a y'a fɔ Isirayɛlidenw ye ko u ka na n'u ka boɲafɛnw ye k'u d'a ma.